अब धादिङ अस्पतालमै डायलाइसिस सेवा- वाग्मती - कान्तिपुर समाचार

अब धादिङ अस्पतालमै डायलाइसिस सेवा

सरिता श्रेष्ठ

धादिङ — धादिङ अस्पतालले डायलाइसिस सेवा सुरु गरेको छ । वाग्मती प्रदेश सरकारको सहयोगमा अस्पतालले शनिबार एक कार्यक्रम आयोजना गरी हेमोडायलाइसिस सेवा सुरु गरेको हो । वाग्मती प्रदेश सरकारका मुख्यमन्त्री राजेन्द्रप्रसाद पाण्डेले डायलाइसिस सेवाको उद्घाटन गरेका हुन् । अस्पतालमा सुरु गरिएको सेवा गुणस्तरीय र भरपर्दो बनाउन आग्रह गरेका छन् ।

उद्घाटन समारोहको सम्बोधन गर्दै मुख्यमन्त्री पाण्डेले अस्पतालमा डायलाइसिस सेवा सुरु गर्न जति जटिल छ । उत्तिकै सेवालाई गुणस्तर दिनु महत्वपूर्ण रहेको बताए ।

सेवा सुरु गर्नजस्तै सेवा राम्रो र निरन्तरता दिन खटिनु पर्छ । ‘चिकित्सकलाई तालिम दिएर सक्षम बनाउनुपर्छ । उनीहरुको क्षमता र व्यवहारले बिरामीको रोग निको हुन्छ,’ मुख्यमन्त्री पाण्डे भन्छन्, ‘सेवा प्रभावकारी बनाउनु हामी सबैको दायित्व हो ।’ धादिङ अस्पतालमा अहिले ५० शय्या क्षमता छ । आगामी वर्ष एक सय शय्या क्षमताको सुविधासम्पन्न अस्पताल बनाउने लक्ष्यसहित अस्पताललाई सुधार गर्नुपर्ने उनले बताए ।

बढी खर्चिलो हुने र बिरामीले विभिन्न समस्या भोग्नु परेका कारण उनीहरुलाई सहज बनाउन धादिङ अस्पतालमै डायलाइसिस सेवा सुरु गरिएको अस्पताल व्यवस्थापन समितिका अध्यक्ष महेन्द्र धमलाले बताए ।

चार वटा डायलाइसिस उपकरणसहित थालिएको सेवाले पहिलेदेखि डायलाइसिस गरिरहेका बिरामी लाभान्वित हुने अध्यक्ष धमलाले बताए । हेमोडायलाइसिस र पेरिटोनल डायलाइसिस गरी मिर्गोला रोगीहरुलाई दुई प्रकारले डायलाइसिस गर्ने गरिन्छ । धादिङ अस्पतालमा थालिएको हेमोडायलाइसिस हो । कुनै पनि रोगका कारण मिर्गौलामा असर पर्‍यो भने धादिङ अस्पतालमा डायलाइसिस गर्न सकिने अनमी अस्मिता भुसाल बताउँछिन् । आकस्मिक सबै बिरामीलाई डायलाइसिस गर्न सकिन्न । उनी भन्छिन्–‘मधुमेह, उच्च रक्तचाप, फोक्सोको समस्या लगायतका रोगका कारण मिर्गौलामा समस्या देखिएका बिरामीलाई धादिङ अस्पतालमा डायलाइसिस सेवा दिन सकिन्छ ।’


प्रकाशित : श्रावण २१, २०७९ २१:५६
प्रतिक्रिया
पठाउनुहोस्

प्यालेस्टिनी इस्लामिक समूहमाथि इजरायलको आक्रमण

– ५ वर्षे बालकसहित कम्तीमा १५ जनाको मृत्यु
– १९ हतियारधारीलाई पक्राउ गरेको इजरायको दाबी
एजेन्सी

जेरुसेलम — इजरायलली सुरक्षा फौजले गाजा स्ट्रिपका विभिन्न क्षेत्रमा गरेको हवाई आक्रमणमा कम्तीमा १५ जना प्यालेस्टिनी मारिएका छन् । ज्यान गुमाउनेमा ५ वर्षीय बालक र प्यालेस्टिनी इस्लामिक जिहाद (पीआईजे) नेता तैसीर जबारीसहित ४ जना पीआईजेका लडाकुसमेत छन् ।

तस्बिर : रोयटर्स


इजरायलले अधिनस्थ वेस्ट बैंकमा छापा मारेर पीआईजे समूहका १९ जना सदस्यलाई पक्राउ गरेको दाबी गरेको छ । स्थानीय स्वास्थ्य अधिकारीहरूले अन्य ५५ जना मानिसहरू घाइते भएको जनाएका छन् । इजरायली सेनाका एकजना प्रवक्ताले करिब १५ जना लडाकु मारिएका अनुमान गरेको जनाएका छन् ।

पीआईजे समूहको धम्कीपछि आफूहरूले हवाई आक्रमण गरेको इजरायलको भनाइ छ । इजरायली सेनाले गाजा क्षेत्रबाट शुक्रबार राति दर्जनौं रकेटहरू प्रहार गरिएको र तीमध्ये अधिकांशलाई निस्तेज पारिएको जनाएको छ ।

इजरायल र प्यालेस्टाइनबीच लामो समयदेखि द्वन्द्व जारी छ । तर करिब एक वर्षसम्म लगभग शान्त रहेको क्षेत्रमा एकाएक हिंसा भड्किएको हो । दुई पक्षबीच सन् २०२१ को मे महिनामा ११ दिन भइषण युद्ध भएको थियो । दुई पक्षबीच युद्धविराम सम्झौता हुनुअघिसम्म कम्तीमा २ सय प्यालेस्टिनी र १२ जना इजरायलीले ज्यान गुमाएका थिए ।

इजरायली सेनाले पछिल्ले सैनिक कारबाहीलाई ‘ब्रेकिङ डन’ नाम दिएको । यो कारबाही एक सातासम्म चल्न सक्ने उसको चेतावनी छ । तर गाजा क्षेत्रको मुख्य सैन्य समूह हमासले अझैसम्म आफ्ना ठूला क्षेप्यास्त्र भने प्रहार गरिसकेको छैन ।

हमास र पीआईजेबीचको विचारधारा मिल्ने भएकाले उनीहरूले प्रायः आपसी समन्वयमा काम गर्ने गर्छन् । तर पछिल्लो घटनाक्रमपछि हमासले ‘चुप लागेर नबस्ने’ चेतावनी दिएको छ । इरानको समर्थन रहेको पीआईजे गाजामा रहेका शक्तिशाली लडाकू समूहमध्येको एक हो । सिरियाको राजधानी दमास्कसमा मुख्यालय रहेको समूह इजरायलविरुद्ध क्षेप्यास्त्रलगायतका आक्रमणका लागि जिम्मेवार मानिन्छ । सन् २०१९ को नोभेम्बरमा इजरायलद्वारा पीआईजे कमान्डर मारिएपछि सुरु भएको युद्ध ५ दिनसम्म चलेको थियो । युद्धका क्रममा ३४ जना प्यालेस्टिनीले ज्यान गुमाएका थिए भने १ सय ११ प्यालेस्टिनी र ६३ इजरायली घाइते भएका थिए ।

इजरायलका आन्तरिक मामिलामन्त्री आइलेट सखिदले द्वन्द्व लामो समयसम्म जारी रहनसक्ने बताएकी छन् । ‘यो कस्तो हुन्छ भन्छ भन्ने हामीलाई नै थाहा छैन । तर यो लामो समय चल्न सक्छ र कठिन द्वन्द्वको चक्र बन्न सक्छ,’ स्थानीय सञ्चारमाध्यमसँग कुरा गर्दै उनले भनिन् ।

इरान भ्रमणमा रहेका पीआईजेका महासचिव जयद अल–नखलाले इजरायलाई आक्रमणमार्फत् जवाफ दिने बताएका छन् । ‘हामीले यसको बलपूर्वक जवाफ दिनेछौं । त्यहाँ लडाइँ हुन्छ र हाम्रा मानिसहरू विजयी हुनेछन्,’ उनले भने ।

शनिबार थप क्षेप्यास्त्र प्रहार गरिएका साइरन बजेपछि जवाफमा पीआईजे विद्रोहीलाई लक्षित गरी गाजा क्षेत्रमा हवाई आक्रमण गरिएको इजरायलले जनाएको छ । इजरायली प्रधानमन्त्रीले याइर लापिडल प्यालेस्टिनी इस्लामिक जिहाद (पीआईजे) बाट आफूहरूमाथि तत्काल जोखिम देखिएपछि सेनाले कारबाही गरेको बताएका छन् ।

पीआईजेका वेस्ट बैंक प्रमुख बसिम सादीलाई इजरायलले सोमबार पक्राउ गरेको थियो । त्यसको जवाफमा पीआईजेले इजरायलतर्फ सयभन्दा बढी रकेट प्रहार गरिसकेको छ । तर तीमध्ये अधिकांशलाई इजरायलको आइरन डोम क्षेप्यास्त्र प्रतिरक्षा प्रणालीले निष्क्रिय तुल्याइदिएको छ ।

त्यसपछि इजरायल डिफेन्स फोर्स (आईडीएफ) ले लडाकुका स्थान पहिचान गरी हवाई आक्रमण गरेको जनाइएको छ । आफूले निसाना बनाएका गाजास्थित प्यालेस्टाइन टावरसहितका स्थानहरू पीआईजेसँग सम्बन्धीत रहेका आईडीएफको दाबी छ ।

प्रकाशित : श्रावण २१, २०७९ २१:४०
पूरा पढ्नुहोस्
प्रतिक्रिया
पठाउनुहोस्
×