मल, बीउ, सिंचाइ र आधुनिक कृषि प्रविधि अभावले कृषि उत्पादनमा समस्या
बुटवल — किसानलाई समयमा मल, बीउ, सिंचाइ र आधुनिक कृषि प्रविधि उपलब्ध गराउन नसक्दा सोचेअनुरुप कृषि उत्पादन बढाउन नसकेको सरोकारवालाहरूले गुनासो गरेका छन् ।
लुम्बिनी प्रदेशको कृषि, खाद्यप्रविधि तथा भूमिव्यवस्था मन्त्रालयले आइतबार बुटवलमा आयोजना गरेको अन्तरक्रियामा सहभागीहरूले किसानका न्यूनतम आवश्यकता पूरा नगर्दासम्म व्यावसायिक कृषि नारामा मात्रै सीमित हुने बताए ।
लुम्बिनी प्रदेश सरकारले ७ लाख किसान परिवारसँग विभिन्न सहकार्यमा काम गरेको छ । कृषि सचिव यामनारायण देवकोटाले सहकार्यमा काम गरेका सबैजसो किसान मल, सिंचाइ र कृषि प्रविधिको माग गर्ने गरेको बताए । प्रदेश सरकारले ४ वर्षमा १० हजार हेक्टर क्षेत्रफलमा सिंचाइ सुविधा पुर्याएको छ । यसका लागि कृषि स्मार्ट गाउँ, सिंचाइ सुविधासहितको व्यावसायिक कृषि, ब्लक खेतीलगायतबाट सिंचाइ सुविधा दिए पनि मागअनुसार काम गर्न नसकेको उनले बताए ।
लुम्बिनी प्रदेशमा खेतीयोग्य जमिनको ४३ प्रतिशत भूमिमा मात्रै खेती गरिएको छ; त्यसमध्ये ५० प्रतिशत भूमिमा मात्रै सिंचाइ सुविधा छ । झन्डै २१ प्रतिशतले परम्परागत खेती गर्ने गरेका छन् । लुम्बिनी प्रदेशमा कुल १९ लाख ६९ हजार हेक्टर जमिनमध्ये ६ लाख ९७ हजार हेक्टर जमिन खेतीयोग्य छ ।
प्रदेश सरकारले किसानलाई व्यावसायिक बनाउन भन्दै एक सय १३ किसानलाई अनुदानमा ऋण दिएको छ । कृषि पढेका विद्यार्थीलाई कृषिकर्मी रोजगार कार्यक्रमअन्तर्गत ४ सय १८ जनालाई खटाएको छ । बाख्रा, भैंसी, गाई, ग्रामीण कुखुरा, बंगुर, घाँस विभिन्न जिल्लामा १३ वटा स्रोत केन्द्रहरू स्थापना गरिएको सूचना अधिकारी शालिकराम गौतमले बताए ।
प्रकाशित : असार १२, २०७९ २०:४६