भुस पोल्न बिदा

प्रकाश बराल

बागलुङ — यहाँको ताराखोला गाउँपालिकाले भुस पोल्ने मेलाको अवसरमा सार्वजनिक बिदा दिएको छ । ताराखोलामा यो पर्वलाई ठूलो महत्वका साथ लिइन्छ ।

ZenTravel

प्रमुख प्रशासकीय अधिकृत रामप्रसाद शर्माले सार्वजनिक सूचना प्रकाशित गरेर कात्तिक २६ गते मंगलबार सार्वजनिक बिदा दिएको जनाएका हुन् । यहाँका मगर समुदायले आफ्नो इतिहास सम्झाउने गरी हरेक वर्ष भुस पोल्ने मेला गर्दै आएका छन् ।

Meroghar


ताराखोला गाउँपालिका २ अर्गलमा वर्षौअघि बसाई सरेर आएको समयको स्मरणमा उनीहरुले हरेक वर्ष यो पर्व मनाउँदै आएका हुन् ।

पाल्पाको अर्गलीबाट बसाई सरेर आएर मगरहरु बसोबास गर्न थालेपछि यो गाउँको नाम समेत अर्गल रहेको अनुमान छ । आएका मगरले खोरिया फाँडेर झारपात पोलेको सम्झनामा हरेक वर्ष कात्तिक अन्तिम साता यो मेला लाग्ने गर्छ । अर्गली मगर समुदायका सदस्यले घामको झुल्को सँगै विधिवत पूजा गरेर भुस पोल्न सुरु गर्छन् ।

यो पर्वको अवसरमा वर्षभरी निधन भएकाहरुको सम्झनामा श्राद्ध गर्छन् । यो पूजा गरेपछि हिउँदे अन्नबाली लगाउने समय सुरु भएको विश्वास गरिन्छ । अर्गली पूजा र भुस पोलेपछि धान काट्ने समय सुरु हुने गाउँपालिका अध्यक्ष प्रकाश घर्तीले बताए । भुस पोल्ने र खेतबारी खन्ने काममा युवायुवतीहरुले हानथाप गर्छन् ।

यो पर्वका लागि गाउँभरीका मानिस जम्मा हुन्छन् । खेतबारी खनेर भुस पोलेपछि सबै मिलेर गाउँने र नाच्ने काम पनि गर्छन् ।

प्रकाशित : कार्तिक २४, २०७६ १७:४४
ADVERTISEMENT
प्रतिक्रिया
पठाउनुहोस्

‘आलमलाई जिल्ला प्रहरीकै टोलीले पक्राउ गरेको हो’

शिव पुरी

रौतहट — राजपुर फरदहवा बमकाण्डको मुद्दा अदालतमा थुनछेक बहस चलिरहेको अवस्थामा केही अनलाइन र न्यूज पोर्टलले अत्यन्त भ्रामक तथ्यहीन, कपोकल्पित समाचार सम्प्रेषण गरी विचाराधीन मुद्दालाई प्रभावमा पर्ने मनसाय राखेको भन्दै जिल्ला प्रहरी कार्यालय रौतहटले विज्ञप्ति निकाली खण्डन गरेको छ ।

प्रहरीले १२ वर्षअघि पहिलो संविधानसभा निर्वाचनका बेला घटेको बम विस्फोट प्रकरणमा मुछिएका कांग्रेस नेता एवं पूर्वमन्त्री मोहम्मद अफताब आलमको पक्राउको विषयलाई लिएर केही मिडियाले भ्रामक, तथ्यहीन र कपोलकल्पित समाचार सम्प्रेषण गरेको भन्दै ध्यानाकर्षण भएको जनाएको छ ।

‘यति गम्भीर मुद्दामा आधारहीन समाचार प्रकाशित गरेर ती अनलाइनले सम्मानित जिल्ला अदालत रौतहटमा विचाराधीन मुद्दालाई प्रभावित तुल्याउने कुत्सित मनसाय राखेको देखिन्छ,’ शनिबार निकालिएको विज्ञप्तिमा भनिएको छ, ‘गैर जिम्मेवारी बनेर भ्रमपूर्ण समाचार प्रकाशित गर्ने कार्य जारी रहेमा त्यस्ता सचारमाध्यम वा व्यक्ति विरुद्ध सम्बन्धित निकाय मार्फत् कानुनी उपचार खोजिने छ ।’

बहाल कानुन र विभागीय नीति, निर्देशन बमोजिम जिल्ला प्रहरीको क्षेत्राधिकारभित्र रहेकाले आलमलाई पक्राउ गरेको घामजत्तिकै छर्लंङ रहेको विज्ञप्तिमा उल्लेख गरिएको छ ।

आलम विरुद्ध मंगलबारदेखि अदालतमा थुनछेक बहस चलिरहेको छ । गत असोज २६ गते आलमलाई जिल्ला प्रहरी कार्यालय रौतहटले पक्राउ गरेको थियो ।

आलमलाई रौतहट प्रहरी प्रमुख एसपी भुपेन्द्र खत्रीले नभएर प्रहरी प्रधान कार्यालयको टोलीले पक्राउ गरेको दाबी गर्दै उनीमाथि विभिन्न आरोप लगाउँदै समाचार सम्प्रेषण भएपछि रौतहट प्रहरीले त्यसको खण्डन गरेको हो ।

प्रकाशित : कार्तिक २४, २०७६ १७:२२
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
×