त्रिवेणी गाउँपालिकामा स्कुलले विद्यार्थीको स्वास्थ्य जाँच गर्न नर्स नियुक्त- लुम्बिनी - कान्तिपुर समाचार

त्रिवेणी गाउँपालिकामा स्कुलले विद्यार्थीको स्वास्थ्य जाँच गर्न नर्स नियुक्त

महिनावारी हुने उमेरका छात्राहरूले नर्ससँग आफ्ना समस्या सजिलै सुनाउने गर्छन्
काशीराम डाँगी

रोल्पा — विद्यार्थी र शिक्षकको स्वास्थ्य जाँच गर्न तथा स्वास्थ्य ज्ञान फैलाउन पश्चिमी रोल्पास्थित त्रिवेणी गाउँपालिकाले हरेक माध्यमिक विद्यालयमा नर्स नियुक्त गरेको छ । शिक्षक र कर्मचारीको स्वास्थ्य अवस्था सही भएमा शैक्षिक अवस्था सुध्रने उद्देश्यले नर्स नियुक्त गरिएको गाउँपालिकाले जनाएको छ ।

गाउँपालिकामा हाल १२ वटा माध्यमिक विद्यालय छन् । शैक्षिक सुधार अभियान सफल बनाउन प्रारम्भिक अवस्थादेखि नै गाउँपालिकाले विद्यालय स्वास्थ्य कार्यक्रम चलाउँदै आएको छ । प्रमुख प्रशासकीय अधिकृत निमबहादुर केसीका अनुसार विद्यालय स्वास्थ्य कार्यक्रमअन्तर्गत कक्षा कोठाहरूमा स्वास्थ्य विषयका शिक्षकका अतिरिक्त नर्सले स्वास्थ्य अवस्थाबारे चेतना बाँड्ने छन् ।

व्यक्तिगत स्वास्थ्यप्रति ध्यान पुर्‍याउनुका साथै विद्यालयको बाहिरी अवस्थाप्रति सचेत बनाउन समेत उनीहरूले कार्य गर्छन् । कार्यविधि निर्माण गरेर प्रतिस्पर्धाका आधारमा पहिलो चरणमा माध्यमिक विद्यालय तहमा मात्रै नर्स नियुक्त गरिएको केसीले बताए ।

नर्सहरूले विद्यालयका विद्यार्थी, शिक्षक र अभिभावकको पनि नियमित स्वास्थ्य जाँच गर्छन् । सामान्य अवस्थाकालाई विद्यालयमै उपचार गर्ने प्रबन्ध मिलाइएको छ भने जटिल अवस्था आएमा स्वास्थ्य संस्थामा जान सुझाव दिने गरिएको छ । नर्स नियुक्तिसँगै उनीहरूसँग विद्यार्थीहरूले आफ्ना समस्या नलुकाई भन्ने गरेको पाइएको गाउँपालिकाका सूचना अधिकारी भरत डीसीले बताए ।

साथै नर्ससँग महिनावारी हुने उमेर पुगेका छात्राहरूले आफ्ना समस्या सजिलै भन्ने गरेको पनि पाइएको छ। यस्तै नर्स मार्फत् विद्यालयले निःशुल्क रुपमा महिनावारी प्याड वितरण गर्ने गरेकाले सजिलो भएको छात्राहरूले बताएका छन् ।

माध्यमिक विद्यालयमा विद्यालय नर्स तथा आधारभुत विद्यालय र प्राथमिक विद्यालयमा महिला शिक्षिकालाई स्वास्थ्य फोकल पर्सन छनोट गरिएको हो । नर्स र महिला शिक्षिका समक्ष किशोरकिशोरीहरूले आफ्ना समस्या खुलस्त राख्ने गरेका छन् ।

विद्यालय नर्स कार्यक्रम संचालन गरेपछि कोभिडका बारेमा जानकारी दिन समेत सजिलो भएको जनजागृति माध्यमिक विद्यालयका प्रधानाध्यापक जीवराज भण्डारीले बताए ।

उनले शिक्षक र विद्यार्थीलाई स्वास्थ्य अवस्था र कोभिड सम्बन्धी जानकारी गराउन नर्सलाई खटाइएको बताए । गाउँपालिकाले यस्तो अभियान थालेकामा विद्यालयमा निकै फाइदा पुगेको उनले बताए ।

उक्त गाउँपालिकामा १२ वटा माध्यमिकसहित आधारभुत ८ वटा र प्राथमिक विद्यालय १८ वटा छन् । गाउँपालिकाले यहाँका करिब एक दर्जन निजी विद्यालयलाई सामुदायिकमा गाभिसकेको छ । अब उक्त गाउँपालिकामा कुनै पनि निजी विद्यालय छैनन् । गाउँपालिकाका अध्यक्ष शान्तकुमार वलीले सबै सामुदायिक विद्यालयको शैक्षिक अवस्था सुधार गर्ने योजना चलाइरहेको बताए ।

प्रकाशित : माघ १४, २०७८ १९:४८
प्रतिक्रिया
पठाउनुहोस्

खर्च गर्ने सरकारलाई नै बढी बजेट : अर्थमन्त्री शर्मा

कान्तिपुर संवाददाता

काठमाडौँ — अर्थमन्त्री जनार्दन शर्माले जुन तहको सरकारले सबैभन्दा बढी खर्च गर्न सक्छ त्यसलाई नै बढी बजेटको व्यवस्था गर्ने बताएका छन् । शुक्रबार अर्थ विषयक विषयगत समितिको भर्चुअल बैठकमा उनले भने ‘सबभन्दा बढी जसले सेवा दियो त्यहीं राम्रो सरकार, जसले सबभन्दा बढी खर्च गर्न सक्यो त्यसैको लागि बजेट थप गर्ने व्यवस्था मैले घोषणा गरेको छु ।’

कोभिड महामारीमा स्थानीय र प्रदेश सरकारले बढी काम गरेको उल्लेख गर्दै उनले तल्ला सरकारले गरेका असल कामको अङ्गिकार गरेर जानुपर्नेमा जोड दिए । उनले भने ‘खर्च गरेर अपुग भएमा थप बजेट माग गर्दा हामीले यहाँ बाँडिएको बजेट फिर्ता लिएर भए पनि दिन सक्ने अवस्थामा हुनेछौँ ।’

त्यस्तै शर्माले प्रदेश सरकारका मागलाई आगामी दिनमा नीतिगत रूपमा सम्बोधन गर्दै लैजाने विश्वास दिलाए । ‘जे जति अहिले बजेट प्राप्त भएको छ, त्यसमा नै ध्यान दिएर खर्च गर्न अनुरोध छ’, उनले भने ‘तपाईंहरूले उठाउनुभएका विषयबारे योजना आयोग, राष्ट्र बैंक लगायतसँग बसेर थप छलफल गर्नेछौं ।’ मन्त्री शर्माले समृद्धिका लागि उत्पादन र पुँजी निर्माणमा ध्यान दिनुपर्ने आवश्यकता औंल्याए । उनले योजनाको दोहोरोपन हुने गरेको भन्दै त्यसलाई नीति निर्माण गरेरै समाधान गर्नुपर्ने बताए ।

संघ, प्रदेश र स्थानीय तह (समन्वय र अन्तरसम्बन्ध) ऐन, २०७७ दफा (२२) अन्तर्गत गठित समितिको पहिलो बैठकमा सातै प्रदेशका आर्थिक मामिला तथा योजना मन्त्रीको सहभागिता थियो । बैठकमा उनीहरुले नीति र कर्मचारीको अभाव, योजनामा दोहोरोपन, विस्तृत अध्ययनविनाका योजना, संघ र प्रदेशबीचको अविश्वास, स्रोत साधनमा अधिकारको कमीलगायतका समस्याका कारण बजेट कार्यान्वयन सन्तोषजनक रूपमा गर्न नसकिएको बताए ।

प्रकाशित : माघ १४, २०७८ १९:२८
पूरा पढ्नुहोस्
प्रतिक्रिया
पठाउनुहोस्
×