वैकल्पिक सडकमै बाढी बगेपछि महेन्द्र राजमार्ग ठप्प, सयौं गाडी रोकिए

नारायण शर्मा

(नवलपरासी) — महेन्द्र राजमार्गको अरुणखोला पुल भाँचिएपछि बनाइएको वैकल्पिक सडकमै बाढी बगेपछि महेन्द्र राजमार्गको यातायात ठप्प भएको छ । आइतबार साँझ लगातारको वर्षात्‌का कारण अरुणखोलामा पानीको सतह बढेपछि बगाउने त्रासले डाइभर्सनमा गाडी गुडाउन रोक लगाइएको छ ।

ह्युमपाइप राखेर बनाएको कच्ची सडकभन्दा माथिबाट बाढी बगिरहेको छ ।

जिल्ला ट्राफिक प्रहरीका अरुणखोलामा खटिएका सई राजेन्द्रकुमार कार्कीका अनुसार राजमार्गमा साँझ साढे ५ बजेपछि यातायात रोकिँदा पूर्व-पश्चिम हिँडेका सयौं सवारीसाधनका यात्रु अलपत्र परेका छन् । पानीको सतह घटेपछि यातायात खुलाइने उनले सुनाए ।
५ दिनअघि अरुणखोला पुलमा ट्रक ठोक्किएर भाँचिएको थियो । ३ दिन लगाएर वैकल्ल्पिक सडक बनाई आवागमन खुलाइएको थियो ।


प्रकाशित : भाद्र १, २०७६ १९:३७
प्रतिक्रिया
पठाउनुहोस्

पूर्वराजदूत केशवराज झाको हत्या अभियोगमा भान्से पक्राउ

कान्तिपुर संवाददाता

काठमाडौँ — २०७५ भदौ ४ मा थापाथलीस्थित घरमै मृत फेला परेका फ्रान्सका लागि पूर्वराजदूत केशवराज झाको हत्या अभियोगमा उनकै घरका भान्से सानुकान्छा तामाङलाई प्रहरीले नियन्त्रणमा लिएर अनुसन्धान अघि बढाएको छ ।

झा पत्नी ज्ञानुदेवीले सानुकान्छाविरुद्ध किटानी जाहेरी दिएपछि उनलाई पक्राउ गरिएको प्रहरी परिसर काठमाडौंका डिएसपी होबिन्द्र बोगटीले बताए ।

बिहान अबेरसम्म कोठाबाहिर ननिस्केपछि ढोका खोलेर हेर्दा झा आफ्नै ओछ्यानमा मृत भेटिएका थिए । उनको टाउकोमा चक्कु प्रहार गरिएको थियो । उनी रगताम्य देखिन्थे । घटनालगत्तै महानगरीय प्रहरी अपराध महाशाखाले घटनाबारे महिनौंसम्म अनुसन्धान गरेको थियो । प्रहरीले सानुकान्छा र घरमै कार्यरत अर्का दुई मालीलाई नियन्त्रणमा लिएर अनुसन्धान थालेको थियो । अनुसन्धानको क्रममा प्रहरीले उनीहरुमाथि पोलीग्राफ टेस्ट पनि गरेको थियो । पोलीग्राफ टेस्टबाट पनि शंका प्रमाणित हुन नसकेपछि उनीहरु छुटेका थिए ।

प्रहरीले मृतक झाको मोबाइलको कल डिटेल निकालेर उनलाई कसैले धम्की दिएको थियो कि भनेर पनि अनुसन्धान गरेको थियो । घरभित्र छिरेर झाको हत्या गरे पनि हत्याराले कुनै बहुमूल्य सामग्री भने लगेको थिएन । त्यसैले पनि प्रहरीले घरभित्रकै मान्छे हत्यामा संग्लन हुनसक्ने आशंका गरेको थियो ।

प्रहरी परिसरले सानुकान्छालाई हिरासतमा राखेर थप अनुसन्धान गर्न काठमाडौं जिल्ला अदालतबाट अनुमति लिएको छ ।

प्रकाशित : भाद्र १, २०७६ १९:३२
पूरा पढ्नुहोस्
प्रतिक्रिया
पठाउनुहोस्