५ बुँदे घोषणपत्र जारी गर्दै सकियो प्रदेश सभामुखहरुकाे भेला
कास्की — सात प्रदेशका सभामुख र उपसभामुखहरुको भेला ५ बुँदे घोषणपत्र जारी गर्दै आइतबार सकिएको छ । चार दिनसम्म चलेको भेलाले राष्ट्रियसभाका अध्यक्ष गणेशप्रसाद तिमिल्सिना, उपाध्यक्ष शशीकुमारी दाहाल, संविधानसभाका अध्यक्ष सुवास नेम्वाङ, गण्डकी प्रदेश प्रमुख अमिक शेरचन र गण्डकी प्रदेशका मुख्यमन्त्री पृथ्वीसुव्वा गुरुङको उपस्थितिमा घोषणपत्र जारी गरेको हो ।
जारी घोषणापत्रमा अन्तर प्रदेशसभा अनुभव आदान प्रदान गर्ने, सभाहरुबीच पारस्परिक सिकाई, साझा सवालहरुको पहिचान तथा निरुपणका लागि मतैक्यका निर्माण गर्ने सभाका काम कारवाहीलाई थप प्रभावकारी बनाउने उल्लेख छ ।
त्यस्तै संघीय संसद राष्ट्रियसभाको समन्वय र संयोजनमा यस्ता कार्यक्रमलाई निरन्तरता दिर्ने, संघ, प्रदेश र स्थानीय तह (अन्तर सम्बन्ध व्यवस्थापन) विधेयक राष्ट्रियसभाको विधायन व्यवस्थापन समितिमा विचाराधीन रहेको सन्दर्भमा संघीय संसद र प्रदेशसभाबीच नियमित तथा प्रभावकारी समन्वयका लागि उपयुक्त कानुनी व्यवस्था गर्न संघीय संसदसंग संवाद तथा परामर्श गर्ने उल्लेख छ ।
प्रदेशसभा भवन निर्माणका लागि जग्गा प्राप्तिमा रहेको समस्या समाधान गर्न आवश्यक पहल गर्ने, सभा भवन अत्याधुनिक तथा प्रविधिमैत्री बनाउने, प्रदेश कार्यपालिकालाई व्यवस्थापिकामार्फत जनताप्रति अझ बढी जवाफदेही र उत्तरदायी बनाउन आ–आफ्नो स्थानबाट प्रभावकारी भूमिका खेल्ने घोषणापत्रमा उल्लेख छ ।
गण्डकी प्रदेशसभा सचिवालयले आयोजना गरेको अन्तर प्रदेशसभा अनुभव आदानप्रदान कार्यक्रममा सातै प्रदेशका सभामुख र उपसभामुखको सहभागिता थियो ।
प्रकाशित : मंसिर २२, २०७६ १६:५२