९४ प्रतिशत संक्रमित घरमै- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

९४ प्रतिशत संक्रमित घरमै

संक्रमण बढेपछि आइसोलेसन सञ्चालन गर्न समुदायस्तरबाट माग
सुवास विडारी

मकवानपुर — वाग्मती प्रदेशका करिब ९४ प्रतिशतभन्दा बढी कोरोना संक्रमित होम आइसोलेसन मै बसिरहेका छन् । स्वास्थ्यकर्मीका अनुसार प्रदेशका अधिकांश संक्रमितहरू सिटामोलको भरमा घरमै छन् ।

दैनिकजसो संक्रमित बढे पनि उपचारका लागि अस्पताल जाने वा संस्थागत आइसोलेसनमा बस्नेको संख्या न्यून रहेको वाग्मती प्रदेश स्वास्थ्य मन्त्रालयले जनाएको छ । मन्त्रालयका अनुसार बिहीबार साँझसम्म वाग्मती प्रदेशमा ९ हजार ९ सय २७ जना सक्रिय संक्रमित छन् । जसमध्ये ९४ प्रतिशत अर्थात् ९ हजार ३ सय ९४ जना होम आइसोलेसनमा छन् ।

मन्त्रालयको तथ्यांकअनुसार १ सय ७७ जना संस्थागत आइसोलेसनमा र ३ सय ५६ जना अस्पतालमा उपचाररत छन् । मन्त्रालयका प्रवक्ता वसन्त अधिकारीका अनुसार संक्रमितको स्वाब परीक्षण गर्ने र उपचार गर्ने जिम्मेवारी जिल्ला अस्पतालाई दिइएको छ । ‘हामीले जिल्ला अस्पतालमा संक्रमितको उपचार गर्ने व्यवस्था मिलाएका छौं । उनीहरूसँग समन्वय गर्ने जिम्मेवारी जिल्ला स्वास्थ्य कार्यालयलाई तोकेका छौं,’ उनले भने ।

हेटौंडा उपमहानगरका जनस्वास्थ्य अधिकृत भोला चौलागाईंले संक्रमण दर बढेपछि आइसोलेसन सञ्चालन गर्ने माग समुदायस्तरबाट आएको बताए । तर ठोस निर्णय नभइसकेको उनले बताए । ‘कोरोनाको पहिलो र दोस्रो लहरमा हामी जसरी सक्रिय भएका थियौं अहिले छैनौं,’ चौलागाईंले भने । उनले संक्रमित बढेपछि अब कसरी अगाडि बढ्ने भनेर स्थानीय तहबीच समन्वय हुन बाँकी रहेको बताए ।

संक्रमितको पहिचान गरी आवश्यक उपचार गर्न प्रदेशको १३ जिल्लामध्ये रसुवाबाहेक सवैमा स्वाब परीक्षण गर्न पीसीआर ल्याब स्थापना गरिएको मन्त्रालयको दाबी छ । रसुवामा पीसीआर ल्याबको आवश्यकता नदेखिएका कारण स्थापना नगरेको मन्त्रालयले जनाएको छ ।

मन्त्रालयले अक्सिजनको अभाव नहोस् भनेर १२ वटा जिल्ला अस्पतालमा अक्सिजन प्लान्टको स्थापना गरिसकेको उनले बताए । ‘धादिङमा दुईवटा अक्सिजन प्लान्ट रहेका छन् । जसमध्ये एउटा रसुवामा जोड्ने तयारी भइरहेको छ,’ प्रवक्ता अधिकारीले भने । उनका अनुसार रसुवामा संक्रमितको संख्या ज्यादै न्यून रहेको र अक्सिजनको माग पनि नभएका कारण प्लान्ट स्थापना गर्न ढिलाइ गरिएको हो ।

बालबालिकाले खोप पाएनन्

सिन्धुली जिल्लामा १२ देखि १७ वर्ष उमेर समूहका विद्यार्थीले अझै कोरोनाविरुद्धको खोप लगाउने सुनिश्चतता पाएका छैनन् । खोप नआएकाले लगाउने टुंगो नभएको स्वास्थ्य कार्यालयले जनाएको छ । नयाँ भेरिएन्ट ओमिक्रोनको सम्भावित जोखिम रोक्न र १८ वर्षमुनिकालाई खोप लगाउन सरकारले माघ १५ गतेसम्म विद्यालय बन्द गरेको छ ।

१२ देखि १७ वर्ष उमेर समूहका विद्यार्थीलाई नजिकको स्वास्थ्य संस्थामा खोप लगाउन निर्देशन दिए पनि सिन्धुलीमा खोप अझै नआएकाले समस्या भएको स्वास्थ्य कार्यालय प्रमुख जितेन्द्र साहले बताए । पहिलो चरणमा खोप लगाउने उक्त उमेर समूहका विद्यार्थीको संख्या जिल्लामा ४० हजार ७ सय रहेको आंकलन छ । जिल्लाभरका सरकारी तथा निजी विद्यालयबाट तथ्यांक संकलन गरी सबै तयारी पूरा भए पनि खोपको मात्रा नै नभएपछि अन्योल भएको स्वास्थ्य कार्यालयले जनाएको छ ।

प्रकाशित : पुस ३०, २०७८ ०९:३३
प्रतिक्रिया
पठाउनुहोस्

नाकाबाटै भाग्छन् संक्रमित

भारतबाट फर्किने १०% भन्दा बढीमा संक्रमण पुष्टि, नाकामा निगरानी गर्नै मुस्किल
मोहन बुडाऐर, भवानी भट्ट

धनगढी, कञ्चनपुर — कैलालीको त्रिनगर–भन्सार नाकामा मंगलबार भारतबाट घर फर्केका तीन जना कोरोना संक्रमण पुष्टि भएलगत्तै एकाएक हराए । नाकास्थित हेल्थ डेस्कका इन्चार्ज गणेश साउद भन्दै थिए, ‘आँखा सामुन्नेबाटै गायब भए, कस्तो छल्न जान्या, कसरी खोज्ने होला ?’

उनका अनुसार नाकामा एन्टिजेन परीक्षण गर्दा उनीहरूमा संक्रमण देखिएको थियो । अलग्गै बस्न लगाएको र आइसोलेसन पठाउन एम्बुलेन्सको प्रतीक्षा गर्ने बेलासम्म त्यहाँबाट भागिसकेको उनले बताए ।

जिल्ला जनस्वास्थ्य कार्यालयले राखेको हेल्थ डेस्कमा भारतबाट फर्कने नेपालीको एन्टिजेन परीक्षणमा संक्रमित पाइए धनगढी उपमहानगरपालिकाले बेलीमा बनाएको आइसोलेसन केन्द्रमा पठाउने गरिएको छ । ‘पोजिटिभ देखिएकालाई छुट्याएर एक ठाउँमा राख्छौं । तर केही त आँखा छलेरै भाग्ने गरेका छन्,’ डेस्क इन्चार्ज साउदले भने ।

सातायता भारतबाट फर्कने नेपालीको संख्या एक हजार हाराहारी छ । तीमध्ये दैनिक ६/७ सय जनाको एन्टिजेन परीक्षण हुँदै आएको छ । संक्रमण पुष्टि भएकामध्ये ३/४ जना भाग्ने गरेको साउदले बताए । ‘संक्रमित देखिएका न आफ्नो चिन्ता गर्छन्, न त परिवार र समाजप्रति जिम्मेवार बनेका छन्,’ साउदले भने, ‘उनीहरू आइसोलेसनमा बस्नै मान्दैनन् । जबर्जस्ती पठाउनुपरेको छ ।’ संक्रमितलाई सुरक्षित रूपमा आइसोलेसनमा राख्न नसकिए नाकामा परीक्षण गर्नुको कुनै अर्थ नहुने उनले बताए ।

भारतमा कोरोनाको तेस्रो लहर बढेकाले रोजगारी गुमेर घर फर्कने नेपालीको संख्या फेरि बढेको छ । जनशक्ति अभावले हेल्थ डेस्कमा सबैको परीक्षण गर्न नभ्याइएको साउद स्विकार्छन् । ‘धेरै समय पर्खनुपर्दा पनि कोही परीक्षण नगरेरै हिँडिदिन्छन्,’ उनले भने, ‘१० देखि १५ प्रतिशत परीक्षण नगरी फुत्किने गरेका छन् ।’ नाकामा खटिएका प्रहरी र सशस्त्रको जनशक्ति पनि कम भएको उनले बताए ।

एक सय क्षमताको धनगढीस्थित आइसोलेसन केन्द्रमा बिहीबारसम्म ८० संक्रमित छन् । केन्द्र भरिन थालेपछि संक्रमितलाई राख्न समस्या भएको कैलाली जनस्वास्थ्य कार्यालय प्रमुख ललित धामीले बताए । अहिले पहाडी जिल्लाबाहेक कैलाली र कञ्चनपुरका संक्रमितलाई सम्बन्धित स्थानीय तहको जिम्मा लगाउन थालिएको छ । आइसोलेसनको व्यवस्थापन जनस्वास्थ्य कार्यालयले नै गरिरहेको छ । ‘बिहीबार एकै दिन १ सय १४ जना पोजिटिभ देखिएको अवस्थामा आइसोलेसनको थप व्यवस्थापन गर्नुपर्ने देखिन्छ,’ उनले भने, ‘अहिले सम्बन्धित वडाध्यक्षको सिफारिसमा पठाएका छौं ।’ हाल विभिन्न नाकामा खटिएका १८ स्वास्थ्यकर्मीलाई भ्याइनभ्याइ भएको उनले बताए ।

कैलालीका सहायक प्रमुख जिल्ला अधिकारी हीरालाल चौधरीले नाकामा सुरक्षाकर्मी अपर्याप्त भएको जानकारी आएको बताए । कैलाली त्रिनगर नाकाको सुरक्षा व्यवस्था कञ्चनपुरको प्रहरी प्रशासनले हेर्ने भएकाले दुवै जिल्लाबीच समन्वय गरेर थप सुरक्षाकर्मी परिचालन गर्नेतर्फ पहल गरिने उनको भनाइ छ । नाकामा खटिएका सशस्त्र प्रहरीका नायब निरीक्षक प्रेम खत्रीले पारिबाट आएका अटोरिक्सामा सिधै जाने गरेकाले पनि अलमल भइरहेको बताए ।

स्थानीय व्यवसायी हर्कबहादुर मडै नाकाबाट अनियन्त्रित रूपमा प्रवेश भइरहेकाले कोरोनाको डर बढेको बताउँछन् । ‘धेरै नेपाली फर्किरहेका छन्, कसैको परीक्षण भइरहेको छ, कोही परीक्षण नगराएरै भित्रिरहेका छन्,’ उनले भने, ‘नाकामा मेला लागेजस्तो हुन्छ, चार/पाँच सय मानिस जथाभावी घुमिरहेका हुन्छन् ।’ उनले भारतबाट भित्रिनेलाई यताउता जान नदिई सिधै होल्डिङ सेन्टरमा लगेर परीक्षण गर्ने व्यवस्था गर्न सके उचित हुने बताए ।

कञ्चनपुरको महेन्द्रनगरस्थित महाकाली प्रादेशिक अस्पतालमा बिहीबार ३६ जनाको स्वाब संकलन गरिएकामा करिब ५० प्रतिशत अर्थात् १७ जनामा संक्रमण पुष्टि भयो । बुधबार २४ जनाको परीक्षणमा १७ जनामा संक्रमण पुष्टि भएको थियो । केही दिनयता महाकाली प्रादेशिक अस्पतालमा परीक्षण गराउन आउनेको संख्या दिनहुँ दोब्बरले बढिरहेको छ । यति मात्रै होइन, परीक्षणका लागि अस्पताल पुग्नेमध्ये आधामा संक्रमण देखिन थालेको छ । ‘अवस्था निकै भयावह हुन सक्ने देखिन्छ,’ महाकाली प्रादेशिक अस्पतालको कोभिड फोकल पर्सन डा. गोविन्द रोकायाले भने, ‘संक्रमण फेरि समुदायमै फैलिएको अनुमान गर्न सकिन्छ ।’

दुई साताअघि कञ्चनपुरमा सक्रिय संक्रमितको संख्या १० भन्दा कम थियो । अहिले उक्त संख्या बढेर ५५८ पुगेको छ । जसमध्ये सय जनाभन्दा बढीलाई महाकाली अस्पतालको आइसोलेसनमा राखिएको छ । ‘५० बेडको आइसोलेसनमा दोब्बर संक्रमित राख्नुपरेको छ,’ डा. रोकायाले भने, ‘निर्माणाधीन होल्डिङ सेन्टर अझै तयार हुन सकेको छैन ।’ संघीय सरकारले महेन्द्रनगरको भगतपुरस्थित सालघारीमा निर्माण गर्न लागेको होल्डिङ सेन्टर तयार नहुँदासमेत बढी समस्या भएको हो । महाकाली प्रादेशिक अस्पतालको पीसीआर ल्याबका २ जना प्राविधिकमा समेत संक्रमण पुष्टि भएको ल्याब इन्चार्ज केशवराज जोशीले बताए ।

भारतबाट फर्किनेमध्ये १० प्रतिशतमा संक्रमण देखिन थालेको हो । बिहीबार गड्डाचौकी नाकाबाट भित्रिएका १ हजार २७६ को एन्टिजेन परीक्षण गर्दा १ सय ६ जनामा संक्रमण पुष्टि भएको छ । बुधबार भित्रिएका १ हजार ४६ मध्ये १ सय ६ जनामा संक्रमण पुष्टि भएको गड्डाचौकीस्थित हेल्थ डेस्कका इन्चार्ज तर्कराज भट्टले बताए । पछिल्लो एक सातामा मात्रै गड्डाचौकी नाकाबाट भित्रिएकामध्ये ४ सयभन्दा बढीमा संक्रमण देखिएको छ । अहिले १५ जना स्वास्थ्यकर्मी छन्, उनीहरूले बिहान ६ देखि बेलुकी ८ बजेसम्म दुई सिफ्टमा परीक्षण गरिरहेका छन् ।

प्रकाशित : पुस ३०, २०७८ ०९:३३
पूरा पढ्नुहोस्
प्रतिक्रिया
पठाउनुहोस्
×