एक महिना पनि टिकेन सडक

हरिराम उप्रेती

गोरखा — कालोपत्रे गरिएको एक महिना नबित्दै लुइँटेल–आँपपीपल–हर्मी भन्ज्याङ–थालाजुङ–भच्चेक सडक ठाउँठाउँ धसिएको छ । विभिन्न स्थानमा खसेको पहिरोले सडक अवरुद्घ छ । 

गोरखाको हर्मी भन्ज्याङनजिक धसिएको सडक । तस्बिर : हरिराम/कान्तिपुर

६० करोडभन्दा बढी खर्चिएर बनाइएको सडक फितलो अनुगमन र ठेकेदार कम्पनीले गुणस्तरीय काम नगर्दा महिना दिन पनि नटिकेको भन्दै स्थानीय आक्रोशित छन् ।

हर्मीभन्ज्याङदेखि चित्रेपोखरीसम्म दर्जनभन्दा बढी पहिरो खसेको हर्मीका टेकबहादुर नेपालीले बताए । ‘असारको ८–१० मा कालोपत्रे सकिएको हो,’ उनले भने, ‘तर एक महिना पनि टिकेन । हामीलाई ८/१० वर्ष खप्ने सडक चाहिएको हो, एउटा बर्खा पनि नटिक्ने बनेछ ।’ चाँडो सक्ने बहानामा अलि–अलि गिट्टी हाली अलकत्राले कालो पोतेर छाडिएकाले यस्तो अवस्था आएको उनको भनाइ छ ।

पहिरोले आँपपीपल–चित्रेपोखरी खण्डका विभिन्न ठाउँमा नालीसमेत पुरिएको सिरानचोक गाउँपालिका–३ का मिठे दमैले बताए । ‘पानी नालीबाट बग्दैन, सडकबाट बगेपछि भत्कने नै भयो,’ उनले भने । राम्चेडाँडा, हर्मीभन्ज्याङनजिकै ठाउँठाउँमा सडक दबिएर कतै माटो देखिएको छ भने कतै चिरिएको छ ।

लुइँटेल भन्ज्याङदेखि अजिरकोट गाउँपालिकाको नयाँगाउँसम्मको करिब ३१ किलोमिटर सडक भूकम्पीय आपतकालीन सहायता परियोजनाअन्तर्गत कालोपत्रे भएको हो । एसियाली विकास बैंकको आर्थिक सहयोग तथा स्विस सरकारको प्राविधिक सहयोगमा बनेको सडकको काम २०१६ को १२ डिसेम्बरबाट सुरु भएको थियो ।

सडकलाई दुई खण्डमा ठेक्का लगाएर काम भएको राष्ट्रिय पुनर्निर्माण प्राधिकरण जिल्ला आयोजना कार्यान्वयन एकाइ अनुदान व्यवस्थापन तथा स्थानीय पूर्वाधार कार्यालयले जनाएको छ । लुइँटेल–चित्रेपोखरी खण्डको १८.५ किमि निर्माणको जिम्मा लामा अमर जेभीले पाएको थियो । ३५ करोड २१ लाख लागतमा सडक कालोपत्रे भएको हो । चित्रेपोखरीबाट नयाँगाउँसम्मको १२.९७ किमि खण्डको जिम्मा लामा कन्स्ट्रक्सनले पाएको थियो ।

कालोपत्रेका लागि २५ करोड ४२ लाख खर्च भएको एकाइले जनाएको छ । ३.७५ मिटर चौडाइको सडक र दुई सेन्टिमिटर कालोपत्रे गर्ने भनिए पनि मापदण्डअनुसार नभएको स्थानीयको आरोप छ । माटोमाथि गिट्टी बिछ्याएर कालोपत्रे गरिएको स्थानीय ईश्वर लम्सालले बताए । ‘बस्ती भएको ठाउँमा ठिकै छ, बस्ती नभएको ठाउँमा कालोपत्रे उप्काएर हेरे माटो भेटिन्छ,’ उनले भने । सडक २ वर्ष पनि नटिक्ने पालुङटार–४ का सुन्दर विश्वकर्माले बताए । ‘अहिले साना गाडीमात्र चलेका छन्, ट्रक आए सबै धसिन्छ,’ उनले भने, ‘हामी प्राविधिक नभए पनि आँखाले सडकको दुरवस्था हेर्दा दुई वर्ष टिक्छ भनेर पत्याउन सक्दैनौं ।’

पहिरो खसेर अवरुद्घ सडक सफा गर्ने तयारीमा जुटेको भूकम्प पुनर्निर्माण प्राधिकरण जिल्ला आयोजना कार्यान्वयन एकाइ अनुदान व्यवस्थापन तथा स्थानीय पूर्वाधार कार्यालयका प्रमुख रामशरण आचार्यले बताए । ‘प्राविधिक टोली पठाएर स्थलगत निरीक्षण गरिसक्यौं,’ उनले भने, ‘पहिरो धेरै ठाउँमा छ ।’ वर्षा कम भएपछि काम थाल्ने तयारीमा रहेको उनको भनाइ छ । ‘धेरै ठाउँमा टेवापर्खाल राखेर पहिरो रोकथाम गर्नुपर्नेछ,’ उनले भने, ‘हर्मीभन्ज्याङ चित्रेपोखरी खण्डमा एलाइन्मेन्ट चेन्ज गर्नुपर्‍यो, कटिङ सकिनेबित्तिकै काम थाल्यौँ, पर्खने समय नभएकाले केही समस्या आएको छ ।’

प्रकाशित : श्रावण २०, २०७६ ०९:५३
प्रतिक्रिया
पठाउनुहोस्

पर्यटकीय गन्तव्य बन्दै ह्यात्रुङ झरना

चन्द्र कार्की

तेह्रथुम — ह्यात्रुङ झरनालाई केन्द्रमा राखेर फेदाप गाउँपालिकाले पर्यटन व्यवसाय प्रवर्द्धनको पहल थालेको छ । स्थानीय स्तरमा रहेका पर्यटकीय क्षेत्रको विकास गरी आम्दानीको स्रोत वृद्धि गर्न पूर्वाधार निर्माणमा गाउँपालिका जुटेको हो ।

तेह्रथुमको फेदाप गाउँपालिकाको सम्दु र इसिबु सीमामा रहेको ३६५ मिटर अग्लो ह्यात्रुङ झरना ।तस्बिर : चन्द्र/कान्तिपुर

यसका लागि गाउँपालिकाले गत आवमा ५३ लाख रुपैयाँ बजेट छुट्याएर काम थालेको जनाएको छ ।

गाउँपालिकाले वडा नं १ देखि ५ सम्मका पर्यटकीय स्थलको पहिचान गरी सिङ्गो गाउँपालिकालाई पर्यटकीय बनाउन अध्ययन थालेको गाउँपालिकाका अध्यक्ष हरि चोङवाङले बताए । चालु आवमा पनि गत आवको तुलनामा थप रकम विनियोजन गरिएको उनको भनाइ छ । फेदापलाई जिल्लाकै नमुना पर्यटकीय गाउँपालिका बनाउन वडा स्तरबाटै पर्यटकीय स्थलको पहिचान थालिएको चोङवाङको भनाइ छ ।

स्थानीय तहमा आफूहरू आए लगत्तै ओझेलमा परेका पर्यटकीयस्थलको खोजी गरी संरक्षणका लागि समेत अभियान सञ्चालन गरिएको गाउँपालिकाका प्रवक्ता नवीन चोङबाङले बताए । दक्षिण एसियाकै अग्लो भनिएको ह्यात्रुङ झरना (३६५मिटर) यही गाउँपालिकामा छ ।

वडा नम्बर ४ र ५ को सीमामा रहेको झरनाको पर्यटकीय विकासका लागि गाउँपालिकाले गत वर्ष २८ लाख रुपैयाँ बजेट विनियोजन गरेको थियो । यही झरनालाई केन्द्र भागमा राखेर अन्य ६ पर्यटकीय गन्तव्य समेत छनोट गरिएको गाउँपालिकाले जनाएको छ ।

गाउँपालिकाभित्र रहेका प्राकृतिक, सांस्कृतिक र धार्मिक सम्पदाको संरक्षण गरी पर्यटकीय विकास गर्न अभियान नै सञ्चालन गरिएको प्रवक्ता नवीनले बताए । पर्यटन क्षेत्रको विकासबिना गाउँपालिकाको आर्थिक समृद्धि नहुने सोचेर पर्यटकीय पूर्वाधार निर्माणमा ठूलो रकम खर्च गरिएको उनले बताए । गाउँपालिकाभित्र बसोबास गर्ने विभिन्न जात जाति र समुदायको संस्कृति, वेशभूषा, खानपान रहनसहन लगायत विषयलाई समेत पर्यटन प्रवर्द्धनसँग जोडिएको गाउँपालिकाले जनाएको छ ।

गाउँ बस्तीका सुन्दरता र संस्कृतिलाई पर्यटनसँग जोडदै घरवास कार्यक्रमको विकासमा समेत लागिएको अध्यक्ष चोङबाङको भनाइ छ । घरवासमा स्थानीय परिकारको स्वाद लिन पाइनुका साथै विभिन्न संस्कृतिको अवलोकन गर्ने व्यवस्था मिलाइने गाउँपालिको जनाएको छ ।

गाउँपालिकाले सबै वडामा कम्तीमा एउटा पर्यटकीय क्षेत्र पर्ने गरी नयाँ पर्यटकीय गन्तव्य स्थान छनोट गरेको छ । अध्यक्ष चोङबाङका अनुसार १, २ र ३ नम्बर वडा समेट्ने ओयाक्जुङ जलजले र सिम्लेको सीमामा रहेको चिचिलिङ पोखरी र भ्यागुते ढुंगा, सोही वडामा रहेको गुल्डुङ डाँडा, वडा नम्बर २ ओयाक्जुङमा रहेको मझौ गुफा र भैंसे पोखरी, वडा नम्बर ३ जलजलेमा रहेको माङगेनायक पदमार्ग, गाउँपालिका केन्द्र रहेको वडा नम्बर १ पोक्लाबाङ बजार केहीमाथि रहेको भगवती डाँडा मन्दिर क्षेत्रलाई नयाँ पर्यटकीय गन्तव्य छनोट गरिएको छ ।

यी क्षेत्रमा पर्यटकीय पूर्वाधार निर्माण भइरहेको गाउँपालिकाले जनाएको छ । ‘गाउँपालिकाभित्र पर्यटकलाई देखाएर पैसा लिन सकिने प्रशस्तै सम्भावन छ,’ नवीनले भने, ‘पर्यटन क्षेत्रबाटै गाउँपालिकाबासीको आर्थिक समृद्धि हामीले देखेका छौं ।’

प्रकाशित : श्रावण २०, २०७६ ०९:५०
पूरा पढ्नुहोस्
प्रतिक्रिया
पठाउनुहोस्