भैरहवाको सुधारगृहका बन्दीलाई स्थानान्तर गर्न लाग्दा तनाव

अहिले सुधारगृहभित्र रहेका युवाहरूको समूहले तोडफोड गर्नुका साथै अराजक गतिविधि देखाएको सुरक्षाकर्मीले जनाएका छन् । सुरक्षाकर्मीहरू उनीहरूलाई रोक्न खोज्दा उल्टै सुरक्षाकर्मीमाथि नै जाइलागेको डीएसपी पौडेलले भने ।

उनीहरूले सुधारगृहभित्र सीसा फुटाउने, चक्कु प्रहार गर्न खोज्ने तथा आत्महत्या प्रयास गर्ने जस्ता गतिविधि देखाइरहेका छन् । साथै उनीहरूले नारावाजी गर्दै हिंसात्मक गतिविधि देखाएको सुरक्षाकर्मीले जनाए ।

सुधारगृह प्रमुख सुभद्रा गौतमका अनुसार सुधारगृह साँघुरो भएकाले स्थानान्तरण गर्न खोज्दा युवाहरू आक्रामक बनेका हुन् । हाल भैरहवाको सुधारगृहमा १०८ जना युवाहरू रहेका छन् ।

यसअघि पनि सुधारगृहभित्रका युवाहरू बाहिर निस्कने र लागूऔषध ओसारपोसार गर्ने गरेको खुलेको थियो । गत शनिबार पनि उनीहरूलाई लागूऔषध सप्लाइ गर्न रोक्न खोज्दा उनीहरू आक्रमण बनेका थिए । स्थानीयहरू भने होहल्ला भएको भन्दै सुधारगृहमा डेलिगेसन समेत गएका थिए ।

भैरहवा सुधारगृहमा हाल लागूऔषध लगायत विभिन्न मुद्दा खेपेका बालबालिकादेखि २५ वर्षसम्मका युवकहरू छन् । प्रमुख सुभद्रा गौतमका अनुसार सुधारगृहमा विशेषगरी १० जना युवाहरूले अराजक गतिविधिको नेतृत्व गर्दै आएका छन् ।