प्रदेश १ मा समानुपातिकतर्फ एमाले अगाडि

यस प्रदेशको निर्वाचन आयोगको सूचना प्रणालीमा सोमबार साँझसम्म प्रविष्ट भएको १७ लाख १० हजार ९ सय ९७ समानुपातिक मतमध्ये एमालेले ५ लाख ९८ हजार १ सय ८०, कांग्रेसले ५ लाख १ हजार ७ सय ३ मत प्राप्त गरेको छ । यस्तै, राप्रपाले १ लाख ८२ हजार ८ सय ९८, माओवादी केन्द्रले १ लाख ६७ हजार ६ सय २६, जसपाले ५५ हजार २ सय ७६, एकीकृत समाजवादीले ५० हजार ८ सय ४९ मत प्राप्त गरेको हो ।

यस्तै, संघीय लोकतान्त्रिक राष्ट्रिय मञ्चले २६ हजार २८, मंगोल नेसनल अर्गनाइजेसनले २४ हजार ६ सय ८५, हाम्रो नेपाली पार्टीले २३ हजार १ सय ७८ र जनमत पार्टीले २१ हजार ३ सय ३७ मत प्राप्त गरेको छ । पहिलो प्रदेशसभा निर्वाचनमा समानुपातिकतर्फको १७ लाख ३६ हजार ७ सय ९ सदर मतमध्ये ६ लाख ७३ हजार ७ सय ९ मत ल्याएर लमालेले १५, कांग्रेसले ५ लाख ८६ हजार २ सय ४६ मत ल्याएर १३ प्रदेश सांसद पाएका थिए । यस्तै, पहिलो प्रदेशसभामा २ लाख ६ हजार ७ सय ८१ मत ल्याएर माओवादी केन्द्रले ५, तत्कालीन संघीय समाजवादी फोरम हालको जनता समाजवादी पार्टीले ७० हजार ४ सय ७६ मत ल्याएर २, राप्रपाले ५७ हजार ३ सय ४२ र संयुक्त लोकतान्त्रिक राष्ट्रिय मञ्चले २६ हजार १ सय २३ मत ल्याएर १/१ वटा समानुपातिक प्रदेश सांसद पाएका थिए ।

यस पटक समानुपातिकतर्फ दलहरूले प्राप्त गरिरहेको मतका आधारमा एमालेले १३/१४, कांग्रेसले ११/१२, राप्रपाले ४, माओवादी केन्द्रले ३, जनता समाजवादी पार्टीले २, एकीकृत समाजवादीले २ र संघीय लोकतान्त्रिक वा मंगोल नेसनल अर्गनाइजेसनमध्येले एउटा प्रदेश सांसद पाउने देखिएको छ । यस प्रदेशको कुल ३३ लाख ९६ हजार ८ सय ६५ मतदातामध्ये ६०.४९ प्रतिशतले भोट खसालेका थिए । यस प्रदेशस्थित ५६ प्रदेशसभा निर्वाचन क्षेत्रमध्ये ५३ क्षेत्रको अन्तिम मत परिणाम सार्वजनिक भइसकेको हो । एमालेले २४, कांग्रेस १५, माओवादी केन्द्र ९, नेकपा (एकीकृत समाजवादी) ३ र राप्रपाले २ वटा क्षेत्र जितिसकेका छन् । बाँकी रहेको ३ क्षेत्रमध्ये कांग्रेस २ वटा क्षेत्रमा जित निकट रहेको र एमाले एउटा क्षेत्रमा अगाडि छ ।

९३ सदस्यीय पहिलो प्रदेशसभामा एमालेले ५१, कांग्रेसले २१, माओवादी केन्द्रले १६, जसपाले ३, राप्रपा र संघीय लोकतान्त्रिक राष्ट्रिय मञ्चले एउटा प्रदेश सांसद जितेका थिए । यस पटक सरकार गठनका लागि सत्ता र एमाले गठबन्धनलाई चुनौतीपूर्ण देखिएको छ ।