निर्वाचनमा विपक्षीलाई सघाएको भन्दै बर्दिया एमालेद्वारा १८ जनामाथि कारबाही- लुम्बिनी - कान्तिपुर समाचार
कान्तिपुर वेबसाईट
AdvertisementAdvertisement

निर्वाचनमा विपक्षीलाई सघाएको भन्दै बर्दिया एमालेद्वारा १८ जनामाथि कारबाही

कमल पन्थी

बर्दिया — नेकपा एमालेले स्थानीय तह निर्वाचनमा प्रमुख लगायत अन्य पदको उम्मेदवारविरुद्ध भ्रम सिर्जना गरी मतदातालाई दिग्भ्रमित गर्दै पार्टीको निर्णयविपरीत विपक्षी पार्टीलाई सघाएको आरोपमा १८ पार्टी कार्यकर्तालाई कारबाही गरेको छ ।


तीमध्ये केही सदस्यलाई स्पष्टीकरण सोधिएको, केहीलाई निलम्बन गरिएको र केहीलाई पार्टीको साधरण सदस्य नरहने गरी कारबाही गरिएको एमाले जिल्ला कमिटी सचिव पदम ढकालले बताए ।

यसरी कारबाहीमा पर्नेमा अधिकांश बारबर्दिया र गुलरियाका एमालेका नेता र कार्यकर्ता छन् । बढैयाताल गाउँपालिकाको हकमा कारबाही प्रक्रिया चाँडै गरिने सचिव ढकालले बताए।

गुलरिया नगरका सहइन्चार्ज राम बहादुर रावललाई पार्टीको साधरण सदस्य नरहने गरी निस्कासन गरिएको एमालेले जनाएको छ । उनी ०७४ को स्थानीय निर्वाचनमा गुलरिया—४ बाट वडाध्यक्ष भएका थिए । यसैगरी नगर इन्चार्ज धनेश कुमार यादवलाई सचिवालय सदस्य र नगर इन्चार्जबाट मुक्त गरिनुका साथै जिल्ला कमिटी सदस्यबाट निलम्बन गरिएको छ ।

यस्तै नगर उपसभापति पुष्पा वली, जिल्ला कमिटी सदस्य हिरा बहादुर बिसी, जीवन पन्थी, पुनकला श्रीवास्तवलाई विभागीय जिम्मेवारीबाट मुक्त गरिएको सचिव ढकालले जनाए ।

जिल्ला कमिटीका सल्लाहकार शंकर घिमिरे लगायतलाई पदबाट मुक्त गरी स्पष्टीकरण सोध्ने निर्णय गरिएको पनि बताइएको छ । निलम्बित नगर इन्चार्ज यादवले भने झुठो आरोप लगाइ कारबाही गरिएका साथीहरुलाई एक पटक सोधपुछ नगरी कारबाही गरिएकोमा आपत्ति जनाउँदै त्यसविरुद्ध सशक्त विरोध गर्ने बताएका छन् ।

बिना प्रमाण कारबाही गर्नु न्यायोचित नभएको र पार्टीको विधान विपरीत भएकोले यसको उच्चस्तरीय छानबिन हुनुपर्ने उनको भनाइ छ । पार्टीका केन्द्रीय सदस्य एवं जिल्ला इन्चार्ज लक्ष्मण ज्ञवालीले कारबाही प्रक्रिया ठीक भएको भन्दै यो निर्णयबारे जिल्ला कार्यसमितिको बैठकले छलफल गरी अनुमोदन गर्ने जनाए ।

गुलरिया, बारबर्दिया नगरपालिका र बढैयाताल गाउँपालिकामा यसपटकको स्थानीय निर्वाचनमा नेकपा एमाले पराजित भएको थियो । पार्टीका जिल्लास्तरीय नेताले अन्तरघात भएकाले चुनावमा पराजित हुनु परेको दाबी गर्दै आएका छन् ।

प्रकाशित : जेष्ठ १०, २०७९ १७:१२
प्रतिक्रिया
पठाउनुहोस्

निर्वाचित प्रमुख र अध्यक्षलाई शपथ गराइयो

कमल पन्थी

(बर्दिया) — स्थानीय पालिका निर्वाचन सम्पन्न भएपछि शुक्रबार आठ पालिकाका प्रमुखलाई जिल्ला समन्वय समितिको सभाकक्षमा शपथ गराइएको छ । जिल्लाको आठ पालिकाका प्रमुखलाई मुख्य निर्वाचन अधिकृत लोकजंग शाहले शपथ गराएका हुन् ।

बर्दियामा गुलरिया, मधुवन, बारबर्दिया, ठाकुरबाबा नगरपालिका र गेरुवा गाउँपालिकामा कांग्रेसले नेतृत्व गरेको छ ।

यसै गरी राजापुर नगरपालिका र बढैयाताल गाउँपालिकामा माओवादी र बाँसगढी नगरपालिकामा एमालेले नेतृत्व गरेको छ ।

मुख्य निर्वाचन अधिकृतले प्रमुख र अध्यक्षलाई शपथ ग्रहणपछि शुक्रबार प्रमुख र अध्यक्षले सम्बन्धित पालिकामा उपप्रमुख, वडाअध्यक्षसहित सदस्यलाई शपथ ग्रहण गराउने कार्यक्रम रहेको छ । शपथ ग्रहणपछि सबै जनप्रतिनिधिले कार्यभार सम्हाल्नेछन् । बर्दियामा ७५ वडा रहेका छन् ।

प्रकाशित : जेष्ठ ६, २०७९ १२:०६
पूरा पढ्नुहोस्
प्रतिक्रिया
पठाउनुहोस्
×