दिक्तेलको मानव अधिकार आयोगको कार्यालय नसार्न माग
खोटाङ — दिक्तेलमा रहेको राष्ट्रिय मानवअधिकार आयोगको कार्यालय अन्यत्र सार्न लागिएको भन्दै ललितपुरको हरिहर भवनस्थित आयोगको केन्द्रीय कार्यालयमा ज्ञापनपत्र बुझाइएको छ । दिक्तेल रुपाकोट मझुवागढी नगरपालिकाका प्रमुख तीर्थराज भट्टराईको अगुवाइमा आइतबार ज्ञापनपत्र बुझाइएको हो ।
खोटाङ, भोजपुर, ओखलढुंगा र सोलुखुम्बुलाई हेर्ने गरी २०६२ सालमा दिक्तेलमा राखिएको आयोगको कार्यालय अन्यत्र सार्ने सूचनापछि ज्ञापनपत्र बुझाइएको नगरप्रमुख भट्टराईले बताए । स्थानीयको मागलाई बेवास्ता गरिए जस्तोसुकै आन्दोलन गर्न पछि नपर्ने भट्टराईले चेतावनी दिए ।
ज्ञापनपत्र आयोगका अध्यक्ष तपबहादुर मगर, सदस्यहरु मिहिर ठाकुर, मनोज दुवाडीलगायतलाई बुझाएको भट्टराईले सुनाए ।
