कुखुरा तस्करी रोक्न माग
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/mastercreativegif900x100-0952024115624.gif)
नेपालगन्ज — बाँकेमा कुखुरा तस्करी बढ्दा व्यावसायिक किसान मर्कामा परेका छन् । भारतबाट खुला सीमाको फाइदा उठाउँदै कुखुरा भित्रिन थालेपछि यहाँका किसानका कुखुरा बिक्री हुन छाडेका हुन् । भारतीय कुखुरा नेपालीभन्दा प्रतिकिलो ४० रुपैयाँ कममा पाइन्छ । त्यसैले व्यापारीले चोरबाटो भएर भारतबाट कुखुरा भित्र्याइरहेका छन् ।
![](https://assets-cdn.ekantipur.com/uploads/source/ads/reward-900x100-pxl-2462024072414.gif)
![कुखुरा तस्करी रोक्न माग](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2020/third-party/chicken-0542020084320-1000x0.jpg&w=1001&h=0)
![](https://assets-cdn.ekantipur.com/uploads/source/ads/sathi-deposit-900-100-1262024124333.gif)
अहिले नेपाली कुखुरा प्रतिकिलो २ सय रुपैयाँमा दिंदा पनि व्यापारीले खरिद नगरेको किसानले बताए । अहिले बाँकेमा प्रत्येक हप्ता ८० हजारदेखि १ लाखसम्म बजार लैजानका लागि कुखुरा तयार छन् ।
कुखुरा व्यवसायी संघ बाँकेका कार्यवाहक अध्यक्ष ईश्वर सुवेदीले केही सातायता बाँकेका किसानका कुखुरा बिक्री नहुँदा किसानले लाखौंको घाटा व्यहोरिरहेको बताए । तर, बजारमा मासु बिक्रेताले भारतीय कुखुरा बेचिरहेको उनको आरोप छ । भारतबाट अवैध कुखुरा तस्करी भएर नेपाली कुखुरा बिक्री हुन छाडेपछि पोल्ट्री व्यवसाय सम्बद्धहरूले प्रशासनप्रति आक्रोश व्यक्त गरेका छन् । उनीहरूले प्रशासनले अवैध आयात रोक्ने जिम्मेवारी पूरा नगर्दा नेपाली व्यवसायी धराशयी हुने अवस्थामा पुगेको बताए । भारतबाट पंक्षीजन्य वस्तु आयात गर्न प्रतिबन्ध लगाइएको भए पनि बाँकेमा अवैध रूपमा कुखुरा तस्करी भइरहेको र त्यसमा प्रहरी मूकदर्शक बनेको यहाँका किसानको आरोप छ ।
बाँकेको खुला नाकाबाट अवैध रूपमा भित्रिने कुखुराको मासु काठमाडौंसम्म पुग्ने भएकाले नाकामा कडाइ गरिदिन नेपाल दाना उद्योग संघका अध्यक्ष रविन पुरीले आग्रह गरे । यहाँका कुखुरा व्यवसायीले भारतीय कुखुरा रोक्न प्रमुख जिल्ला अधिकारीसमक्ष अनुरोधसमेत गरेका छन् । भारतीय कुखुरा निर्वाध आयात हुँदा आफनो व्यवसाय धरापमा परेको भन्दै नेपाली कुखुरा व्यवसायीले नाकामा कडाइ गर्न अनुरोध गरेका हुन् । जिल्ला प्रशासन कार्यालय, बाँकेमा पुगेर प्रमुख जिल्ला अधिकारी सूर्यबहादुर खत्रीलाई ज्ञापनपत्र बुझाएका व्यवसायीले आफैंले केही पसलको अनुगमन गरेका थिए । त्यस क्रममा धेरै ठाउँमा भारतीय कुखुरा ल्याएर बेच्ने गरेको पाइएको व्यवसायीले बताए ।
![](https://assets-cdn.ekantipur.com/uploads/source/ads/900-x-100-0172024023126.gif)