धादिङमा बजार अनुगमन तीव्र- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

धादिङमा बजार अनुगमन तीव्र

सरिता श्रेष्ठ

धादिङ — धादिङका होटल तथा खाद्यान्न पसलमा अनुगमन तीव्र पारिएको छ । चाडपर्व आउनुपूर्व हरेक वर्षजस्तै यस वर्ष पनि अनुगमन कार्यलाई तीव्रता दिइएको जिल्ला प्रशासन कार्यालय धादिङले जनाएको छ । प्रशासन कार्यालय र जिल्ला घरेलु कार्यालय धादिङको संयुक्त आयोजनामा जिल्लाको राजमार्ग क्षेत्र, धादिङबेसी बजार क्षेत्र तथा ग्रामीण क्षेत्रका बजार अनुगमन गरिएको हो ।

अनुगमनका क्रममा सोमबार पृथ्वी राजमार्गअन्तर्गत गजुरी, बेनिघाट रोराङ र सिद्धलेक गाउँपालिकामा सञ्चालित होटल, पसल, कोल्ड स्टोर्स तथा सप्लायर्सहरूलाई जरिवानासमेत गरिएको छ । चारवटा होटल तथा खाजाघर, आठवटा सप्लायर्स तथा किराना पसल गरी १२ वटा फर्महरूको अनुगमन गरिएको थियो । अनुगमनका क्रममा करिब १५ हजार ६ सय रुपैयाँ बराबरको म्याद गुज्रेका र अखाद्य वस्तुहरू जफत गरी नष्ट गरिएको छ ।

अनुगमन समितिले मापदण्डविपरीत सञ्चालनमा आएका राजमार्ग क्षेत्रका ६ वटा पसललाई कारबाहीस्वरुप जरिवाना गराएको छ । बेनिघाट रोराङ ३, शीतल बजारमा सञ्चालित होटल तीन भाइलाई १० हजार, भैरवीनाथ भोजनालयलाई २० हजार, श्रवण होटललाई ५ हजार, गजुरी गाउँपालिका २ मा सञ्चालित दनै सप्लायर्सलाई ५ हजार, रावल सप्लायर्सलाई ५ हजार र सिद्धलेक गाउँपालिका १ बैरेनीको वारीपारी इन्टरप्राइजेजलाई ५ हजार रुपैयाँ जरिवाना तिराइएको छ ।

अनुगमन टोलीले जिल्लाको नेत्रावती डबजोङ, त्रिपुरासुन्दरी गाउँपालिकामा पनि अनुगमन गरिएको छ । नेत्रावती डबजोङ ३ र ४ मा ८ वटा किराना पसल र एउटा होटलमा अनुगमन गरिएको छ । ९ वटा फर्ममा गरिएको अनुगमनमा १० हजार २ सय रुपैयाँ बराबरको म्याद गुज्रेका तथा सडेगलेका सामानहरूसमेत जफत गरिएको छ । अनुगमनका क्रममा जे.पी. श्रेष्ठ इन्टरप्राइजेजलाई १० हजार, श्रेष्ठ स्टोर्सलाई ५ हजार, सामरी सप्लायर्सलाई ५ हजार र प्रेमिका किराना स्टोर्सलाई ५ हजार रुपैयाँ जरिवाना तिराइएको छ ।

त्रिपुरासुन्दरी गाउँपालिका २ को कमल किराना स्टोरलाई ५ हजार, सुमन फार्मेसीलाई ५ हजार रुपैयाँ जरिवाना तिराइएको छ । ग्रामीण क्षेत्रमा सञ्चालित किराना पसलहरूमा म्याद गुज्रिएका सामानहरू बढी भेटिने गरेका छन् । कारबाहीमा परेका होटलहरूले निर्धारित मूल्यभन्दा बढी रकम लिएको; सरसफाइमा ध्यान नदिएको पाइएकाले जरिवाना तिराइएको जिल्ला प्रशासन कार्यालय धादिङले जनाएको हो । उपभोक्तालाई सचेत बन्न र गुनासो गर्ने बानी बसाल्न जिल्ला अनुगमन टोलीले आग्रहसमेत गरेको छ ।

आफ्ना व्यवसायहरू दर्ता गरी व्यवस्थित रुपमा सञ्चालन गर्न धादिङ उद्योग वाणिज्य संघ र स्थानीय तहहरूले पनि अनुरोध गरिरहेका छन् । नीलकण्ठ नगरपालिका ३ का वडाध्यक्ष राजकुमार श्रेष्ठले आफ्ना व्यवसाय स्थलमा सबैले देख्ने ठाउँमा मूल्यसूची राख्न, म्याद नाघेको तथा अखाद्य सामान बिक्री नगर्न अनुरोध गरेको छ । ‘ढक तराजु अनिवार्य प्रमाणित गरेको हुनुपर्छ’, उनले भने, ‘चाडपर्वमा भीडभाड हुने र दैनिक उपभोग्य सामानहरूको मूल्य बढाइने भएका कारण सचेत रहनुपर्छ ।’

चाडपर्वको मौका छोपेर विशेष त पृथ्वी राजमार्गअन्तर्गत धादिङ जिल्लामा सञ्चालित होटलहरूले खाना, खाजाको मूल्य बढी लिने गरेको गुनासो यात्रुहरूले गर्दै आइरहेका छन् । बढी नै मूल्य तिरे पनि स्वच्छ, ताजा र गुणस्तरको वस्तु तथा चीजहरू खान पाएका छैनन् । गत भदौ दोस्रो साता १८ वटा होटल तथा खाजा घरहरूको अनुगमन गरिएकोमा ११ वटा होटललाई कारबाही गरिएको थियो । जिल्लाका विभिन्न स्थानमा अखाद्य वस्तुको बिक्री भएको; तोकिएको मूल्यभन्दा बढी रकम लिएको र सरसफाइमा ध्यान नदिएको भन्ने गुनासो आएपछि बजार अनुगमनलाई तीव्रता दिइएको बताइएको छ ।

प्रकाशित : आश्विन ११, २०७९ १८:०४
प्रतिक्रिया
पठाउनुहोस्

जीर्ण सडकमा जोखिमपूर्ण यात्रा

‘हरेक वर्ष सडक भासिएर तलतल पुगेको छ; कुनै दुर्घटना नभएसम्म सडक मर्मतबारे कसैको चासो जाँदैन ।’
सरिता श्रेष्ठ

धादिङ — कालुपाण्डे मार्गअन्तर्गतको धादिङबेसी-फूर्केखोलाको १८ किलोमिटर सडक, घुमाउरो बाटो, ठाउँ-ठाउँमा भास्सिएको सडक । हरेक डेढ-दुई सय मिटरमा ठूला-ठूला घुम्ती । घुमाउरो

कालोपाण्डे मार्ग अन्तर्गत धादिङको नीलकण्ठ नगरपालिका वडा नं. ८ दारेगौडामा भासिएको सडक । तस्बिर : सरिता/कान्तिपुर  

सडकले पहिलो पटक धादिङबेसी घुम्न आउने जो कोहीलाई यादगार बनाइदिन्छ । तर‚ त्यही सडक अहिले पहिरोको चपेटामा परेको छ । कहिले माथिबाट पहिरिने त कहिले तलबाट भासिँदा यात्रा जोखिमपूर्ण बनेको छ ।

नीलकण्ठ नगरपालिका वडा नं. ८ दारेगौडामा हरेक वर्ष झैं यस वर्ष पनि सडक भास्सिएको छ । सडक भास्सिएर एक मिटरभन्दा तल पुगेको छ । तर‚ मर्मत सम्भार हुन नसक्दा दैनिक सयौं सवारी साधनहरू जीर्ण सडकमा जोखिम मोलेरै यात्रा गर्न बाध्य छन् । हरेक वर्ष बर्खामा सडक भासिने र माटोले पुरेर सञ्चालन गरिँदै आएको स्थानीय अगुवा भरत ढुङ्गानाले बताए ।

‘सडक भासिएर जोखिम बनेको हामी सबैलाई थाहा छ । दिनमा २/५ पटक ओहोरदोहोर गर्नु पर्छ । जोखिम मोलेरै हामी यात्रा गरिरहेका छौं‚’ उनले भने, ‘तलबाट खोलाले सडक तानिरहेको छ; माथिबाट पहिरिरहेको छ ।’

दारेगौडामा पहिरोका कारण कालुपाण्डे मार्ग भासिएपछि यसले थप जोखिम निम्त्याएको छ । ‘हरेक वर्ष सडक भासिएर तलतल पुगेको छ, कुनै दुर्घटना नभएसम्म सडक मर्मतबारे कसैको चासो जाँदैन,’ उनी भन्छन्, ‘बाटोका कारण हामी चालक, यात्रा गर्ने यात्रु र बाटो हिँड्ने सबैको ज्यान र पेशा दुवै धरापमा छ ।’ दैनिक सयौं सवारी यहि पहिरोमा जोखिम मोलेरै आवातजावत गरिरहेका छन् । कतिपय यात्रुहरू बाटो देखेर डराउने र झर्न हतारिने गरेको उनले बताए ।

कालुपाण्डे मार्ग २०५७ सालमा पिच गरिएको हो । तर‚ सडक पिच हुनुभन्दा पहिलेदेखि आवतजावत बन्द हुने गरी पहिरिँदै आएको छ । सडक पिच गरिएपछि पनि समस्या समाधान भएन । न लगातार पहिरिने क्रम रोकियो न मर्मत भयो न त वैकल्पिक बाटो नै खोजियो । अझै पनि हरेक वर्ष भासिने; चिरा पर्ने र सडक बिचैमा भ्वाङ पर्ने गरेको छ । पहिरोकै कारण यात्रुहरू जीर्ण सडकमा जोखिम मोलेरै यात्रा गर्न बाध्य छन् । तर पहिरो रोक्ने दिगो उपाय भने अझै खोजिएको छैन ।

पहिरो रोक्न खोला किनारदेखि नै वाल उठाएर मर्मत गर्नुपर्ने देखिन्छ । मर्मतको नाममा पहिलो पटक यो वर्ष केहि भागमा ग्याबिन जाली लगाइयो । प्राविधिक योजनाबिनै लगाइएको जाली सडकसँगै दबिएको छ । तलबाट तानिएर पहिरिएको जानकारी नभएको भन्दै कालुपाण्डे मार्गका सुपरभाइजर अर्जुन सापकोटा पन्छिन खोजेका छन् । ‘तलैबाट भासिएको पहिले जानकारी भएको भए ग्याबिन जाली पनि तलैबाट लगाएर मर्मत गरिन्थ्यो तर हामीले माथी मात्रै जाली लगाउँदा जालीसहित पुन: सडक भासियो‚’ उनले भने, ‘मर्मतका लागि टेन्डर भैसकेको छ । अब छिट्टै मर्मत कार्य सुरु गर्छौं तर दिगो व्यवस्थापनका लागि स्वायल टेस्ट गरेर मात्रै काम अघि बढाउनुपर्छ । अहिलेको मर्मत क्षणिक र बर्खाबाट जोगाउन मात्रै हो ।’

वैकल्पिक बाटोको रुपमा ससाह देउराली चौताराबाट इट्टाभट्टा, ससाह खोला, मैदी भन्ज्याङ हुँदै तल्लो ज्यामिरे निस्कन सकिन्छ । तर‚ कच्ची सडक खण्ड र सबै खालका सवारी साधन पार गर्न सक्ने अवस्था नुहँदा वैकल्पिक बाटो प्रयोगविहीन छ ।

वैकल्पिक बाटो प्रयोग गर्दा सवारी साधनले करिब दुई किलोमिटरभन्दा बढी दूरी पार गर्नुपर्ने हुन्छ । तर‚ इट्टाभट्टादेखि मैदी भन्ज्याङ छिचोल्ने सडकमा हिलो र खाल्डाखुल्डी छ । ससाह खोला र खेत आसपासका करिब पाँच सय मिटर दूरिको सडक बिग्रिएको छ । बिग्रेको सडकमा ग्राभेल गर्ने हो भने सबै खालका सवारी साधनहरू सहजै पार गराउन सकिन्छ । तर वैकल्पिक बाटो र जीर्ण बनेको कालुपाण्डे मार्गतर्फ कसैको ध्यान पुग्न सकेको छैन ।

गत वर्ष सिद्धलेकको मुक्तिनाथ मन्दिर नजिकै सडक भासिएको थियो । जाली लगाएर सडक मर्मत गरेपछि सुचारु छ । अहिले डिभिजन सडक कार्यालय नुवाकोटले धादिङबेसी-फूर्केखोला सडकखण्डको घुमाउरो मोडहरू कटिङ गरेर फराकिलो बनाएको छ, जसले गर्दा सवारीसाधनलाई सहज भएको छ ।

प्रकाशित : भाद्र २३, २०७९ १८:१३
पूरा पढ्नुहोस्
प्रतिक्रिया
पठाउनुहोस्
×