दोलखामा मिटरब्याजी पक्राउ
दोलखा — जिल्ला प्रहरी कार्यालय दोलखाले एक जना मिटरब्याजीलाई पक्राउ गरेको छ । पक्राउपर्नेमा काठमाडौं बस्दै आएका तेजविक्रम कार्की रहेका छन् ।
उनलाई प्रहरीले राजधानीबाट पक्राउ गरेर दोलखा ल्याइएको प्रहरी नायव उपरीक्षक गंगाप्रसाद पौडेलले बताए । तेजविक्रमले मिटरब्याज लिएको भन्दै मेलुङ गाउँपालिका–७ का प्रकाश कार्कीले प्रहरीमा जाहेरी दिएका थिए । स्रोतका अनुसार मिटरब्याजी तेजविक्रमले निर्माण व्यवसायी रहेका प्रकाशलाई एक करोड दिएर १२ करोड असुलउपर गर्न निर्माण कम्पनीका सबै सामान कब्जा लिएका थिए ।
पटक-पटक गरेर प्रकाशले करिब ४ करोड तेजलाई दिए पनि आरोपितले सबै सामान कब्जा गरेपछि प्रहरीमा जाहेरी दिएका थिए । तेजले शक्ति केन्द्रको आडमा चर्को ब्याज असुल गरेर पुराना मितिका चेकमा हस्ताक्षर गराएको पीडितको जाहेरीमा छ । पक्राउ परेका तेजमाथि थप अनुसन्धान भइरहेको पौडेलले बताए ।
प्रकाशित : आश्विन २, २०७९ १८:२९