डेंगु सचेतना अभियान

डेंगुको संक्रमण देखिएपछि जिल्ला स्वास्थ्य कार्यालञयले स्वास्थ्यचौकी, विद्यालय, सामुदायिक भवन, चोक र चौतारमा सचेतना कार्यक्रम गर्दै 
कान्तिपुर संवाददाता

पर्वत — डेंगु रोगको संक्रमण देखिन थालेपछि जिल्ला स्वास्थ्य कार्यालयले सचेतना कार्यक्रम थालेको छ । जिल्ला स्वास्थ्यले सबैजसो सरकारी कार्यालय र सर्वसाधारणको पहुँच हुने स्थानमा डेंगुबारेको सचेतना अभियान सञ्चालन गर्न सुरु गरेको हो । 

अभियानअन्तर्गत गाउँका स्वास्थ्यचौकी, विद्यालय, सामुदायिक भवन, चोक, चौतारा सबैतिर डेंगुबारेको सचेतना फैलाउन थालिएको कार्यालयले जनाएको छ ।

स्वास्थ्य अधिकृत प्रवीण भण्डारीका अनुसार डेंगुबारेको सामान्य ज्ञान सर्वसाधारणमा हुन आवश्यक रहेकाले सचेतनामूलक कार्यक्रम सञ्चालन गरिएको हो । कार्यालयले सचेतनामूलक ब्रोसर, स्थानीय सञ्चारमाध्यम, सामाजिक सञ्जाल सबैतिरबाट डेंगुको सम्भावित संक्रमण, लामखुट्टेको टोकाइबाट बच्ने उपायबारे जानकारी दिन थालेको हो ।

अर्का स्वास्थ्य अधिकृत दीपक भण्डारीले डेंगुबाट बच्न पानी जम्ने भाँडाकुँडा सफा राख्न, खाल्टाखुल्टी पुर्न र सम्भावित सामान्य लक्षण भए स्वास्थ्य संस्थामा तत्कालै सम्पर्क राख्न सूचना जारी गरिएको बताए । उनका अनुसार अहिले जिल्ला प्रहरी, सामुदायिक प्रहरी, ट्राफिक प्रहरीलगायत समुदायसँग प्रत्यक्ष सरोकार राख्ने व्यक्तिलाई डेंगुबारे प्रशिक्षण चलाइएको छ ।

‘पहिला पर्वतमा यसको कुनै गुञ्जायस थिएन,’ भण्डारीले भने, ‘जिल्लामा लक्षण देखिएपछि सबैतिर सचेत गराउनुपरेको हो ।’ डेंगु सार्ने लामखुट्टेले बालबालिका र वृद्धवृद्धालाई बढी टोक्न सक्ने भएकाले उनीहरूलाई लक्षित गरी सचेतना अभियान सञ्चालन गरिएको हो । जिल्ला अस्पतालमा हालसम्म डेंगुको संक्रमण पहिचान गर्ने सामान्य उपकरण (रगत परीक्षण किट) नहुँदा समस्या थियो ।

‘गतसातादेखि जिल्लामै डेंगुको परीक्षण किट ल्याएका छौं,’ अस्पताल विकास समितिका अध्यक्ष गोविन्द पहाडीले भने, ‘अब डेंगु हो होइन भन्ने जान्नकै लागि पोखरा पुग्नुपर्दैन ।’ गण्डकी प्रदेशको स्वास्थ्य निर्देशनालयबाट सय थान किट ल्याएर परीक्षण सुरु गरिएको हो ।

अस्पतालका डाक्टर विष्णु भण्डारीका अनुसार किट ल्याइसकेपछिपरीक्षण गरिएका बिरामीमा हालसम्म डेंगुको लक्षण भने भेटिएको छैन । ‘पहिला हामीले नै रेफर गरेका केही बिरामीलाई त्यस्तो लक्षण देखियो,’ डा. भण्डारीले भने, ‘यहीं परीक्षण सुरु गरेयता सबै नेगेटिभ भेटिएको छ ।’ यता बिरामीले डेंगुको परीक्षण निःशुल्क हुनुपर्नेमा अस्पतालले शुल्क लिने गरेको गुनासो गरेका छन् ।

सरकारले निःशुल्क घोषणा गरेकोपरीक्षणको शुल्क लिएर अन्याय गरेको बिरामीले गुनासो गरेका छन् । अस्पताल प्रशासनले भने सरकारले निःशुल्क घोषणा गरेपछि शुल्क नलिएको जनाएको छ । ‘हामीकहाँ समस्या देखिए लगत्तै किट माग्यौं । निर्देशनालयबाट नदिएपछि किनेर ल्याएका थियौं,’ अस्पतालका निमित्त मेडिकल सुपरिटेन्डेन्ट डा. शिशिर देवकोटाले भने, ‘हामीले किनेको मूल्य लिएर परीक्षण गरेका हौं । हाल निःशुल्क परीक्षण थालेका छौं ।’ अस्पताल विकास समितिका अध्यक्ष गोविन्द पहाडीले आइतबारदेखि डेंगुको परीक्षण सुरु भइसकेको बताए ।

प्रकाशित : भाद्र २४, २०७६ १०:०९
प्रतिक्रिया
पठाउनुहोस्

इन्द्रजात्राको लिंगो ठड्याइयाे, विधिवत रुपमा इन्द्रजात्रा सुरु [तस्बिरहरु]

तस्बिर : इलिट जोशी

काठमाडौँ — इन्द्रजात्रा महोत्सव मनाउन हनुमानढोका दरबार परिसरमा कालभैरवको विशाल मूर्तिअगाडि मंगलबार इन्द्रध्वजासहितको लिंगो ठड्याइएको छ । अब राजधानीमा विभिन्न कार्यक्रमसहित एक सातासम्म इन्द्रजात्रा महोत्सव मनाइन्छ ।

करिब ३२ हातको लिंगोमा इन्द्रध्वजा राखी सांस्कृतिक बाजागाजा, बैन्डबाजा र पञ्चैबाजा बजाएर मंगलबार बिहान ९ बजेर १७ मिनेटको शुभ साइतमा लिंगो ठड्याइएको थियो । नेपालभाषामा 'योसीं' भनिने उक्त लिंगोमा विभिन्न प्रकारका मंगल सूचक चिह्नहरू अंकित पताकाहरू झुन्ड्याइएको थियो । लिंगोको फेदीमा हात्ती चढेको इन्द्रको सानो प्रतिमा राखी पूजाअर्चना गरिएको थियो । लिंगो ठड्याएपछि सैनिकहरूले बन्दुक पड्काएर बढाइँ गरेका थिए । त्यसपछि गुरुजुको पल्टन, पञ्चैबाजा, बैन्डबाजा, मानन्धरहरूका क्वँचाः खीं बाजा मा मालश्रीको धुन बजाउँदै लिंगो परिक्रमा गरेका थिए ।

समारोहस्थलमा किलाघः टोलका ज्यापू समुदायले परम्परागत देवीनाच प्रस्तुत गरेको थियो । साथै, राजप्रतिनिधिका रूपमा राजखड्ग ल्याइएको थियो । लिंगो ठड्याएको हेर्न निकै संख्यामा विदेशी पर्यटकसमेत भेला भएका थिए ।राजधानीदेखि पूर्वमा पर्ने नाला भन्ज्याङको सल्लेरी वनबाट तानेर ल्याइएको उक्त लिंगोलाई बाजागाजासाथ तानेर त्यहाँ पुर्‍याइएको थियो । इन्द्रजात्राको अवसरमा लिंगो ठड्याउने परम्परा राजा सिंहप्रताप शाहलेचलाएका थिए ।

लिंगो ठड्याएको ठाउँसँगै रहेको इन्द्रपुरको मन्दिरको माथिल्लो तलामा सुनको इन्द्रेश्वर महादेवको मूर्ति र हनुमानढोका दरबारसँगै सुनको मोलम्मा लगाइएको श्वेत भैरव (सरभ मुख) को विशाल प्रतिमा पनि प्रदर्शनका लागि राखिएका थियो । साथै काष्ठमण्डप (मरुसत्तल) अगाडि अग्लो डबली बनाई त्यसमाथि खटमा इन्द्रको मूर्तिलाई डोरीले बाँधेर प्रदर्शनका लागि राखिएको थियो ।इन्द्रजात्रा मनाउन कुमारीघर, मरुसत्तल, सिंल्यँ सत्तल, हनुमानढोका दरबार लगायत मन्दिरमा रङरोगन लगाई नयाँ झल्लर राखी सिंगारिएको छ ।इन्द्रचोकमा रहेको आकाश भैरवको मूर्तिलाई राति बाहिर खट बनाएर विभिन्न प्रकारका रंगीचंगी फूलले सिंगारेर राखिएको थियो ।


प्रकाशित : भाद्र २४, २०७६ १०:०९
पूरा पढ्नुहोस्
प्रतिक्रिया
पठाउनुहोस्