विमानस्थल पूर्ण क्षमतामा चलाउन माग- लुम्बिनी - कान्तिपुर समाचार

विमानस्थल पूर्ण क्षमतामा चलाउन माग

बुद्ध धर्म बाहुल्य राष्ट्रमा लुम्बिनीलाई गन्तव्य बनाएर नियमित उडानका लागि प्रक्रिया थाल्न माग
माधव ढुंगाना

भैरहवा — गौतम बुद्ध अन्तर्राष्ट्रिय विमानस्थलबाट धेरै पर्यटक आउने मुलुकहरूमा अन्तर्राष्ट्रिय हवाई उडान सुरु गरी विमानस्थललाई पूर्ण क्षमतामा सञ्चालन गर्न निजी क्षेत्रले माग गरेको छ । जजिरा एयरलाइन्सको सातामा तीनवटा उडानमा सीमित रहेको उक्त विमानस्थललाई आर्थिक गतिविधिसहितको चलायमान केन्द्र बनाउन अन्तर्राष्ट्रिय र आन्तरिक उडान बढाउन सरकारले तत्कालै पहल गर्नुपर्ने व्यवसायीले बताएका छन् । यसका लागि सरकारले नेपालकै राष्ट्रिय ध्वजावाहक नेपाल एयरलाइन्सबाट उडान सञ्चालन गर्नुपर्ने सुझाव पनि उनीहरूको छ ।

‘यस विमानस्थललाई लक्षित गरी भैरहवा, लुम्बिनीलगायत प्रदेशभरि नै पर्यटन क्षेत्रमा निजी लगानी ठूलो छ,’ सिद्धार्थ उद्योग वाणिज्य संघका अध्यक्ष भीष्म न्यौपानेले भने, ‘यस विमानस्थल हुँदै राष्ट्रिय ध्वजावाहक नेपाल एयरलाइन्स तथा हिमालयन एयरलाइन्सबाट दिल्ली, थाइल्यान्ड, मलेसिया, कतार र दुबईका लागि नियमित अन्तर्राष्ट्रिय उडानका लागि सरकारले पहल गर्नुपर्छ ।’ छिमेकी राष्ट्रका समकक्षीसँग समन्वय गरी चीन, भारत, थाइल्यान्ड, म्यानमार, भुटान, श्रीलंका, दक्षिण कोरिया, जापानलगायतका प्रमुख बुद्ध धर्मको बाहुल्य रहेका राष्ट्रमा लुम्बिनीलाई गन्तव्य बनाएर गौतम बुद्ध अन्तर्राष्ट्रिय विमानस्थलबाट नियमित उडानका लागि प्रक्रिया थाल्नुपर्ने उनले बताए ।

गत जेठ २ देखि सञ्चालनमा आएको गौतम बुद्ध अन्तर्राष्ट्रिय विमानस्थलमा हालसम्म जजिरा एयरलाइन्सले सातामा तीनवटा उडान कुवेतदेखि सञ्चालन गर्दै आएको छ । आउँदो अक्टोबर ३० देखि सातामा तीनवटा उडान गर्ने गरी बिज एयरले पनि यहाँ अन्तर्राष्ट्रिय उडान सञ्चालनको तयारी गरेको छ । हंगेरीको यो वायु सेवा कम्पनीले यूएईको अबुधावी–भैरहवा हवाई उडानको तयारी गरेको हो । दिल्लीबाट नेपाल आउने पर्यटक धेरै हुने भएकाले तत्कालै भैरहवा–दिल्लीबीच हवाई उडान सञ्चालनका लागि सरकारले तत्परता देखाउनुपर्ने सिद्धार्थ होटल एसोसिएसनका अध्यक्ष चन्द्रप्रकाश श्रेष्ठले बताए । ‘तत्कालै सातामा कम्तीमा तीनवटा भए पनि दिल्ली–भैरहवाबीच हवाई उडान सञ्चालन गर्न जरुरी छ,’ उनले भने, ‘यो उडान सञ्चालन भएपछि नेपालमा भारतीय पर्यटकको आगमनमा वृद्धि हुनेछ ।’

ट्राभल्स एन्ड टुर एसोसिएसन लुम्बिनी प्रदेशका संयोजक सागर अधिकारीले पनि नेपाल एयरलाइन्सको विमानबाट तत्कालै दिल्ली–भैरहवा उडान सञ्चालन गर्न जरुरी रहेको बताए । ‘हामीसँग आफ्नै विमान पनि छ । यदि दिल्ली–भैरहवा उडान सञ्चालन गर्ने हो भने हरेक उडान यात्रुले भरिन्छन्,’ उनले भने, ‘भैरहवादेखि १ सय किमि दक्षिणमा रहेको भारतको गोरखपुरस्थित विमानस्थल हरेक दिन दिल्ली जाने आउने नेपाली यात्रुले भरिएको हुन्छ ।’

पर्यटन व्यवसायी तथा नेपा ट्राभल्सका सञ्चालक सञ्जय बजिमयले विभिन्न अन्तर्राष्ट्रिय उडानसँगै भैरहवाबाट आन्तरिक क्षेत्रीय उडान सञ्चालन गर्नुपर्ने बताए । बुद्ध एयरले मात्रै भैरहवाबाट काठमाडौंबाहेक दैनिक एक/एक उडान पोखरा र भरतपुरमा गर्दै आएको छ । जजिरा एयरलाइन्सले सञ्चालन गरेको भैरहवा–कुवेत हवाई उडानमा भैरहवा क्षेत्रका मात्र नभएर पूर्वमा जनकपुर, विराटनगरदेखि पश्चिममा महाकाली र पहाडी क्षेत्र सुर्खेतसम्मका यात्रु छन् । गौतम बुद्ध अन्तर्राष्ट्रिय विमानस्थलका महाप्रबन्धक गोविन्दप्रसाद दाहालले ती क्षेत्रका हवाई यात्रुले भैरहवाबाट सेवा लिनु भनेको ती क्षेत्रमा यहाँबाट आन्तरिक हवाई उडानको सम्भाव्यता राम्रो देखाएको बताए ।

संस्कृति, पर्यटन तथा नागरिक उड्डयनमन्त्री जीवनराम श्रेष्ठले गौतम बुद्ध अन्तर्राष्ट्रिय विमानस्थललाई पूर्ण क्षमतामा सञ्चालन गर्ने तयारी र योजना सरकारको रहेको बताए । ‘भैरहवामा हवाई यात्रुको चाप बढ्दै जान थालेकाले घरेलु विमानस्थललाई पनि थप व्यवस्थित बनाउने र दोस्रो टर्मिनल बनाउने योजना छ,’ सिद्धार्थ उद्योग वाणिज्य संघको एक कार्यक्रममा सहभागी मन्त्री श्रेष्ठले भने, ‘लुम्बिनीलाई एउटा गन्तव्य स्थल बनाएर विदेशबाट धेरैभन्दा धेरै पर्यटकलाई ल्याउने योजनासहितको कार्यक्रम सरकारले सञ्चालन गर्दै छ ।’

प्रकाशित : श्रावण १३, २०७९ १०:०५
प्रतिक्रिया
पठाउनुहोस्

होल्डिङ सेन्टर सञ्चालनमा अन्योल

झन्डै ३० करोडमा निर्माण भएको संरचना बेवारिसजस्तै बनेको छ
भवानी भट्ट

कञ्चनपुर — चारैतिर तारबारको बीचमा जस्ताले बनाएका भवन पूरै खाली छ । कञ्चनपुरको भीमदत्त नगरपालिका–१८ सालघारी क्षेत्रमा निर्माण गरिएका यी संरचना कोरोना संक्रमितलाई राख्नका लागि बनाइएको होल्डिङ सेन्टर हुन् ।

होल्डिङ सेन्टर निर्माणको काम सकिए पनि यसको सञ्चालन तथा व्यवस्थापनको कुनै टुंगो लागेको छैन । झन्डै ३० करोडमा निर्माण भएको संरचना बेवारिसजस्तै बनेको छ ।

संघीय सरकारको लगानीमा नेपाली सेनाको रेखदेखमा ठेक्का प्रक्रियाबाट कञ्चनपुरको सालघारी क्षेत्रमा १ हजार जनालाई राख्न सकिने क्षमताको होल्डिङ सेन्टर निर्माण गर्न ०७८ असारमा सक्ने गरी हनुमान कन्स्ट्रक्सनलाई २९ करोड ९९ लाखमा ठेक्का दिएको हो । अहिले निर्माण कार्य सकिएर भौतिक संरचनादेखि भित्रका सामानहरू रुजु गर्ने काम भइरहेको निर्माण कम्पनी हनुमान कन्स्ट्रक्सनका परियोजना प्रबन्धक लक्ष्मण सापकोटाले बताए । ‘निर्माणको काम सकिएको छ, अब केही दिनमै हस्तान्तरण गरिनेछ,’ सापकोटाले भने, ‘संरचनादेखि बेडलगायत आवश्यक सबै सामग्रीको रुजु भइरहेको छ ।’

होल्डिङ सेन्टरमा ५० बेड क्षमताका २२ वटा ठूला संरचना छन् । यसैगरी ३ वटा भान्सा र १२ डाइनिङ हल तथा २२ वटा शौचालय गरी ५९ वटा संरचना निर्माण भएका छन् । केही दिनदेखि भारतबाट घर फर्किनेमा दिनहुँ संक्रमण देखिन थालेको छ । असार दोस्रो सातादेखि नाकामा घर फर्किनेमा संक्रमण देखिन थालेको हो । अहिले पनि दैनिक दुई/तीन जनामा संक्रमण देखिने गरेको छ । उनीहरूलाई नाकाबाटै एम्बुलेन्समार्फत महाकाली प्रादेशिक अस्पताल पुर्‍याइन्छ । अस्पतालबाट वडाको सिफारिसमा होम आइसोलेसनमा बस्ने गरी घर पठाइन्छ ।

अहिलेकै अवस्थामा संक्रमण बढ्दै गएमा समुदायमा पनि संक्रमण नफैलिने भन्न सकिँदैन । भारतमा पनि दिनहुँ संक्रमण बढिरहेको अवस्थामा त्यहाँबाट फर्किने पनि बढी मात्रामा संक्रमित आउन सक्छन् । त्यस्तोमा अस्पतालमा बेड नभएमा संक्रमितलाई कहाँ राख्ने भन्ने अनयोल अहिले पनि कायमै छ । एकातिर ठूलो लगानीमा निर्माण भएको होल्डिङ सेन्टरको व्यवस्थापन हुन सकेको छैन । अर्कोतर्फ संक्रमण बढेमा संक्रमितलाई कहाँ राख्ने भन्ने चिन्ता ।

‘होल्डिङ सेन्टरबारे बुझ्न पाएको छैन, अनुगमन गरेर त्यसपछि मात्रै केही भन्न सकिन्छ,’ हालै जिल्लामा आएका प्रमुख जिल्ला अधिकारी गोपालप्रसाद अर्यालले भने, ‘अहिले हामीले संक्रमण रोकथाम र खोप अभियानलाई तीव्रता दिनुपर्ने हो ।’ बुधबार गड्डाचौकी नाकामा १ सय ७५ जनाको एन्टिजेन परीक्षण गर्दा १ जनामा संक्रमण देखिएको छ । मंगलबार पनि १ सय ७० जनाको एन्टिजेन परीक्षण गर्दा २ जनामा संक्रमण देखिएको गड्डाचौकीस्थित हेल्थ डेस्कले जनाएको छ ।

‘हरेक दिन एक/दुई जनामा संक्रमण देखिइरहेको छ,’ हेल्थ डेस्कका इन्चार्ज सिनियर अहेब तर्कराज भट्टले भने, ‘दिल्लीबाट आउनेमा बढी संक्रमण देखिने गरेको छ ।’ साउन ३ गते एकै दिन नौ जनामा संक्रमण देखिएको थियो । त्यसको दोस्रो दिन पनि ४ जनामा संक्रमण देखिएको थियो । यसले समेत संक्रमण बढ्ने संकेत गरिरहेको छ । ‘अस्पताल पनि भरिभराउ भए पनि संक्रमित राख्ने होल्डिङ सेन्टरमै हो,’ जिल्ला स्वास्थ्य कार्यालय कञ्चनपुरका प्रमुख शिवराज सुनारले भने, ‘तर यसको व्यवस्थापन र सञ्चालन कसले गर्ने भन्ने अन्योल छ ।’

होल्डिङ सेन्टरमा स्वास्थ्यकर्मीसँगै उपचार गर्ने सकिने भएकाले संक्रमितको खाने, बस्ने मात्रै नभई स्वास्थ्यकर्मीको व्यवस्थापनसमेत महत्त्वपूर्ण हुन्छ । ठूलो संख्यामा स्वास्थ्यकर्मीसँगै उपचारका लागि औषधिलगायत विभिन्न उपकरण आवश्यक पर्ने भएकाले प्रदेश वा संघीय सरकारबाटै यसको व्यवस्थापनमा ठोस कदम चाल्नुपर्ने सरोकारवाला बताउँछन् ।

‘होल्डिङ सेन्टर हामीलाई हस्तान्तरण भएको छैन, त्यही भएर यसको सञ्चालन तथा व्यवस्थापनबारे पनि कुनै निर्णय भएको छैन,’ सुदूरपश्चिम प्रदेश सामाजिक विकास मन्त्रालयका प्रवक्तासमेत रहेका वरिष्ठ स्वास्थ्य शिक्षा प्रशासक नरेन्द्र कार्कीले भने, ‘हस्तान्तरण भएपछि यसको व्यवस्थापनबारे पनि केही निर्णय होला ।’

प्रकाशित : श्रावण १३, २०७९ १०:०५
पूरा पढ्नुहोस्
प्रतिक्रिया
पठाउनुहोस्
x
×