बेरोजगार युवालाई निर्ब्याजी सापटी

कान्तिपुर संवाददाता

गोरखा — बारपाक सुलिकोट गाउँपालिकाले युवालाई स्वरोजगार र व्यावसायिक बनाउन २ लाख रुपैयाँ निर्ब्याजी सापटी दिन प्रक्रिया सुरु गरेको छ । पशुपालन र कृषिजन्य व्यवसाय सञ्चालनका लागि चालु आर्थिक वर्ष ३५ युवालाई रकम उपलब्ध गराउन एक करोड बजेट छुट्ट्याइएको गाउँपालिकाले जनाएको छ । 

गत फागुन २७ को गाउँ कार्यपालिका बैठकले गाउँपालिका अध्यक्ष गरिबी निवारण कार्यक्रम सञ्चालन कार्यविधि २०७५ पारित गरेसँगै कार्यान्वयन थालिएको प्रमुख प्रशासकीय अधिकृत शिव गुरुङले बताए ।


एक वर्षअघिको गाउँसभाबाट कार्यक्रम सञ्चालन गर्ने योजना पास भएको थियो । ‘सूचना निकालेर प्रस्तावसहित निवेदन दिन भनेका छौँ,’ उनले भने, ‘यो महिनाभिक्र छनौट गर्छौं ।’ कार्यत्रममा सहभागी हुने ब्यक्ति छनौटका लागि योजना शाखाका प्रमुखको संयोजकत्वमा ५ सदस्यीय छनौट तथा सिफारिस समिति बनाइएको छ ।


समितिले प्राप्त निवेदन र प्रस्तावको अध्ययन गरी सापटी दिन योग्य व्यक्ति छनौट गरी स्वीकृतिका लागि गाउँ कार्यपालिका बैठकमा पेस गर्ने प्रावधान छ । ‘पशुपालन र कृषिजन्य काम गर्ने हो,’ गुरुङले भने, ‘उत्पादन, भण्डारण, प्रशोधन र बजारीकण गर्न रकम खर्चनु पर्छ ।’ प्राप्त सापटी रकम छनौट भएका ब्यक्तिले तरकारी, माछा, कुखुरा, बंगुर, गाई, बाख्रा, मौरीपालन, अलैँची, अदुवा, कफी, स्याउलगायत ब्यावसायिक खेतीमा खर्चनुपर्ने हुन्छ । कृषि र पशुपालनमा आत्मनिर्भर बनाउन तथा ब्यावसायिक किसान बढाउन कार्यक्रम सञ्चालनमा ल्याइएको गाउँपालिका अध्यक्ष विष्णु भट्टले बताए ।


‘विदेश जानेको संख्या बढ्यो, यसले सामाजिक सन्तुलन पनि बिग्रने भयो,’ उनले भने, ‘बीउ पुँजी नभएर व्यवसाय गर्न नसकेकालाई बिनाधितो सापटी दिएपछि गाउँमै स्वरोजगार हुन सक्ने भए ।’ चालु वर्षको कार्यक्रमको प्रभावकारिता हेरेर आगामी वर्षबाट पनि यस कार्यक्रमलाई निरन्तरता दिने उनले बताए । ‘कार्यक्रम फलदायी बने आगामी वर्षबाट रकम समेत बढाउँछौं,’ भट्टले भने । सरकारी जागिरे, पेन्सनर, गैरसरकारी संस्था लगायत अन्य पेसा व्यवसायमा संलग्न र फौजदारी अझियोग लागेका ब्यक्ति यो कार्यत्रममा समेटिँदैनन् ।


सापटी पाउन निश्चित मापदण्ड भने पूरा गर्नुपर्छ । रकम प्राप्तीका लागी एकल महिला, अपांग र दलित समुदायलाई पहिलो प्राथमिकतामा राखिएको छ । ‘खेतीयोग्य जमिन आफ्नै भए राम्रो हुन्छ, नभए लिजमा लिएर भए पनि व्यवसाय गर्न सक्ने भए,’ गुरुङले भने, ‘प्रक्रियामा परे अहिले व्यवसाय संचालन गरिरहकाले पनि रकम पाउन सक्छन् ।’ पहिलो एक र दोस्रो एक गरी उत्त रकम दुई किस्तामा उपलब्ध गराइने कार्यविधिमा छ ।


१८ देखि ५० वर्षसम्मका ब्यक्ति रकम पाउन योग्य हुनेछन् । प्राप्त सापटी रकम दुई वर्षमा फिर्ता गर्नुपर्छ । छुट्ट्याइएको एक करोडमध्ये ७० प्रतिशत अर्थात् ७० लाख ३५ युवालाई दुई–दुई लाखको दरले सापटी दिइने छ ।


बाँकी ३० प्रतिशतमध्ये १० प्रतिशत विमा, २० प्रतिशत सीप विकास, ब्यावसायिक र उद्यमशिलता तालिम, कृषिजन्य सामग्री वितरण तथा हलुका सवारी साधन चालकको तालिममा खर्चने उनले बताए । ‘ड्राइभिङ तालिमका लागी इच्छुकको पनि निवेदन संकलन भइरहेको छ, २० देखि २२ जनालाई तालिम उपलब्ध गराउँछौँ,’ उनले भने । बिमा गर्दा व्यवसायीको हौसला बढ्ने भएकाले केही रकम छुट्ट्याइएको गाउँपालिकाले जनाएको छ ।

प्रकाशित : जेष्ठ ९, २०७६ ०९:५५
ADVERTISEMENT
प्रतिक्रिया
पठाउनुहोस्
ADVERTISEMENT

ग्रामीण बस्तीमा थ्रीजी विस्तार

कान्तिपुर संवाददाता

बागलुङ — नेपाल टेलिकमले बागलुङ, पर्वत, म्याग्दी र मुस्ताङका सबै ग्रामीण बस्तीमा थ्रीजी सेवा विस्तार गरेको छ । टेलिकम बागलुङ शाखाले चालु वर्ष १ सय ३ वटा टावरमार्फत थ्रीजी सेवा विस्तार गरेको हो ।

यसअघि सबै टावरमा टुजी मात्र थियो । पुराना टावरको क्षमता बढाएर ८१ वटा र १३ वटा नयाँ थपेर ९२ स्थानमा थ्रीजी सुरु भएको हो । असार मसान्तभित्र अन्य थप १० स्थानमा टावर बनाएर सेवा बिस्तार गरिने वरिष्ठ इन्जिनियर तथा शाखा प्रमुख केशव शर्माले बताए ।

उपल्लो मुस्ताङको चराङ, घमी तथा जोमसोममा नयाँ टावर निर्माण भइरहेको छ । त्यस्तै बागलुङको खुंखानी, नागबेलीखोला र निसीको भलकोट तथा रुकुम सिमासम्म टावर बनिसकेका हुन् । केहीअघि भकुन्डे, रायडाँडा, खुंगा, रिघा र बिजौरेमा टावर निर्माण गरेको शर्माले बताए । पर्वतको आर्थर डाँडाखर्कमा पनि नयाँ टावर निर्माण भइरहेको छ । म्याग्दीको सिंगा तातोपानी र चिमखोलामा भने टावर निर्माण भइसकेकोले असारभित्रै सेवा विस्तार हुनेछ ।

टेलिकमले सेवा विस्तार गरेपछि इन्टरनेट प्रयोगकर्ताले एक सय गुणाभन्दा धेरै प्रयोग क्षमता बढाएका छन् । शाखाको तथ्यांकअनुसार २ वर्ष अघिसम्म २४ घण्टामा ७० जिबी प्रयोग गरेकाले गत वर्ष १ हजार ७ सय जीबी र चालु वर्ष ३ हजार ४ सय जीबी प्रयोग गरेका छन् ।

१० वटा टावर थप गर्दा आगामी आर्थिक वर्ष यो क्षमता ४ हजार जीबीमा पुग्ने शर्माले बताए । ‘इन्टरनेटको माग बढे पनि भौगोलिक कठिनाइले क्षमता बढाउन सकेका थिएनौं’, शर्माले भने, ‘अहिले भने धमाधम काम भइरहेकाले सहज सेवा पुग्नेछ ।’ बागलुङका अधिकांश ग्रामीण बस्तीमा इन्टरनेट सुविधा नभएपछि बजार क्षेत्रमा झरेर सेवा लिनुपर्ने बाध्यता थियो ।

बुर्तिवाङ बजारमा पनि थ्रीजी अभावमा धेरै कार्यालय र निजी क्षेत्रले समेत इन्टरनेट सेवा लिन नपाएको गुनासो गर्न थालेपछि टेलिकमले क्षमता बढाएको हो । ‘हाल भइरहेका टावरमा क्षमता र नयाँ प्रविधि थपेर सेवा दिन लागेका हौं’ शर्माले भने, ‘थ्रीजीका लागि असारसम्ममा सबै व्यवस्था भइसक्नेछ ।’

नयाँ थप गर्न लागिएका टावरमा भने सुरुबाटै ४ जी सेवा जडान हुनेछ । सबै टावर ठडिँदा चालु वर्षभित्र १ सय ३५ टावरबाट धौलागिरी क्षेत्रको सेवा सञ्चालन हुनेछ । टेलिकमले चालु वर्षभित्रै सक्नेगरी बागलुङ बजारमा तामाको ताररहित सेवा विस्तार गर्न लागेको छ । अप्टिकल फाइबरमार्फत सेवा दिन जडानको काम सुरु भएको छ ।

‘यो वर्ष कम्तीमा २ हजार ५ सय २० डिभाइस जोडेर सेवा दिंँदैछौं’ शर्माले भने, ‘सेवा सुरुपछि इन्टरनेटको क्षमता बढ्नेछ ।’ अप्टिकल फाइबरमार्फत सेवा प्रवाह गरेर टेलिभिजन हेर्न सकिनेछ ।

प्रकाशित : जेष्ठ ९, २०७६ ०९:५४
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×