रातो स्टिकर लगाइएको भवनमा अदालत

कान्तिपुर संवाददाता

बागलुङ — चार वर्षअघिको भूकम्पले उच्च अदालत पोखराको बागलुङ इजलासको भवनमा क्षति पुग्यो । उपल्लो तलामा राखिएका २ इजलास बस्नै नमिल्ने भयो । प्राविधिकहरूले भवन प्रयोग गर्न जोखिमपूर्ण भएको भन्दै रातो स्टिकर टाँसिदिएका छन् ।

रातो स्टिकर टाँसेको निजी आवासमा प्रशासनले बस्न दिँदैन । धेरै निजी आवास भत्काएर बनाउने क्रममा छन् । तर, अदालतको नयाँ भवन बनाउने योजना अगाडि बढ्न सकेको छैन । अहिले टहरोमा इजलास नम्बर १ र २ बनाइएको छ । न्यायाधीशका च्याम्बर पनि छाप्रोमै छन् । मूल भवनको तल्लो तलामा रजिस्ट्रार, शाखा अधिकृतहरू, प्रशासन, लेखालगायत छन् ।

'जुनसुकै बेला भवनमा खतरा हुन सक्छ भनिएको छ तर हामी यही बसेर काम गर्न बाध्य छौं,' रजिस्ट्रार धु्रवकुमार ढकालले भने, 'सर्वोच्च अदालतमा भवनको समस्याबारे पुगे पनि बनाउने गरी बजेट विनियोजन भएर आएको छैन ।' पटकपटकको पहलपछि आगामी आवको बजेट पाउने आश्वासन पाएको उनले बताए । बजेट आएपछि मात्र भवन बनाउन सकिने भएकाले नआएसम्म आस गर्ने मात्र काम भएको उनले टिप्पणी गरे ।

अदालत तत्कालीन धौलागिरी अञ्चलका ४ जिल्लाको अभिलेखालय पनि हो । चारवटै जिल्लाका अदालतको रेकर्ड, लगत र अन्य महत्त्वपूर्ण विवरण छन् । कर्मचारी, न्यायाधीशसमेत गरी धेरै दरबन्दी हुने भएकाले भवन अत्याधुनिक हुनैपर्ने ढकालको भनाइ छ । 'सबै जिल्ला अदालत अत्याधुनिक, बालमैत्री, सूचनामैत्री र र्‍यामसहितका बनेका छन्,' मुख्य न्यायाधीश हरिप्रसाद पौडेलले भने, 'अभिलेखालयसमेत भएकाले अब ढिला नगरी भवन बनाउनैपर्छ ।'

अदालतको हाल ७ रोपनी मात्र रहेकाले आवश्यकताअनुसार भवन बनाउन जमिन अभाव नहुने उनले बताए । राष्ट्रिय पुनर्निर्माण प्राधिकरणले जिल्लाका भौतिक संरचनाको निर्माण गरिरहेको छ । जिल्लाभरका विद्यालय, निजी आवास र सडक निर्माणमा प्राधिकरणले काम गरे पनि अदालत भवनमा सरकारी बजेट र स्टिमेट चाहिएकाले सर्वोच्चकै कार्यक्रममा सूचीकृत हुनुपर्ने प्रावधान छ । 'अदालत निर्माणका लागि तोकिएको बजेट आवश्यक पर्ने भएकाले ढिला भएको हो,' ढकालले भने, 'अर्को वर्ष भवन बन्ने आशा छ ।'

प्रकाशित : वैशाख २७, २०७६ ०८:२६
प्रतिक्रिया
पठाउनुहोस्

हिरासतमै आत्महत्या प्रयास

रमेशकुमार पौडेल

चितवन — इलाका प्रहरी कार्यालय रत्ननगर टाँडीको हिरासतमा रहेका एक आरोपितले हिरासत कक्षको शौचालयभित्र आत्महत्या प्रयास गरेका छन् । आत्महत्याको प्रयास गर्ने व्यक्तिलाई उपचारका लागि भरतपुरको पुरानो मेडिकल कलेजको शिक्षण अस्पतालमा राखिएको छ । उनको अवस्था चिन्ताजनक छ ।

कालिका नगरपालिका-१ पदमपुरमा रहेको राष्ट्रिय आधारभूत विद्यालयमा ल्यापटप र कम्युटर चोरी भएपछि पदमपुर प्रहरी चौकीले समिर घिसिङ र अर्का एकजनालाई समातेर बुधबार टाँडी प्रहरीलाई बुझाएको थियो । तीमध्ये समिरले बिहीबार दिउँसो तीन बजे हिरासत कक्षभित्र रहेको शौचालयमा आफूले लगाएको सर्टको पासो बनाएर आत्महत्याको प्रयास गरेको इलाका प्रहरी कार्यालय टाँडीका डिएसपी दयानिधि ज्ञवालीले बताए ।

बिहीबार दिउँसो भएको यो घटना सार्वजनिक भएपछि साँझपख आक्रोशित स्थानीयले टाँडी र पदमपुरको प्रहरी कार्यालयमा प्रदर्शन गरेका छन् ।

'हिरासत कक्षमा हिजो १३ जना थिए । त्यसमध्ये शौचालय गएका बेलामा समिरले त्यस्तो गरेछ । देख्ने हिरासतका व्यक्तिहरु नै थिए । उनीहरु चिच्याएपछि प्रहरी भित्र गएको हो । उद्धार गर्नेमा पनि हिरासत कक्षका आरोपित नै थिए' डिएसपी ज्ञवालीले भने । हिरासत कक्षमा भएको यो घटना सार्वजनिक भएपछि पदमपुरका स्थानीयहरु प्रर्दशन गर्दै टाँडी प्रहरी कार्यालयमा पुगेका थिए ।

'प्रदर्शनकारीहरु निकै उग्र थिए । उनीहरुले प्रहरी कार्यालयमा नै ढुंगामुडा गरे । हामीले अश्रुग्यास हानेर हटाउनु पर्‍यो र साँझपख उनीहरुले रत्ननगरमा पूर्व-पश्चिम राजमार्ग बन्द गर्ने प्रयास पनि गरे । हामीले त्यहाँबाट पनि हटायौं । फेरि पदमपुर चौकी पुगेर प्रदर्शन र ढुंगामुडा गरे' चितवन जिल्ला प्रहरी कार्यालयका प्रमुख रहेका प्रहरी उपरीक्षक (एसपी) सुशिलसिंह राठौरले जानकारी दिए । राति १० बजेसम्म स्थानीयले प्रदर्शन गरेको उनले बताए ।

प्रहरीले ३७ जनालाई पक्राउ गरेको छ । २९ वटा मोटरसाइकल पनि नियन्त्रणमा लिएको एसपी राठौरले जानकारी दिए । आत्महत्याको प्रयास गरेका घिसिङको आईसीयूमा उपचार भइरहेको छ । प्रहरीका अनुसार उनको अवस्था चिन्ताजनक छ ।

प्रकाशित : वैशाख २७, २०७६ ०८:२०
पूरा पढ्नुहोस्
प्रतिक्रिया
पठाउनुहोस्