सिङ्गो गाउँमा अर्गानिक तरकारी

कान्तिपुर संवाददाता

(दमौली) — तनहुँको व्यास नगरपालिका–१४ को सिंगो गाउँमा अर्गानिक तरकारी खेती हुने गरेको छ । केही वर्षअघिसम्म बजारबाट तरकारी ल्याएर खाने स्थानीय यतिबेला भने बारीमा अर्गानिक तरकारी खेती गर्न थालेका हुन् । 

तनहुँको व्यास–१४ को कुलुङमा अर्गानिक गोलभेंडाको टनेल । तस्बिर : प्रताप रानामगर/कान्तिपुर

मौसमी तथा बेमौसमी अर्गानिक तरकारी खेती गर्दै आएको कुलुङ गाउँकी श्रीमाया आले बताइन् । ‘गाउँका सबै किसानले अर्गानिक तरकारी खेती गर्न थालेका छौं,’ उनले भनिन्, ‘विषादीमुक्त गाउँ बनाउने अभियान चलाएका हौं ।’ जनप्रतिनिधि आएपछि तरकारी लाउनुपर्छ भनेर तालिम दिएकाले व्यवस्थित रूपमा तरकारी खेती गर्न सुरु गरेको आलेले बताइन् । वडाले तरकारी खेतीबारे तालिम दिएको थियो ।

टनेलमा गोलभेंडा खेती पनि गरिएको छ । काउली, बन्दा, घिरौंला, चिचिन्डा, करेलो, भिन्डीलगायत तरकारी उत्पादन गर्दै आएको उनले बताइन् । ‘गाउँलेले होमस्टे पनि सञ्चालन गरेका छन्,’ उनले भनिन् ‘होमस्टेमा आउने पाहुनाले पनि अर्गानिक तरकारी खान मन पराउँछन् ।’ यहाँ उत्पादित तरकारी गाउँमै बिक्री हुन्छ । बढी भएको तरकारी दमौली र डुम्रे बजारमा बिक्री हुने स्थानीयले बताए ।

अर्गानिक तरकारी खेती प्रभावकारी भए पनि रोग लाग्ने गरेको छ । कृषि प्राविधिकको समस्या भएको छ । समयमा प्राविधिक नभएकाले समस्या भएको किसानले बताए । वडाका आधा दर्जन गाउँमा अर्गानिक तरकारी खेती गरेको वडा कार्यालयले जनाएको छ । कुलुङ, सोधेर, रुम्सी बेलडाडाँ, बेलभज्याङमा अगार्निक तरकरी खेती गरेको वडाध्यक्ष काजीमान श्रेष्ठले बताए । उनका अनुसार वडाले अर्गानिक खेती गर्न अनुदानको व्यवस्था गरेको छ । तालिम र टनेलका लागि शतप्रतिशत किसानलाई अनुदान दिएपछि किसान अर्गानिक खेतीमा होमिएको उनले बताए । अनुदानमा वडा कार्यालयले एक लाख रुपैयाँ खर्च गरेको छ । दैनिक ५ क्विन्टल तरकारी उत्पादन हुन्छ । दसैं र तिहारको बीचमा सबैलाई पायक पर्ने ठाउँमा तरकारी संकलन केन्द्र बनाउने तयारी गरेको श्रेष्ठले बताए । होमस्टे, मानव स्वाथ्य, आर्यआर्जनलाई मध्यनजर गरेर किसानलाई अर्गानिक तरकारी खेतीका लागि अनुदानको व्यवस्था गरेको हो । यहाँका एक सय २० घरधुरीले व्यावसायिक अर्गानिक तरकारी खेती गर्दै आइरहेका छन् ।

प्रकाशित : आश्विन ५, २०७६ १०:०८
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

शीतभण्डार बन्दै

कान्तिपुर संवाददाता

(गण्डकी) — स्याङ्जाको पुतलीबजार नगरपालिका–११ जैसीडाँडामा करीव ८ करोडको लागतमा व्यवस्थित शीतभण्डारको निर्माण कार्य पुन: सुरु भएको छ । बजेट अभावमा निर्माण रोकिएकोमा सहकारी विभाग र गण्डकी प्रदेश सरकारले बनाउन लागेका हुन् । 

स्याङ्जा शीतभण्डार सहकारी संस्थाको पहल र सहकारी विभाग तथा प्रदेशको भूमि व्यवस्था, कृषि तथा सहकारी मन्त्रालयको आर्थिक सहयोगमा निर्माण कार्य सुरु गरिएको जिल्ला सहकारी संघका अध्यक्ष लक्ष्मीपति पौडेलले बताए । शीतभण्डार एक हजार मेट्रिक टन क्षमताको हुनेछ । ७ करोड ७३ लाख रुपैयाँको लागतमा शीतभण्डार बन्ने उनले बताए ।

सहकारी विभागबाट प्राप्त २ करोड ५० लाखमध्ये ४० प्रतिशत अर्थात् १ करोड ६६ लाख रुपैयाँ शीतभण्डार सहकारीले लगानी गर्नुपर्ने छ । प्रदेशको कृषि तथा सहकारी मन्त्रालयबाट प्राप्त हुने २ करोड ५० लाखमध्ये ३० प्रतिशत अर्थात् १ करोड ७ लाख रुपैयाँ पनि शीतभण्डार सहकारीले नै जुटाउनुपर्छ ।

संघीय मन्त्रालय र प्रदेश मन्त्रालयबाट प्राप्त हुने छुट्टाछुट्टै रकमको कामसमेत बाँडफाँड गरिएको संघका अध्यक्ष पौडेलले जानकारी दिए । स्याङ्जा शीतभण्डार सहकारीमा जिल्लाका १ सय ४ सहकारी संस्था तथा पुतलीबजार, भीरकोट र गल्याङ नगरपालिका सेयर सदस्य छन् । १० रोपनी क्षेत्रफलमा निर्माणाधीन उक्त शीतभण्डारमा सुन्तला, अदुवा, आलु तथा तरकारी राख्ने योजना सहकारीको छ ।

स्याङ्जामा शीतभण्डार नहुँदा त्यहाँका किसानले उत्पादन गरेको सामग्री बुटवल, भैरहवा, नवलपरासी र चितवनसम्म लगेर सस्तो मूल्यमा बेच्न बाध्य छन् । जिल्लामै शीतभण्डारको निर्माण भएपछि किसानले श्रमअनुसारको मूल्य पाउने भीरकोट नगरपालिका–६ का किसान मिनप्रसाद कोइराला बताउँछन् । ‘घरमा करिब ३५ लाखको सुन्तला उत्पादन गरेको छु । जिल्लामा शीतभण्डार छैन, राख्ने ठाउँको अभाव भएकाले कुहिन्छन् कि भनेर बेलैमा सस्तो मूल्यमा बेच्नुपर्ने बाध्यता छ,’ कोइरालाले भने ।

प्रकाशित : आश्विन ५, २०७६ १०:०७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT