पाल्पामा राजस्व छली गरेका सामान बरामद - लुम्बिनी - कान्तिपुर समाचार

पाल्पामा राजस्व छली गरेका सामान बरामद 

माधव अर्याल

पाल्पा — तानसेन नगरपालिका–६, बसपार्क प्रहरी चौकीले जाँच गर्ने क्रममा राजस्व छली गरेका सामान बरामद गरेको छ । जिल्ला प्रहरी कार्यालयका अनुसार मंगलबार बेलुकी साढे ८ बजेतिर बुटवलबाट पाल्पा आउँदै गरेको जिपमा राजस्व छली गरेर ल्याएका सामग्री बरामद भएको हो ।

प्रहरीले विभिन्न आकारका कराई ८०, फेन्सी कराई ७७, कसौडी १ सय ५२, पटकुकर १२९ वटा बरामद गरेको जनाएको छ । कुनै पनि सामानको बिल दिन नसकेको र भारतीय बजारबाट ल्यााएको हुन सक्ने प्रहरीले जनाएको छ ।

वाग्मती प्रदेश ०१ ०२५ च ८३८८ नम्बरको पिकअप जिपमा रौतहटको दुर्गा भगवती गाउँपालिका–५ का १९ वर्षीय रुपेश साह, रौतहटकै डमरियाका २७ वर्षीय भोजेन्द्र चौधरीलाई आवश्यक कारबाहीका लागि राजस्व अनुसन्धनन कार्यालय बुटवल पठाइएको प्रहरीका सूचना अधिकारी वीरेन्द्र थापाले जानकारी दिए । उनका अनुसार सामान करिब १ लाख ९७ हजार १ सय मूल्य बराबरको रहेको छ।


प्रकाशित : श्रावण १८, २०७९ १६:३९
प्रतिक्रिया
पठाउनुहोस्

प्रतिबन्धित लागूऔषधसहित उपत्यकाबाट २२ जना पक्राउ

कान्तिपुर संवाददाता

काठमाडौँ — प्रहरीले उपत्यकाको विभिन्न स्थानबाट प्रतिबन्धित लागूऔषधसहित २२ जनालाई पक्राउ गरेको छ । नेपाल प्रहरीको लागूऔषध नियन्त्रण व्युरो कोटेश्वरले २०७८ असार ३२ देखि साउन १८ गते बुधबारसम्म १९ दिनमा चार महिलासहित १८ पुरुषलाई पक्राउ गरेको हो । 

प्रहरीले यही साउन ८ गते ताप्लेजुङ मेरिङदेन घर भई ललितपुर इमाडोल बस्ने ३३ वर्षीय तुलसा खड्कालाई पक्राउ गर्‍यो । उनको साथबाट नाइट्राभेट ट्याब्लेट एक हजार २६० थान, प्रोक्सिभन क्याप्सुल १५० थान, ‘डायलेक्स डिसी’ छ बोलत र कोडिन जस्तो देखिने रातो रङको तरल पदार्थ तीन सय मिलिलिटर बरामद भयो ।

खड्कालाई लागूऔषध उपलब्ध गराउने सर्लाही हरिवन घर भई गोकर्णेश्वर बेँसीगाउँ बस्ने ३५ वर्षीय बुद्ध बम्जन र खड्कालाई लागूऔषध कारोबारमा सहयोग गर्ने सुनसरी बराह घर भई इमाडोल बस्ने २७ वर्षको युवराज खड्कालाई पनि प्रहरी पक्राउ गरेको छ ।

प्रहरीले लागूऔषधसहित पक्राउ परेकाको अनुसन्धानबाट सोही अवैध कारोबारमा सहयोग गर्ने र लागूऔषध उपलब्ध गराउनेसम्मलाई पक्राउ गरेको हो ।

त्यस्तै लागूऔषध नियन्त्रण ब्यूरोले यही साउन १३ गते ३८४ ग्राम हेरोइनसहित रामेछाप नगरपालिका–९ घर भई गोकर्णेश्वर बस्ने ४० वर्षीय जुनमाई मोक्तानलाई पक्राउ गरेको थियो । उपत्यकाको ललितपुर, भक्तपुर र काठमाडौंका विभिन्न स्थानबाट लागूऔषध कारोबारमा संलग्न रहेका सबैलाई पक्राउ गरी प्रहरीले बुधबार सार्वजनिक गरेको हो ।

व्युरोका प्रमुख प्रहरी वरिष्ठ उपरीक्षक विकास खनालका अनुसार पक्राउ परेकाहरुको साथबाट ४५९ ग्राम हेरोइन, ‘डायलेक्स डिसी’ एक हजार १८० बोतल, नाइट्राभेट ट्याब्लेट एक हजार २६० थान र प्रोक्सिभन क्याप्सुल १५० थान बरामद गरिएको छ ।

बरामद गरिएको लागूऔषधको कूल बजार मूल्य ५८ लाख १० हजार ८०० रहेको जानकारी प्रहरीले दिएको छ । यसरी अवैध लागूऔषधमा संलग्न हुने र पक्राउ पर्नेको संख्या बढ्दो देखिन्छ । यसअघि साउन १ गते चार किलो अवैध लागूऔषध हेरोइनसहित अफ्रिकी नागरिक ज्याक एन्टोन एन्गेलब्रेच र भारतका ३२ वर्षीया ज्योथाङीलाई प्रहरीले तिलगंगाबाट पक्राउ गरेको थियो ।

प्रकाशित : श्रावण १८, २०७९ १६:३१
पूरा पढ्नुहोस्
प्रतिक्रिया
पठाउनुहोस्
×