घर भत्काए, अनुदान पाउने टुंगो छैन- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

घर भत्काए, अनुदान पाउने टुंगो छैन

टीकाप्रसाद भट्ट

रामेछाप — पुनर्निर्माणबापत ३ लाख रुपैयाँ अनुदान पाउने आसमा बसोबास गर्दै आएको घर भत्काएका भूकम्पपीडितहरू तत्कालीन राष्ट्रिय पुनर्निर्माण प्राधिकरणले समयमै निर्णय नगरिदिँदा अनुदानबाट वञ्चित भएका छन् ।

मर्मतको लाभग्राही सूचीमा परेका भूकम्पपीडितलाई पुनर्निर्माण गर्न पूरा अनुदान दिने प्रतिबद्धता प्राधिकरणले गरेको थियो । सोही आधारमा घर भत्काएका पीडितले मर्मतबापतको १ लाख रुपैयाँसमेत गुमाउनुपर्ने अवस्था देखिएको छ ।

मर्मतको लाभग्राही सूचीमा परेका पीडितले १ लाख र पुनर्निर्माणको सूचीमा परेकाले ३ लाख रुपैयाँ अनुदान पाउने व्यवस्था थियो । मर्मतको सूचीबाट पुनर्निर्माणको सूचीमा जान चाहेमा बसोबास गर्दै आएको घर भत्काएर नयाँ निर्माणको कबोल गर्नुपर्ने प्राधिकरणको निर्देशनपछि जिल्लाका झन्डै ७ सय जनाले बसोबास गर्दै आएको पुरानो घर भत्काएका थिए ।

घर भत्काउने पीडितहरू अहिले अर्को घरमा बसिरहेका छन्, केही छाप्रामा छन् । छाप्रामा हुने करिब ३ सय परिवारले घर बनाउन अनुदान पाउने टुंगो छैन । घर भत्काएकामध्ये केहीले अनुदानको निर्णय नआउँदै नयाँ घर बनाएर सरेका छन् । ‘घर बनाइसके तर लाभग्राही सूची परिवर्तन भएर आएन,’ मन्थली–११ का वडाध्यक्ष भीमबहादुर मगरले भने, ‘पीडितहरू झन् पीडित बने ।’

वडाका जनप्रतिनिधिहरूलाई समेत स्थानीयले दिनहुँ त्यसबारे गुनासो गर्दै आएको उनले सुनाए । लाभग्राही परिवर्तन गर्ने निकाय पुनर्निर्माण प्राधिकरण सरकारले खारेज गरिसकेको छ ।गत पुस ९ मा प्राधिकरण खारेज भएपछि लाभग्राही परिवर्तनबारेको निर्णय कुन निकायले गर्ने भन्ने अन्योल छ ।

नाम संशोधन र लाभग्राही परिवर्तनको निर्णय गर्ने अधिकार जिल्लामा रहेको इकाइलाई छैन । निजी आवास पुनर्निर्माणसम्बन्धी कार्य गर्दै आएको जिल्ला आयोजना कार्यान्वयन इकाइ (भवन तथा आवास) रामेछापको तथ्यांकमा जिल्लाबाट ५ हजार ८ सय २६ भूकम्पपीडितले पूर्ण अनुदान माग गर्दै सूची परिवर्तन गर्न आवेदन दिएका थिए । त्यसमध्ये ५ हजार ५ सय १७ जनाको मात्र लाभग्राही सूची परिवर्तन भएर आएको छ ।

इकाइका इन्जिनियर प्रदीप कुँवरका अनुसार लाभग्राही सूची परिवर्तन नहुँदा वडामा पुग्ने प्राविधिकले पीडितको हप्की खानुपरेको छ । ‘निर्णय गर्ने अधिकारी छैनन्, हामीले नागरिकको गुनासो समाधान गर्न सक्ने अवस्था छैन,’ उनले भने, ‘अझै पनि कतिपय वडाबाट लाभग्राही परिवर्तनका लागि फाइल लिइदिन आग्रह आउने गरेको छ ।’

प्रकाशित : पुस २९, २०७८ ०९:१७
प्रतिक्रिया
पठाउनुहोस्

माघे संक्रातिमा देवघाटमा मकर स्नान मेला नहुने  

रमेशकुमार पौडेल

चितवन — कोरोना संक्रमण बढ्दै गएपछि माघे संक्रान्तिका दिन देवघाटघाममा हुने मकर स्नान मेला यस वर्ष नहुने भएको छ । जिल्ला कोभिड–१९ व्यवस्थापन समिति (डीसीएमसी) चितवनको पुस २६ को बैठकले जिल्लाका सबैखाले मेला महोत्सवमा रोक लगाउने निर्णय गरेको थियो । त्यही निर्णयअनुसार देवघाटधाममा यो पटक मकर स्नान पनि नहुने भएको हो ।

चितवन, तनहुँ र नवलपुर जिल्लाको संगम रहेको देवघाटधाम कालीगण्डकी र त्रिशूली नदीको मिलनविन्दु हो । मेला व्यवस्थापनका लागि विभिन्न तयारीहरु पूरा भएको थियो ।

‘हामीले ९० प्रतिशत काम पूरा गरेका थियौं । तर पछिल्ला दिनहरुमा कोरोना संक्रमण ह्वात्तै बढेपछि चितवन जिल्ला प्रशासनले जे निर्णय गरेको छ, त्यसमा सहमत हुँदै यो वर्ष मेला नगर्ने निधोमा पुग्यौं,’ देवघाट क्षेत्र विकास समितिका कार्यकारी निर्देशक धिरन घिमिरेले भने । उनले रोगको जोखिमका कारण यो वर्ष देवघाट नआउन सर्वसाधरणलाई अपिल पनि गरे ।

चितवनमा पछिल्ला दिनहरुमा संक्रमण ह्वात्तै बढेको छ । चितवनमा आइतबारसम्म सक्रिय संक्रमितको संख्या जम्मा ८२ थियो । चितवन स्वास्थ्य कार्यालयबाट प्राप्त विवरणअनुसार बुधबार यो संख्या बढेर २४० पुगेको छ । २४ गतेसम्म जिल्लामा नौ जना संक्रमित थपिने गरेका थिए । त्यसपछि एकै दिन ४१, ४७ हुँदै बुधबार एकै दिन ८१ जना संक्रमित थपिएको स्वास्थ्य कार्यालयले जनाएको छ ।


प्रकाशित : पुस २९, २०७८ ०९:१४
पूरा पढ्नुहोस्
प्रतिक्रिया
पठाउनुहोस्
×