भत्ता पाउनै सकस- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

भत्ता पाउनै सकस

राजकुमार कार्की

सिन्धुली — तीनपाटन गाउँपालिका–१ की ८२ वर्षीया विष्णुमाया भोलनलाई यो पटक सामाजिक सुरक्षा भत्ता पाउन निकै कठिनाइ भयो । सदरमुकाम सिन्धुलीमाडीस्थित बैंकबाट भत्ता बाँडिने भएपछि उनीसहितका जेष्ठ नागरिक, एकल महिलालगायत सूचीकृत भएकाहरू सार्वजनिक  बसमा ठेलमठेल गर्दै आइपुगे ।

तीनपाटन–१, २ र ३ गरी तीनै वडाको भत्ता एकै दिन वितरण गर्ने भनिएपछि बुधबार सडकसम्मै लामो लाइन लाग्यो । जसकै कारण विष्णुमायाले १ दिन कुर्नुपर्‍यो । बुहारीको साथमा आएकी विष्णुमायाले भत्ता वितरण गर्नेले दुःख दिएको गुनासो पोखिन् ।

‘दसैं मान्नका लागि सरकारले दिएको पैसा लिन आएको, यहाँ त लाइन लगाएको रहेछ,’ उनले भनिन्, ‘लाइनमा उभिन सकिँदैन । त्यही भएर सबैको पालो पुगेपछि लिउँला भनेको पाइएन । २ दिन लाग्यो ।’

उनले ३ महिनाको ४ हजारका दरले १२ हजार रुपैयाँ त बुझिन् तर सास्ती त्योभन्दा बढी खेपिन् । भत्ता बुझ्न यसपटक निकै सकस भएको अन्य ज्येष्ठ नागरिकको पनि गुनासो थियो । तीनपाटनबाट ४ घण्टा लगाएर गाडीमा सदरमुकाम आइपुग्नुपर्ने र भनेको समयमा पनि नपाउँदा यतै बास बस्नुपर्ने बाध्यता उनीहरूको भनाइ थियो । तीनपाटन–१ कै ७६ वर्षीया लालमाया भोलनले भत्ता आएको रकम कोठाभाडा र खानामा खर्च गर्नुपर्दा धेरै नबचेको सुनाइन् ।

‘हाम्रो लिखत हेरेर दिने पैसा दिनुनी । यो पुगेन र यो भएन भनेको छ । भित्र मारामार छ । जे होला भनेर बाहिर बसेका छौं,’ सडकपेटीमा कुरेर बसेकी उनले दुःख नदिन आग्रह गरिन्, ‘गाउँमै ल्याएर दिए राम्रो हुन्थ्यो । हामी बूढाबूढी मान्छे, आउजाउ गर्नै सकस हुन्छ, त्यहीमाथि भनेको समयमा पैसा पाइँदैन ।’ वडाहरूले एकैदिन सबैलाई पठाएकाले वितरणमा समस्या भएको नेपाल इन्भेस्टमेन्ट बैंकका कर्मचारीहरूले बताए ।

तीनपाटन मात्र होइन, सदरमुकामका सबैजसो बैंकहरूमा सामाजिक सुरक्षा भत्ता लिन ज्येष्ठ नागरिकलाई सकस पर्छ । यस्तो समस्या आउन नदिन बैंकका कर्मचारी र पालिकाले बेलैमा सजगता अपनाउनुपर्ने पत्रकार महासंघ सिन्धुलीका अध्यक्ष कृष्णहरि घिमिरे बताउँछन् । भन्छन्, ‘राज्यले सामाजिक सुरक्षा भत्ता दिएपछि सहज वितरणको जिम्मा स्थानीय सरकारले लिनुपर्छ । घरमै भत्ता दिन्छौं भनेर भोट खाने अनि अहिले सास्ती दिने हुँदैन,’ उनले भने ।

प्रकाशित : आश्विन १४, २०७९ ११:०२
प्रतिक्रिया
पठाउनुहोस्

कार्यकाल सकिँदा पनि बनेन प्रदेशसभा भवन

१८ महिनामा निर्माण सक्नुपर्ने सभाहलको काम २४ महिनामा ७० प्रतिशत मात्रै
सुवास विडारी

मकवानपुर — मंसिर ४ मा हुने निर्वाचनमा विजयी भएर आउने वाग्मती प्रदेशका सांसदहरूले साबिककै प्रदेशसभा भवनबाट आफ्नो कार्यकाल सुरु गर्नुपर्नेभएको छ । प्रदेशसभाको बैठक राख्ने प्रयोजनका लागि हेटौंडा–१० टीसीएन रोडमा निर्माण सुरु गरिएको नयाँ सभाहलको काम समयमै सम्पन्न नभएपछि यस्तो अवस्था आएको हो ।

२०७७ कात्तिकमा निर्माण सम्झौता भएको ट्रस्टको सभाहल निर्माण सुस्त गतिमा अगाडि बढिरहेको छ । सम्झौता भएको समयदेखि हालसम्म करिब २४ महिनाको अवधिमा सभाहल निर्माणको काम ७० प्रतिशत मात्र सकिएको छ । सभाहल निर्माणको ठेक्का अवधि समाप्त भइसक्दा पनि निर्माण कार्य सम्पन्न भएको छैन । सहरी विकास तथा भवन कार्यालय हेटौंडाका अनुसार ३ पटकसम्म निर्माण कम्पनीलाई समयमै काम सक्न पत्र काटे पनि कुनै पनि उपलब्धि नभएको हो ।

शहरी विकास तथा भवन कार्यालय हेटौंडाका प्रमुख घनश्याम श्रेष्ठका अनुसार १८ महिनामा सम्पन्न गर्नेगरी भवनको ठेक्का लगाइए पनि विभिन्न बहानामा निर्माण कम्पनीले समयमा काम नगरेको हो । सभाहल निर्माणका लागि अर्घाखाँची सगुन पारामाउन्ट जेभीलाई १८ महिनाको म्याद दिएर ठेक्का लगाइएको थियो ।

सम्झौताअनुसार निर्माण कम्पनीले २०७९ वैशाख २१ भित्र सभाहल बनाई सक्नुपर्ने थियो । तर, अझै ३० प्रतिशत काम बाँकी छ । ‘अहिलेकै गतिमा काम भयो भने पनि कम्तिमा माघसम्म त लाग्छ होला नै,’ श्रेष्ठले भने । उनका अनुसार भवनको ‘फिनिसिङ’ को काम सुरु नै भएको छैन । विद्युतीकरण, साउन्ड सिस्टम जडान, फल्स सिलिङ हाल्ने, सजावट गर्नेलगायत काम पनि बाँकी छन् । कार्यालयले माघभित्रमा काम सक्ने गरी थप समय कम्पनीलाई उपलब्ध गराउने तयारी गरिरहेको उनले बताए ।

‘हामी निर्माण कम्पनीलाई समय थप्ने प्रक्रियामा छौं । निवेदन पनि प्राप्त भएको छ,’ उनले भने । उनले नयाँ प्रविधिको काम भएका कारण पनि समयमा निर्माण सामग्री प्राप्त नभएकाले सभाहल निर्माणको काममा प्रगति नदेखिएको बताए । कोरोना संक्रमणको जोखिमले सामग्री आयातमा समस्या हुँदा निर्माण कार्यमा ढिलाइ भएको ठेकेदार पक्षको पनि भनाइ छ ।

तत्कालीन समयमा क्षेत्रीय शिक्षा निर्देशनालय रहेको भवनमा प्रदेशसभा सचिवालय स्थापना गरिएको थियो । हालसम्म सोही भवनबाट प्रदेशसभाको काम कारबाही सञ्चालन भइरहेको छ । २ सय ५० जना अट्ने यो सभाहल ईपीएस स्यान्डविच प्रविधिबाट निर्माण भइरहेको छ । सभाहल निर्माणका लागि सहरी विकास तथा भवन कार्यालयले ७ करोड ४१ लाख लागत अनुमान गरेको थियो भने घटाघट विधिअनुसार ४ करोड ९४ लाख रुपैयाँमा ठेक्का लगाएको थियो ।

प्रदेश सरकार स्थापना भएको ५ वर्ष पूरा भइसकेको छ । २०७४ माघ १८ मा प्रदेशसभा सचिवालय स्थापना गरी हेटौंडाबाट काम कारबाही थालिएको थियो ।

प्रकाशित : आश्विन १४, २०७९ ११:०२
पूरा पढ्नुहोस्
प्रतिक्रिया
पठाउनुहोस्
×