ज्वरोका बिरामी बढे

मौसम परिवर्तन र सरसफाइको अभावमा लमजुङ तथा म्याग्दीमा स्वास्थ्य समस्या । बेड अभावमा म्याट ओछ्याएर बिरामीको उपचार
आश गुरुङ

लमजुङ — सहर तथा गाउँका स्थानीयमा भाइरल ज्वरो फैलिएको छ । कतिपय परिवार नै बिरामी भएर स्वास्थ्य संस्थामा आउने गरेका छन् । स्वास्थ्य संस्थामा आउने बिरामीलाई टाइफाइड, निमोनिया र झाडापखलाको समस्या बढी छ ।

दूषित पानीको प्रयोगबाट हुने यस्ता खाले बिरामी अधिकांशमा भाइरल ज्वरो देखिएको उपचारमा संलग्न चिकित्सकहरूले बताएका छन् । लमजुङ जिल्ला सामुदायिक अस्पतालका मेडिकल अधिकृत डा. सुलोचन पन्तका अनुसार टाइफाइडका सबै बिरामीमा ज्वरो हुने भयो, निमोनिया भएका बिरामीमा पनि ज्वरो छ । झाडापखलाका बिरामीमा समेत ज्वरो रहेको उनले बताए ।


बेंसीसहरस्थित लमजुङ जिल्ला सामुदायिक अस्पताल, लमजुङ मोडेल अस्पताल, बेंसीसहर अस्पताल तथा अन्य मेडिकल तथा फार्मेसीमा ज्वरोका विरामीको भीड लागेको छ । यस्तै, सुन्दरबजार, भोर्लेटार, दुईपिप्ले, धमिलिकुवा लगायत अस्पताल साथै गौंडा, दुराडाँडा प्राथामिक स्वास्थ्य केन्द्र र गाउँगाउँमा रहेका स्वास्थ्य संस्थामा पनि उपचारका लागि ज्वारोका बिरामी बढी आउने गरेको ती स्वास्थ्य संस्थाले बताएका छन् ।


बिरामीमध्ये बालबालिका रबृद्धबृद्धा बढी छन् । युवायुवतीमा पनि उत्तिकैमात्रामा डाइफाइड, निमोनिया र झाडापखलाको समस्या छ ।


लमजुङ जिल्ला सामुदायिक अस्पतालमा लडेर हातखुट्टा भाँचिएका र मर्केर अस्पताल आउनेहरू पनि उत्तिकै छन् । ६० शैय्यको अस्पतालमा भुइँमा म्याट ओछ्याएर उपचार गर्ने गरिएको छ । करिडोरमा थप १० वटा शैय्या राखेर उपचार गराउने गरिएको छ । एक्कासी ज्वरो आएपछि इमरजेन्सीमा आउने र भर्ना हुने विरामी समेत थुप्रै रहेको चिकित्सकहरूले बताएका छन् । उनीहरूका अनुसार ठाउँ अभावमा अलि सामान्य देखिने विरामीलाई औषधी दिएर घरमै पठाउने गरिएको छ ।


अस्पताल प्रमुख हेमन्त श्रेष्ठका अनुसार दैनिक औसतमा २ सय ८० देखि २ सय ९० बिरामी स्वास्थ्य परीक्षणका लागि आउने गरेका छन् । बढीमा दिनका ३ सय ३८ सम्म परीक्षणका लागि आउने गरेको उनले बताए । ‘धेरै बिरामीमा ज्वरो छ । ज्वरो भएका विरामीमा टाइफाइड र निमोनियाको समस्या छ,’ उनले भने । गर्मीयामको समय, बर्खायामको समय हावापानी छिनभरमै परिवर्तन हुने, खानेपानीमा फोहर मिसिएकाले पनि धेरै बिरामी पर्ने गरेका छन् ।


डा. पन्तका अनुसार दुषित पानी, दिसा मिसिएको पानी, सरसफाइमा ध्यान नदिँदा, हात नधोइ खाना खाँदा, खानेकुरामा फोहर वा दिसा मिसिएको पानी तथा किटाणु पर्दा टाइफाइड र झाडापखालाको समस्या देखिएको हो ।


यी बिरामीलाई ज्वरोको समस्या रहेको र अहिले बर्षातको समय चिसो हुने भएकाले निमोनिया पनि बढेको उनले बताए । उनले पानी फिल्टर गरेर वा उमालेरमात्रै खान, बासी सडेगलेका नखान, ताजामात्रै खान सुझाव दिए । कतिपय युवायुवतीले बजारका जंकफुडहरू बढी खानाले पनि समस्या देखिएको उनले बताए ।


बेनीमा रगतमासीको प्रकोप

म्याग्दी– सदरमुकाम बेनीमा वितरण गरिएको खानेपानी प्रदुषित हुँदा पखला लाग्ने तथा दिसामा आउँ ( रगतमासी/मासी) पर्ने रोग प्रकोपको रुपमा फैलिएको छ ।


बेनी नगरपालिका वडा ७ र ८ बेनीबजार क्षेत्रमा भदौ २ देखि आउँ पर्ने रोग प्रकोपको रुपमा फैलिएको हो । शुक्रबारसम्म बेनी अस्पतालमा १५ जना विरामी भर्ना भई उपचार गरिरहेका छन् । छुट्टै ४५ जना आउँका बिरामीले इमर्जेन्सीमा भर्ना भएका छन् । एक सयबढी आउँका बिरामीले ओपीडीमा स्वास्थ्य परीक्षण गरी औषधी खाएका छन् ।


‘भदौ ३–५ गते १५ जनाबढी पखाला र आउँले शरीरमा पानीको मात्रा कम भैसकेका र मुखबाट औषधि खुवाउन नसकिने बालबालिका भर्ना भएका छन्,’ बेनी अस्पताल इन्डोर विभागकी नर्सिङ अधिकृत शिला खरेलले भनिन, ‘बढी बिरामी आकस्मिक सेवा लिएर फर्केका छन् । ओपीडीमा पनि उत्तिकै भिड छ ।’


१८ हजारबढी जनसंख्या रहेको बेनी बजारमा मात्र एक्कासी आउँका बिरामी देखिएपछि अस्पतालले आपतकालिन् बैठक राखेर बिरामी राख्ने बेड, औषधि तथा स्वास्थ्यकर्मीलाई तयारी अवस्थामा राखेको जनाएको छ । ‘एउटै क्षेत्रका धेरै जना बिरामी एक्कासी एउटै रोगबाट ग्रसित भै अस्पताल आएपछि प्रकोप घोषणागरी नियन्त्रणमा जुटेका छौं,’ बेनी अस्पतालका सूचना अधिकारी प्रकाश सुवेदीले भने, ‘स्वास्थ्यकर्मी, औषधी र बेडलाई थपेर राखेका छौं । पानीजन्य रोग भएकोले बेनी खानेपानी संस्थासँग मिलेर खानेपानीको ल्याब टेस्ट गरिरहेका छौं ।’


बेनी–जोमसोम सडक विस्तार क्रममा पाइपलाइनमा क्षति पुगेपछि लामो समय खानेपानी अवरुद्ध भएको थियो । उक्त समय बाहिरी स्रोतबाट व्यवस्थापन गरिएको पानी पानी प्रदुषित हुँदा आउँ रोगको प्रकोप देखिएको हो ।


बेनीका एक हजार ३३ घरधुरीका १८ हजार ५ सय ९७ जनालाई खानेपानी वितरण गरेको बेनी खानेपानी उपभोक्ता संस्थाले सेडिमेन्टेसन तथा स्लोस्यान्ड फिल्टर हुँदै डिसेन्फेक्सन प्रक्रियाबाट पानी वितरण गर्दै आएको छ । खानेपानी अवरुद्ध भएपछि आपतकालिन रुपमा बाह्य सोतलाई सोझै वितरण लाइनमा जोडेको थियो । प्रकाशित : भाद्र ७, २०७६ ०९:५९

ADVERTISEMENT
प्रतिक्रिया
पठाउनुहोस्

प्रदेशका कर्मचारीलाई एक साता भ्रमण

प्रतीक्षा काफ्ले

गण्डकी — गण्डकी प्रदेश मातहतका कर्मचारी एकहप्ते भ्रमण जान पाउने भएका छन् । गण्डकी प्रदेशअन्तर्गतका महत्त्वपूर्ण पर्यटकीय गन्तव्य भ्रमण गर्ने र सोही ठाउँमा रहेका होमस्टेमा बास बस्ने गरी जाने छन् । जसका लागि बजेट खर्च सरकारले नै व्यहोर्ने छ । 

सन् २०१९ लाई आन्तरिक पर्यटन वर्ष, २०२० लाई छिमेकी मुलुक पर्यटन वर्ष र २०२२ लाई बृहत अन्तर्राष्ट्रियस्तरको पोखरा पर्यटन वर्ष मनाउँदै २० लाख पर्यटक भित्र्याउने सरकारको लक्ष्य छ । अहिले आन्तरिक पर्यटन वर्षको ९ महिना बित्दासमेत प्रदेश सरकारले पर्यटक भित्र्याउने कुनै योजना बनाएको छैन । प्रचारप्रसारका लागि कर्मचारीलाई भ्रमण पठाउने भएको हो ।

जसका लागि बुधबार बसेको मन्त्रिपरिषद्को बैठकले स्वीकृत दिएको छ । बैठकले ‘बिदा पर्यटन कार्यविधि २०७६’ स्वीकृत गरेको छ । जसमा एउटा कर्मचारीले ७ दिन बिदा पाउनेछ । बैठकले गरेका निर्णय शुक्रबार सार्वजनिक गर्दै सरकारका प्रवक्ता भौतिक पूर्वाधार विकासमन्त्री रामशरण बस्नेतले तलबी बिदा दिने निर्णय भएको बताए ।

उनका अनुसार कर्मचारीले आ–आफ्नो पद अनुसारको खाईपाई आएको एक महिनाको तलबस्वरुप भ्रमण खर्चबापत पाउने छन् । भ्रमणका लागि प्रदेश सरकारले ९० लाख रुपैयाँ बजेट छुट्ट्याएको प्रवक्ता बस्नेतले सार्वजनिक गरे । ‘हामीले पहिले नै नीति तथा कार्यक्रममा नै कर्मचारीको भ्रमणलाई समेटेका थियौं,’ उनले भने, ‘सोही अनुरूप बजेट विनियोजन गरिएको हो ।’

गण्डकी प्रदेशमा २ हजार २ सय कर्मचारीको दरबन्दी छ । हाल १८ सय कर्मचारी कार्यरत छन् । मुख्यमन्त्री कार्यालयबाट सञ्चालन हुने गरी आन्तरिक पर्यटन वर्षलाई टेवा दिन कर्मचारी भ्रमणको व्यवस्था गरिएको हो ।

यसैगरी वैठकले प्रदेशका मुख्यन्यायाधिवक्ता राजेन्द्र घिमिरेलाई पनि वैदेशिक यात्राको लागि स्वीकृत दिएको छ । घिमिरे भारत जाने छन् । सर्वोच्च र उच्च अदालतले समेत उनलाई भ्रमण जानको लागि अनुमति दिएको छ ।

सामाजिक विकास मन्त्रालयका सचिव दीर्घनारायण पौडेलका लागि पनि वैदेशिक भ्रमण स्वीकृत भएको प्रवक्ता बस्नेतले जानकारी दिए । उनका अनुसार पौडल चाइनाको हेनान प्रान्त जाने छन् । सचिव पौडेलको भ्रमणले प्रदेश सरकारलाई आर्थिक भार भने पर्ने छैन् ।

मन्त्रि परिषद वैठकले अमेरिकाको वासिङ्टन राज्यका प्रमुख जै रोवर्डलाई पनि गण्डकी प्रदेश भ्रमण गर्नको लागि निमन्त्रण दिने निर्णय गरेको छ । ‘हामीले जैलाई भ्रमणस्वरुप बोलाएर अमेरिकाको वासिङ्टन राज्यसंग भगिनी सम्बन्ध कायम गर्ने लक्ष्य छ’ उनले भने ।

कास्कीमा डेङ्गु रोग लागेर एकसय ५० भन्दा बढी विरामी परे । सो रोगलाई नियन्त्रण गर्नका लागि बैठकले २१ लाख रुपैयाँ दिने निर्णय गरेको छ । माइकिङ्, प्रचारप्रसार, सूचना, बैठक, भेला, औषधी खरिद गर्नको लागि २५ लाख रुपैयाँ मागसहितको प्रस्ताव आएको बताउँदै प्रवक्ता बस्नेतले भने, ‘यति धेरै नलाग्ला भनेर हामीले २१ लाख रुपैयाँ दिने निर्णय गरेका छौ । भैपरी, महामारी जस्ता रोग नियन्त्रणका लागि पनि थोरै रकम छ । आवश्यकतानुसार बजेट छुटाउला भनेर ५/५ लाख रुपैयाँ मात्र कोषमा राखेका थियौ ।’ यसैगरी वैठकले गण्डकी प्रदेशसभा र प्रदेशको प्रशिक्षण प्रतिष्ठान भवन निर्माण गर्ने विषयमा पनि निर्णय गरेको छ ।

भवन निर्माणका लागि प्रस्ताव दिएको थियो । बैठकले स्वीकृत गरेको बताउँदै बस्नेत भन्छन्, ‘भवन नदीपुरमा नै बनाउने निर्णय भएको छ । भौतिक पूर्वाधार तथा विकास मन्त्रालयका सचिवको अध्यक्षतामा जग्गा समिति गठन गरेका थियौं । समितिले प्रतिवेदन बुझायो । तर, प्रतिवेदनमा केही हेरफेर गर्नुपर्ने भएकाले मुख्यमन्त्री तथा मन्त्रिपरिषद् कार्यालयका मुख्य सचिवको अध्यक्षतामा अर्को समिति बनाएका छौं ।

नयाँ समितिले एक महिनाभित्र जग्गा व्यवस्थाको प्रतिवेदन बुझाउने छ ।’ मुख्य सचीवको अध्यक्षमा ७ सदस्यीय छन् । जसमा आन्तरिक मामिला तथा कानुन मन्त्रालय, भौतिक पूर्वाधार विकास मन्त्रालय, आर्थिक मामिला तथा योजना, मालापोत, नापी कार्यालय प्रमुख र भूमि व्यवस्था, कृषि तथा सहकारी मन्त्रालयका सचिवहरू समितिको सदस्यमा रहनेछन् ।

प्रकाशित : भाद्र ७, २०७६ ०९:५८
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×