वीरगन्जमा राजस्व छली आरोपमा ठूलो परिमाणमा कपडा बरामद

भन्सार अधिकृत तेजबहादुर रावल नेतृत्वको टोलीले करिब २ बजेको समयमा केरियर्सको गोदाममा छापा मारेको थियो । ‘चोरी पैठारी गरी गोदाममा कपडा राखेको सूचनाको आधारमा छापा मारेका हौं,’ भन्सार अधिकृत रावलले भने, ‘कपडासँगै अन्य सामान पनि गोदामबाट बरामद भएका छन् ।’

स्रोतका अनुसार भन्सार प्रशासकलाई चोरी पैठारी गरी ठूलो परिमाणमा कपडा भण्डारण गरिएको सूचना पाएपछि टोली परिचालन गरिएको थियो । ‘बरामद गरिएका सबै सामान चोरी पैठारीकै हुन् भन्न सकिन्न, यसमा अनुसन्धान हुन्छ,’ भन्सार अधिकृत रावलले भने, ‘सामान जेनयुन पनि हुन सक्छन् । भन्सार राजस्व छली कपडा भित्र्याएको सूचनाको आधारमा छापामारी गरेका हौं ।’

केरियर्स सञ्चालकले बरामद गरिएका सामानको बिलविजक पेस गरेका छन् । ‘केरियर्स सञ्चालकले बिलविजक पेस गरेका छन्,’ रावलले भने, ‘बिलमात्र भएर हुँदैन । सामान आएको स्रोत हेर्नुपर्‍यो, भन्सार पज्ञापनपत्र हेर्नुपर्‍यो ।’ उनका अनुसार प्रज्ञापनपत्र बनेपछि मात्र हो बिल काट्ने ।

जय माँ दुर्गा रोड केरियर्सका अनुप शर्माले गोदाममा रहेका सामानहरु जेनयुन रहेको दाबी गरे । ‘सामानको बिलविजक हामीसँग छ,’ उनले भने, ‘गोदामबाट बरामद गरिएका सामान चोरी पैठारीका हैनन् ।’