बैंकिङ कसुरका दोषी पक्राउ
रामेछाप — बैंकिङ कसुर गरेको अभियोगमा उच्च अदालत पाटनबाट दोषी प्रमाणित भएका रामेछापका तोरणबाबु श्रेष्ठलाई प्रहरीले मंगलबार पक्राउ गरेको छ । श्रेष्ठलाई उच्च अदालत पाटनले २०७७ साल जेठ २७ गते ४० लाख जरिवाना र १० दिन कैद फैसला सुनाएको थियो ।
अदालतको फैसलापछि फरार रहेका श्रेष्ठ काठमाडौंबाट रामेछाप आउँदै गरेको सूचनाको आधारमा प्रहरीले रामेछापको लुभुबाट पक्राउ गरेको हो ।
जिल्ला प्रहरी कार्यालय रामेछापका प्रहरी नायव उपरीक्षक नवराज ढुंगानाका अनुसार आफूसँग पैसा छैन, भन्ने जानकारी हुँदाहुँदै श्रेष्ठले पीडितलाई झुक्याउन चेक दिएका थिए ।
४४ वर्षीय श्रेष्ठ रामेछापको सुनापति गाउँपालिका ५ खनियापानीका हुन् । श्रेष्ठलाई मंगलबार नै जिल्ला अदालत रामेछापमा बुझाइएको छ ।
प्रकाशित : माघ ११, २०७८ १६:५७प्रतिक्रिया