मध्यपहाडीको काम ठप्प

अगन्धर तिवारी

पर्वत — निर्माणाधीन मध्यपहाडी (पुष्पलाल मार्ग) लोकमार्गको काम विगत करिब दुई महिनादेखि ठप्प छ । सडक फराकिलो पार्ने निहुँमा ठेकेदार कम्पनीले सबैतिर एक्साभेटर लगाउँदा पर्वत खण्डको दर्जनबढी स्थानमा पहिरो खसेको छ । मनसुनको कारण देखाउँदै असारयता काम रोकिंदा सडकमा परेका खाल्डाखुल्डी र पहिरोले यात्रा सकसपूर्ण बनेको छ ।

नयाँपुलदेखि मालढुङ्गासम्म करिब दुई दर्जन पहिराले सडक साँघुरो बनाएको छ । एकतर्फी सवारी चलाउन समेत मुस्किल छ । सडकमा परेका ठूल्ठूला खाल्डामा जमेको पानीमा साना सवारी चुर्लुम्मै डुब्छन् । खाल्डाखुल्डी र पहिरोमा जोगिएर यात्रा गर्न निकै जोखिमपूर्ण भएको सवारीचालक बताउँछन् । ‘जोखिम मोलेर पोखरा पुग्न निकै सास्ती छ,’ व्यवसायी कमल सुवेदीले भने, ‘यो पीडा कसले बुझिदिने ।’ कुनै बेला सडकमा हिंडदाहिंडदै खसेको पहिरोले घन्टौं रोकिनुपरेको उनले उनले बताए ।

पहिरो र खाल्टाखुल्टी पुर्न ठेकेदार कम्पनीले कुनै चासो देखाएको छैन । पर्वतखण्डको सडक दुई लेनको बनाउने गरी लामा कन्स्ट्रक्सनले ०७४ वैशाखमा ३ वर्षको समय लिएर आयोजनासँगसम्झौता गरेको थियो ।

सम्झौताअनुसार हालसम्म ७० प्रतिशत काम सकिनुपर्ने हो । तर, ठेकेदारको ढिलासुस्तीका कारण ५० प्रतिशत पनि काम नसकिएको आयोजनाले जनाएको छ । आयोजनाको पर्वतस्थित कार्यालयका प्रमुख आशिष थापामगरका अनुसार वर्षाको कारण देखाएर निर्माण व्यवसायीले लापरबाही गरिरहेको छ । ‘न्यूनतम ट्राफिकिङ व्यवस्थापन सहज गराउन पटकपटक निर्देशन दिएका छौं,’ थापामगरले भने, ‘हाम्रो निर्देशन मानिएको अवस्था छैन ।’ पर्वत खण्डको निर्माणको जिम्मा लिएको लामा कन्स्ट्रक्सन र उसका प्रतिनिधि केही समय सम्पर्कविहीन भएको उनले बताए ।

गत जेठदेखि काम रोकेर करिब एक महिनासम्म सम्पर्कविहीन भएको निर्माण कम्पनीका प्रतिनिधिलाई सम्पर्कमा ल्याएर काम सुरु गर्न निर्देशन दिएको प्रमुख जिल्ला अधिकारी कल्पना घिमिरे नेपालले बताइन् । उनका अनुसार निर्माण व्यवसायीसँग सम्झौता गर्ने, कामको मूल्यांकन गर्ने, निगरानी गर्ने लगायतका निकाय अलग–अलग हुँदा कारबाही गर्न समस्या छ ।

‘सम्झौता गर्ने, आयोजना अगाडि बढाउने, बजेट निकासा गर्ने, फरक–फरक निकाय हुँदा हामीलाई कारबाही गर्न समस्या छ,’ नेपालले भनिन्, ‘पटकपटक भनेका छौं । धेरै ठाउँमा समस्या छ । व्यवसायीले टेर्दैनन् ।’ पर्वत खण्डको अम्बोट, चुवा र प्रहरी कार्यालयमा एक–एकवटा एक्साभेटर राख्न गरिएको आग्रह व्यवसायीले नटेरेको उनले बताइन् ।

सडकमा निर्माण व्यवसायीको ज्यादती भएकोबारे चौतर्फी गुनासो बढेपछि संघीय सांसद पदम गिरीले मंगलबारको संसद् बैठकमा यस विषयमा ध्यानाकर्षण गराएका छन् । सांसद गिरीले ठेकेदार कम्पनीको लापरबाहीले जुनसुकै बेला ठूलो दुर्घटना हुन सक्ने भन्दै त्यसको जिम्मेवार स्वयंकम्पनी हुनुपर्ने बताए ।

उनले लापरबाही गर्ने ठेकेदार कम्पनीलाई कानुनी दायरामा ल्याएर तत्काल कारबाही गर्न संसद् र सम्बन्धित पक्षलाई ध्यानाकर्षण गराएको बताए ।

निर्माण व्यवसायीले भने लगातारको झरीका कारण काम तीव्र गतिमा गर्न नसकिएको जनाएको छ । ‘मनसुनका बेला स्पीडमा काम गर्न नसकेकै हो,’ लामा कन्स्ट्रक्सनका पर्वत प्रतिनिधि गोविन्द भुसालले भने, ‘पहिरो र जोखिमको सडक व्यवस्थापन गरिराखेकै छौं ।’ उनले तत्कालको समस्या समाधान गर्न जिल्ला प्रहरी कार्यालय, अम्बोट, लगायतका ठाउँमा मेसिन राखेर मर्मत गरिरहेको दाबी गरे ।

प्रकाशित : श्रावण २३, २०७६ ०९:१०
प्रतिक्रिया
पठाउनुहोस्

वडा कार्यालयमा चोरी

कान्तिपुर संवाददाता

कास्की — पोखरा महानगरपालिका–६ वडा कार्यालयमा चोरी भएको छ । मंगलबार बिहान कार्यालय पुग्दा चोरी भएको वडाध्यक्ष जगतबहादुर पहारीले बताए । उनका अनुसार मास्क लगाएका एक जनाले २ कम्प्युटर चोरी गरेका हुन ।

चोरीमा संलग्नको खोजी भइरहेको वडा प्रहरी कार्यालय बैदामका डिएसपी कोमल शाहले बताए । यसअघि वडामा चोर पसे पनि कुनै सामान लगेको थिएन ।

यसअघि पनि महानगरका विभिन्न वडामा शृंखलाबद्ध चोरी भएका छन् । चोरले ल्याप्टप, कम्प्युटर लगायत सामान लगे पनि पत्ता लाग्न सकेको छैन । सबैभन्दा पहिला १७ महिना अघि वडा १३ मा ल्यापटप, सिपीयु, मनिटर, प्रिन्टर लगायतका समान चोरी भएको थियो । ३ लाख १० हजार बराबरकोसामान चोरी भएको थियो ।

पोखरा २५ मा ३ महिना अघि चोरी भएको थियो । ‘सिसी क्यामेरा भएको कार्यालयमा पत्ता लाग्न नसकेको चोर, क्यामेरा नभएको ठाउँमा कसरी पत्ता लाग्नु’, शाहले भने । वडामा १ लाख ३० हजार बराबरको सिपियु, मनिटर चोरी भएको थियो । पोखरा–५ मा ३ लाख, १२ मा १२ हजार १३ मा ३ लाख १० हजार, १४ मा १३ हजार, १५ मा १२ हजार, १६ मा २ लाख २५ हजार, २९ मा १ लाख २९ हजार बराबरको सामान चोरी भएको छ ।

वडा १९ र ३० कार्यालयमा चोर पसे पनि केही हराएको छैन । २०७५ मा मात्र १० वडामा चोरी भएको थियो । २०७६ मा वडा २५ मा १ लाख ३० हजार, ३१ मा १ लाख ६० हजार बराबरको ल्यापटप, मनिटर चोरी भएको छ । २५ र ३१ वडा सहित १३ वटा वडामा चोर पसेको हो । पोखरा महानगरपालिका जिन्सी महाशाखाका प्रमुख किरणप्रसाद कोइरालाका अनुसार सबै वडामा गरेर १४ लाख बराबरको चोरी भएको छ । चोरी हुनासाथ बैदाम कार्यलयमा उजुरी दिएपनि अहिले सम्म चोर पत्ता लगाउन नसक्नुमा प्रहरीको कमजोर हो’ महानगरपालिकाका प्रवक्ता तथा वडा नम्बर ५ का अध्यक्ष धनबहादुर नेपालीले भने ।

सुतेकै अवस्थामा घाँटीको गहना चोरी
गोरखा– गोरखा नगरपालिका–९ ठिगुरेस्वाराँको ३ घरमा बुधबार बिहान चोरी भएको छ । मूलढोका फोडेर सुनका गहना र नगद चोरी भएपछि स्थानीय त्रसित छन् ।

झन्डै साढे चार तोला गहना चोरी भएको भन्दै प्रहरीमा उजुरी परेको छ । वन्दना दानी क्षेत्रीको करिब एक तोला र कमलकुमारी श्रेष्ठको साढे दुई तोलाको सिक्री चोरी भएको छ । सानुमाया कुँवरको घरबाट नगद ५० हजार सहित एक तोला बराबरको तिलहरीका गहना चोरी भएको प्रहरीले जनाएको छ । ‘च्यानल गेटको चापी फोडेको थाहै पाइनँ, सुतिरहेको ठाउँमा कालो मास्क लगाएको मान्छे आयो, एक्कासि घाँटीमा समातेर सिक्री तान्यो,’ वन्दनाले भनिन् ।

प्रकाशित : श्रावण २३, २०७६ ०९:१०
पूरा पढ्नुहोस्
प्रतिक्रिया
पठाउनुहोस्