नुवाकोट — विदुर नगरपालिकाको एक होटलमा दुप्चेश्वर गाउँपालिका ६ का एक स्थानीय मृत फेला परेका छन् । दुप्चेश्वर गाउँपालिका ६ ढाँडखर्कका ४५वर्षीय स्थानीय जीतबहादुर तामाङ मोक्तान होटलमा मृत अवस्थामा फेला परेको जिल्ला प्रहरी कार्यालयका सूचना अधिकारी एवं डीएसपी रुपक खड्काले बताए ।
उनको शव पोस्टमार्टमका लागि जिल्ला अस्पताल त्रिशुली लगिएको छ । उनको मृत्यु भएको सम्बन्धमा अनुसन्धान भइरहेको प्रहरीले जनाएको छ ।
सिरहा — प्रहरीले लागूऔषधसहित सिरहाका विभिन्न स्थानबाट चार जनालाई पक्राउ गरेको छ ।
जिल्ला प्रहरी कार्यालय सिरहाका अनुसार धनगढीमाई नगरपालिका–१२ स्थित कुस्माहाबाट ९२ किलोग्राम गाँजासहित भगवानपुर गाउँपालिका–४ का शिवनाथ मण्डल, बेचु मण्डल र सप्तरी बोदेवसाइन ९ का रामकुमार साहलाई पक्राउ गरेको हो ।
चार वटा बोरामा बोकेर लैजाँदै गर्दा कुस्माहास्थित खुट्टी खोलाबाट उनीहरुलाई पक्राउ गरिएको प्रहरीले जनाएको छ । त्यसैगरी, सिरहाको नवराजपुर गाउँपालिका–५ कुसुन्डीबाट लागूऔषध डाइजेपाम ३ सय १ एम्पुल, बुप्रेनोर्फिन ३ सय १ एम्पुल, फेनारगन ३ सय १ एम्पुलसहित सिन्धुलीका १९ वर्षीय सरु नेपालीलाई पक्राउ गरेको छ । भारतबाट बा ७८ प ७९१६ नम्बरको मोटरसाइकल समेत नियन्त्रण लिएको प्रहरीले जनाएको छ ।
प्रकाशित : मंसिर २६, २०७९ १०:३२
