तमु ल्होसार हाफ म्याराथनको उपाधि दिवसलाई
ताप्लेजुङ — तमु ल्होसार २०७९ को अवसरमा आयोजित पुरुष हाफ म्याराथन प्रतियोगिताको उपाधि दिवस लिम्बूले जितेका छन् । पुरुषतर्फका ३१ प्रतिस्पर्धीलाई पछि पार्दै फक्ताङलुङ गाउँपालिका ३ लिंखिमका दिवसले १ घण्टा १५ मिनेटमा निर्धारित दूरी पार गर्दै उपाधि हात पारेका हुन् ।
१ घण्टा १८ मिनेटमा दुरी पार गरेका फक्ताङलुङ गाउँपालिका ३ कै सुगम पतंवा लिम्बू दोस्रो र १ घण्टा १९ मिनेट समय लगाएका मैवाखोला गाउँपालिका १ ढुङ्गेसाँघुका दीपेन्द्र सुजी तेस्रो भए । विजेता सबै ताप्लेजुङकै भएको आयोजकले बताएको छ ।
उनीहरूलाई तोक्मे डाँडास्थित नेपाली सेनाको गुल्मदेखि सदरमुकाम फुङलिङबाट गुम्बाडाँडा सुकेटार हुँदै तोक्मे ब्यारेकसम्म दौडाइएको थियो । उनीहरूले क्रमश १२, १० र ५ हजार रुपैयाँ पुरस्कार प्राप्त गरेका छन् ।
नौ किलोमिटर महिला दौड प्रतियोगिताको उपाधि भने पेम्बा ल्हामु शेर्पाले जितेकी छन् । मिक्वाखोला गाउँपालिका ३ लिवाङकी उनले ५३ मिनेट ५७ सेकेन्डमा निर्धारित दुरी पार गरिन् । त्यस्तै फुङलिङ नगरपालिका ९ हाङदेवाकी आरति गुरुङ दोस्रो भइन् । उनले ५६ मिनेट ५१ सेकेन्डमा दुरी पार गरिन् भने मिक्वाखोला ३ कै ङिमाजाङमु शेर्पाले ५९ मिनेटमा दुरी पार गरी तेस्रो स्थान हासिल गरिन् । महिलातर्फ प्रथमले ८, द्वितीयले ४ र तृतीयले ३ हजार रुपैयाँ पुरस्कार प्राप्त गरेका छन् ।
तमु ल्होसार आयोजक समितिका सदस्य राजन गुरुङका अनुसार ल्होसारको अवसरमा पुरुष भलिबल, पुरुष हाफ म्याराथन, महिला दौड, चेसलगायत खेलकुद प्रतियोगिता आयोजना गरिएको थियो ।
