‘जनतासँग मेयर, हाम्रो सपना स्मार्ट तिलोत्तमा’
तिलोत्तमा — रूपन्देहीको तिलोत्तमा नगरपालिकाले नीति तथा कार्यक्रम सार्वजनिक गरेको छ । बिहीबार नगर प्रमुख रामकृष्ण खाँणले आर्थिक वर्ष २०७९/०८० को नीति तथा कार्यक्रम सार्वजनिक गरेका हुन् ।
नीति तथा कार्यक्रममा ‘जनतासँग मेयर, हाम्रो सपना स्मार्ट तिलोत्तमा’ भन्ने नारालाई अघि सारिएको छ । जसअन्तर्गत रेडियो, टेलिभिजन, सार्वजनिक सुनुवाइ, सामाजिक परीक्षण, सार्वजनिक परीक्षणजस्ता कार्यक्रमलाई निरन्तरता दिइने उल्लेख गरिएको छ ।
त्यस्तै सामुदायिक विद्यालयमा छात्रालाई सेनेटरी प्याड नि:शुल्क गरिनुका साथै ‘विषादीमुक्त खानपान, तिलोत्तमाको पहिचान’ लाई पनि अघि सारिएको छ । ज्येष्ठ नागरिकको सहज र सम्मानपूर्वक जीवनयापनका लागि हरेक वडामा तिलोत्तमा चौपारी निर्माण गरिने नगर प्रमुख खाँणले बताए ।
एक विद्यालय एक पुस्तकालय तथा ई-लाइब्रेरी स्थापना गर्न संघीय सरकार र प्रदेश सरकारसँग सहकार्य गरिने र तिलोत्तमा नगरपालिकाभित्रका १२ वटा सामुदायिक माध्यमिक विद्यालयमा विद्यालय नर्स कार्यक्रम लागू भएकोमा आगामी ५ वर्षमा सबै माध्यमिक विद्यालयहरूमा विद्यालय नर्स कार्यक्रम विस्तार गरी संघ र प्रदेशसँग समन्वयात्मक पहल गरिने उल्लेख छ ।
प्रत्येक सामुदायिक विद्यालय र संस्थागत विद्यालयका विद्यार्थीहरूमार्फत घरपरिवारमा सफासुग्घर रहन जनचेतना जगाउने कार्यक्रमलाई अझ प्रभावकारी बनाइने नीति तथा कार्यक्रममा उल्लेख गरिएको छ । हरेक महिनाको १ र १५ गतेका दिन सञ्चालन हुँदै आएको नगर सरसफाइ अभियानलाई अझै उत्साहका साथ निरन्तरता दिइने जनाइएको छ ।
कोखदेखि शोकसम्म अभियान सञ्चालन गरी गर्भवती तथा सुत्केरी महिला लक्षित निःशुल्क एम्बुलेन्स सेवा र सुत्केरी महिलाका लागि पोषणसम्बन्धी कार्यक्रमलाई निरन्तरता दिने कार्यक्रममा उल्लेख गरिएको छ ।
तिलोत्तमा नगरपालिकाको नीति तथा कार्यक्रमको पूर्णपाठ:
प्रकाशित : असार ९, २०७९ १९:४४