पाल्पामा बन्द गराउँदै हिँड्ने सात जना पक्राउ - लुम्बिनी - कान्तिपुर समाचार
कान्तिपुर वेबसाईट
AdvertisementAdvertisement

पाल्पामा बन्द गराउँदै हिँड्ने सात जना पक्राउ 

माधव अर्याल

पाल्पा — पाल्पाको तानसेन बजार बन्द गराउँदै हिँडेका सात जनालाई प्रहरीले सोमबार अपरान्ह पक्राउ गरेको छ । मिलेनियम च्यालेन्ज कर्पोरेसन (एमसीसी) सम्झौता अनुमोदनविरुद्ध आयोजना गरेको नेपाल बन्द भन्दै बजारमा सवारी साधन अवरुद्ध गरेको आरोपमा उनीहरुलाई प्रहरीले पक्राउ गरेको जनाएको छ ।

तानसेन–तम्घास सडकमा केही समय प्रहरी र आन्दोलनकारीबीच विवाद भएको थियो । उनीहरु नारा लगाउँदै आन्दोलन चोकमा पुगेर कोणसभा गर्दै गर्दा उनीहरुलाई पक्राउ गरेको हो । पक्राउ पर्नेहरु राष्टिय जनमोर्चाका अध्यक्ष विशाल दर्लामी, जनमोर्चाकै कोषाध्यक्ष टीकाराम पौडेल, नेकपा माओवादी क्रान्तिकारीका जिल्ला सेक्रेटरी लीला श्रेष्ठ, नेकपा चन्द समूहका सेक्रेटरी भुवन जीसी, अनेरास्ववियू क्रान्तिकारी जिल्ला संयोजक सुदीप विक, चन्द समूहका युवा संगठन उपाध्यक्ष वेदप्रसाद विक र अनेरास्ववियू क्रान्तिकारीका जिल्ला अध्यक्ष लंक राना रहेका छन् ।

एमसीसीविरुद्धमा रहेका विभिन्न राजनितिक दलहरुले सोमबार बन्दको आह्वान गरेका थिए । सोही अनुसार पाल्पामा पनि बिहानैदेखि बन्द रहेको थियो । फाट्टफुट्ट सवारी साधन चले पनि बजार, पसल, उद्योग, बैंक तथा वित्तीय संस्था भने बन्द नै रहेको छ ।

सत्ता गठबन्धनले १२ बुँदे ‘व्याख्यात्मक घोषणा’ सहित आइतबार अमेरिकी सहयोग परियोजना मिलेनियम च्यालेन्ज कर्पोरेसन (एमसीसी) सँगको अनुदान सम्झौतालाई बहुमतले अनुमोदन गरेको छ । पक्राउ परेका सातै जनालाई जिल्ला प्रहरी कार्यालयमा राखिएको प्रहरी निरीक्षक तथा सूचना अधिकारी लक्ष्मण पचभैयाले जानकारी दिए ।

प्रकाशित : फाल्गुन १६, २०७८ १४:४४
प्रतिक्रिया
पठाउनुहोस्

पाकिस्तानको हिन्दु साधुबेलो मन्दिरमा नेपालको साइनो

कान्तिपुर संवाददाता

काठमाडौँ — पाकिस्तानी राज्य सिन्धको सक्कर सहरमा सिन्धु नदीको बीच टापुमा रहेको साधुबेलो मन्दिरबारे जानकारी पाएपछि नेपाली हिन्दु धर्माबलम्बी समेत भ्रमणमा जान थालेका छन् ।  

नेपालबाट सन् १८२३ मा गएका वनखण्डी महाराज साधुले स्थापना गरेको मानिने र जंगलमा साधुहरु बस्ने भएको हुनाले सिन्धी भाषामा ‘साधुको जंगलका रुपमा साधुबेलो नाम प्रचलनमा रहेको पाइएको छ । मन्दिर परिसरमा ८ वटा मन्दिर, पुस्तकालय, भोजनालय एवं तीर्थयात्री/योगीको अवासगृह रहेको हालै साधुबेलो भ्रमणमा पुगेर आएका इस्लामाबादस्थित नेपाली राजदूत तापस अधिकारीले बताएका छन् । उक्त मन्दिर राजधानी इस्लामाबादबाट करिब १ हजार किलोमिटरको दूरीमा रहेको छ ।

पाकिस्तानको स्वतन्त्रतापश्चात उक्त मन्दिरबाट महन्तहरु भारत गए पनि वर्षको एकपटक उक्त तीर्थस्थानमा आई औपचारिकरुपमा मन्दिर खोल्ने र पर्व मनाउने गरिएको छ । हाल उक्त मन्दिरको ११औं प्रमुख महन्तका रुपमा रहेका गौरीशंकर महाराज मुम्बईमा बस्ने र त्यहाँबाट साधुवेलो एव वनखण्डी महाराजका नाममा स्थापित डेड दर्जन जति धार्मिक, सांस्कृतिक, सामाजिक, शैक्षिक एव आध्यात्मिक संस्थाहरुको नेतृत्व गर्ने गरेका छन् ।

‘मन्दिरमा वनखण्डी महाराजको निर्वाणको दिन, शिवरात्री, होली, रामनवमी, कृष्णाष्टमी आदिका दिन ठूलो मेला लाग्ने हुनाले उक्त अवसरमा श्रद्धालुहरुको जमघट हुने गरेको रहेछ’,भ्रमणपछि राजदूत अधिकारीले भने । पाकिस्तान सरकारको अल्पसंख्यक धार्मिक स्थल संरक्षण गर्न स्थापना भएको संस्था ‘इभाक्युयी ट्रस्ट प्रोपर्टी बोर्ड’ले मन्दिर परिसरको सरसफाइ र संरक्षण गर्ने गरेको र नित्य पूजाआजाको प्रबन्ध गरेको जनाइएको छ ।

साधुबेलो धामका वर्तमान महन्त गौरी शंकर महाराजका अनुसार, इतिहासमा वनखण्डी महाराज नेपालको मोरङमा धुनी जगाएर तपस्या गरी बसेको र यो स्थान हाल सुनसरी जिल्लामा अखण्ड धुनी रहेको रामधुनी स्थल रहेको जानकारी दिइएको छ । विराटनगरको देवकोटा चोकमा समेत वनखण्डी महादेवको मन्दिर रहेको छ जुन वनखण्डी महाराजले स्थापना गरेको मानिन्छ ।

‘पाकिस्तानी हिन्दुहरु एवं त्यहाँबाट संसारका विभिन्न स्थानमा गएर बसेका हिन्दुको यो आस्था सम्बन्धित यात्रालाई व्यवस्थित गर्न सकेमा नेपालको धार्मिक पर्यटनमा एक नयाँ अध्याय थपिने देखिन्छ,’राजदूत अधिकारीले भने ।

प्रकाशित : फाल्गुन १६, २०७८ १४:३९
पूरा पढ्नुहोस्
प्रतिक्रिया
पठाउनुहोस्
x
×