भारतबाट अवैध काठ तस्करी बढ्यो- लुम्बिनी - कान्तिपुर समाचार
कान्तिपुर वेबसाईट
AdvertisementAdvertisement

भारतबाट अवैध काठ तस्करी बढ्यो

प्रहरी चुनावमा खटिएपछि भारतबाट ठूलो परिमाणको अवैध काठ भित्रिएको आशंका 
कमल पन्थी

बर्दिया — प्रहरीले धर्म र गंगा बस्ती इलाकामा बेबारिसे अवस्थामा रहेका सालका गोलिया काठ शनिबार बरामद गरेको छ । सशस्त्र प्रहरी बलले मधुवन नगरपालिका–९ धर्म र गंगा बस्ती इलाकाबाट झन्डै १ सय ५० क्युफिट काठ बरामद गरेको हो ।

सशस्त्र प्रहरी निरीक्षक टीकाराम मैनालीका अनुसार लुकाई राखेको अवस्थामा फेला परेको काठ भारतबाट भित्रिएको आशंका छ । गुलरिया–१० मा भारतबाट ल्याई लुकाएको आशंकामा प्रहरीले शुक्रबार पनि सागुन जातका २५ क्युफिट काठ बरामद गरेको थियो । ती काठ स्थानीय सःमिलमा लैजान लागेको अवस्थामा पक्राउ गरिएको हो ।

सीमा सशस्त्र प्रहरी बल र नेपाल प्रहरी चुनावमा खटिएपछि भारतबाट ठूलो परिमाणको अवैध काठ भित्रिएको आशंका वनका कर्मचारीको छ । ती काठलाई वैधता दिन तस्कर लागिपरेका छन् । डिभिजन वन कार्यालयका सूचना अधिकारी एवं सहायक वन अधिकृत द्रोण शर्माले अवैध काठलाई वैधता दिन नमिल्ने बताए । उनले फेला परेको काठ जफत गरेर कानुनी कारबाहीको प्रक्रिया सुरु गरिएको बताए ।

काठ तस्करी बढेपछि प्रहरीले नियमित गस्ती गर्न थालेको छ । सीमा क्षेत्रमा रहेका सःमिल र काठ तस्करले रातको मौका छोपेर काठ भित्र्याउने गरेको सशस्त्र प्रहरी बलले जनाएको छ । सःमिल सञ्चालकका अनुसार भारतीय वनका कर्मचारीसँग मिलेर काठ भित्र्याउने गरिन्छ । भारत बहराइच जिल्लाअन्तर्गत कतरनिया वन्यजन्तु आरक्षणसँग नेपाली सीमा जोडिएको छ । वन रक्षाका लागि खटिएका मुन्सीबाटै रूख काट्न लगाउने र त्यसबापत उनले मोटो रकम लिने गरेको स्रोतको भनाइ छ । ‘रूख राति काटिन्छ । सीमामा तैनाथ एसएसबीको राति वनगस्ती नगरेको मौका छोपी मुन्सीले सहयोग गर्छन्,’ एक सःमिल सञ्चालकले भने, ‘उनीहरूकै सहयोगमा नेपाल भित्रिन्छ ।’ रूख काटेपछि जरासमेत उखेलेर माटोले पुर्ने गरेको समेत उनले बताए ।

प्रकाशित : जेष्ठ १५, २०७९ ०६:४०
प्रतिक्रिया
पठाउनुहोस्

गणतन्त्र दिवस मनाइँदै

रासस

काठमाडौँ — आज जेठ १५ गते । राज्यको सम्पूर्ण शक्ति जनतामा निहित हुने गरी सङ्घीय लोकतान्त्रिक गणतन्त्रात्मक शासन व्यवस्था प्रारम्भ भएको दिन अर्थात् गणतन्त्र दिवस । निरंकुश एकात्मक राजतन्त्रको विधिवत् अन्त्य गर्दै मुलुकमा सङ्घीय लोकतान्त्रिक गणतन्त्रात्मक शासन व्यवस्था प्रारम्भ घोषणा भएको दिन ।

जननिर्वाचित पहिलो संविधानसभाबाट २०६५ जेठ १५ गते निरंकुश राजतन्त्रको विधिवत् अन्त्य गर्दै नेपालमा सङ्घीय लोकतान्त्रिक गणतन्त्रात्मक शासन व्यवस्था प्रारम्भको घोषणा भएको थियो ।

हजारौँको बलिदान, लाखौँ नागरिक सडकमा उत्रिएर ल्याएको गणतन्त्र दिवस विभिन्न कार्यक्रम आयोजना गरी आज देशभर मनाइँदैछ । विसं २०६३ वैशाख ११ गते तत्कालीन राजा ज्ञानेन्द्रले आन्दोलनरत दलको मार्गचित्रबमोजिम विसं २०५९ जेठ ८ गते विघटन भएको संसद् पुनःस्थापना गरे ।

गणतन्त्र स्थापनाका लागि यही आन्दोलन जगका रूपमा स्थापित भयो । संसद् विघटनपछि सशस्त्र द्वन्द्वका कारण निर्वाचन हुन सकेन । निर्वाचन नभएपछि राजाले इच्छा लागेका मानिसलाई प्रधानमन्त्री बनाउने र हटाउने शृङ्खला चल्यो ।

राजा ज्ञानेन्द्रले लोकेन्द्रबहादुर चन्द, सूर्यबहादुर थापा र शेरबहादुर देउवा गरी तीन जनालाई प्रधानमन्त्री बनाउँदै हटाउँदै गरे । विसं २०६१ माघ १९ गते राजा ज्ञानेन्द्रले शासन सत्ता आफ्नै हातमा लिएपछि आन्दोलनरत सात दल र तत्कालीन सशस्त्र युद्धरत नेकपा (माओवादी)का बीच १२ बुँदे समझदारी भयो । पूर्ण लोकतन्त्र स्थापनाका लागि दुवै शक्तिबीच समझदारी भएको थियो ।

विसं २०६२ मङ्सिरमा १२ बुँदे समझदारीका माध्यमबाट तीन ध्रुवमा विभाजन भएका राजनीतिक शक्ति दुई ध्रुवमा आएपछि आन्दोलनले गति लियो । विसं २०६२ फागुनदेखि सुरु भएको निर्णायक आन्दोलनले चैतमा गति लियो ।

नयाँ वर्षसँगै लाखौँ जनता सडकमा आए । चक्रपथ मानवसागरले भरिएपछि राजा ज्ञानेन्द्र दलहरूको मार्गचित्रमा सहमत भए । आन्दोलनरत दलले गरेकै मस्यौदाका आधारमा राजा ज्ञानेन्द्रले वैशाख ११ गते राति संसद् पुनःस्थापनाको घोषणा गरी बैठकसमेत आह्वान गरे । यसैले यस दिनलाई लोकतन्त्र दिवस भनिन्छ । यो दिन नै गणतन्त्रको जगका रूपमा स्थापित बन्यो ।

विसं २०६३ जेठ ४ गतेको संसद्ले राजदरबारको अधिकार कटौती गर्दै राजसंस्थालाई निलम्बन गर्‍यो । बैठकले माओवादीलाई शान्ति प्रक्रियामा ल्याई संविधानसभा निर्वाचन गर्ने संकल्प प्रस्ताव पारित गरेको थियो । यसलाई नेपाली ‘म्याग्नाकार्टा’ पनि भनिन्छ ।

यसैको जगमा विसं २०६४ चैत २८ गते पहिलो संविधानसभा निर्वाचन भयो । संविधानसभाको २०६५ जेठ १५ गते बसेको पहिलो बैठकले २४० वर्षे राजसंस्थाको विधिवत् अन्त्य गर्‍यो । पहिलो संविधानसभाले संविधान जारी गर्न नसके पनि धेरै काम गरेको थियो ।

विसं २०७० मङ्सिर ४ गते सम्पन्न दोस्रो संविधानसभा निर्वाचनबाट निर्वाचित सभाले २०७२ असोज ३ गते सङ्घीय लोकतान्त्रिक गणतन्त्र नेपालको संविधान जारी भयो । संविधानबमोजिम तीनै तहको निर्वाचन सम्पन्न भई आन्दोलनको बलमा बनेको संविधान कार्यान्वयन भयो । जसअनुसार सङ्घीय, प्रादेशिक र स्थानीय सरकारले शासन सञ्चालन गरेका छन् ।

प्रकाशित : जेष्ठ १५, २०७९ ०६:३९
पूरा पढ्नुहोस्
प्रतिक्रिया
पठाउनुहोस्
×