जहाँ भोट माग्नसमेत पुग्दैनन् उम्मेदवार
ताप्लेजुङ — हिमाली क्षेत्रको मुख्य पेसा चौंरी पालन हो । यो क्रममा चौंरीलाई दिशानिर्देश गर्न एउटा चौंरीलाई अगुवा बनाइएको हुन्छ । स्थानीय भाषामा अगुवालाई ‘केरी’ भनिन्छ । भारी बोकेपछि होस् या चरनमा जाँदा अग्रभागमा ‘केरी’ हुन्छ । उसैको पछिपछि अरू चौंरी लाग्छन् ।
मतदाता संख्या कम भएको हिमाली बस्तीमा मंसिर ४ को चुनावका लागि केरीको जिम्मेवारी भने स्थानीय नेताले पाएका छन । किनकि यहाँ ठूला नेताहरू पुगेनन् । ओलाङचुङगोला, याङमा, घुन्सा, फले, ग्याब्लाजस्ता बस्तीमा भेटघाट तथा आमसभाको कार्यक्रम राखिएका छैनन् । प्रचारको समय १५ दिन मात्रै बाँकी रहँदा पुग्ने अवस्थै नभएको दलका नेताहरू बताउँछन् ।
निर्वाचन आयोगको तथ्यांकअनुसार फक्ताङलुङ गाउँपालिका–७ ओलाङचुङगोलामा २ सय ८४ मतदाता छन् । ओलाङचुङगोलाबाट एक दिनको पैदलमा रहेको याङमामा ६१ जना छन् । घुन्सामा १ सय ६९ र ग्याब्लामा ६७ मतदाता छन् । गत स्थानीय तहको निर्वाचनमा ओलाङचुङगोलामा ८५, याङमामा १४, घुन्सामा ८१ र ग्याब्लामा ३२ मत झरेको थियो । सदरमुकाम फुङलिङबाट घुन्सा र याङमा पुग्न कम्तीमा तीन दिन लाग्छ भने ओलाङचुङगोला र ग्याब्ला दुई दिनमा पुगिन्छ । एमाले जिल्ला कमिटी अध्यक्ष भूपेन्द्र थेबे उम्मेदवारको नाम ढिलो गरी टुंगो लाग्दा र यो पटक निर्वाचन आयोगले पनि प्रचारका लागि छोटो समय दिएकाले दूरदराजका मतदातासमक्ष पुग्न कठिन भएको बताउँछन् । ‘अघिपछि त हामी पुगी नै रहेका हुन्छौं,’ थेबेले भने, ‘मनोनयन दर्तापछि चाहिँ पुग्न कठिन नै भएको हो ।’
आफूहरू नपुग्दा स्थानीय वडा एवं टोलका नेता र सकेसम्म मतदातासँग पनि टेलिफोन सम्पर्क भएको उनले बताए । गठबन्धनबाट निर्वाचन परिचालन समितिका संयोजक माओवादीका मिङमाडन्डु शेर्पा अझै पनि पुग्ने प्रयासमा रहेको दाबी गर्छन् । तर दलहरूले आमसभा र भेटघाटको चुनावी कार्यतालिका सार्वजनिक गरिसके पनि यी क्षेत्र समेटिएका छैनन् ।
स्थानीय नेतालाई भनेर अधिक मत झार्ने प्रयासमा दल तथा उम्मेदवार छन् । एक/एक मतको महत्त्व हुने भएकाले सम्पर्क सूत्रमार्फत समन्वय गरेका हुन् । ‘सबै पार्टीका नेताको फोन आइरहेको छ,’ फक्ताङलुङ गाउँपालिका–७ ओलाङचुङगोलाका अध्यक्ष छेतेन लामा शेर्पाले भने, ‘जिल्लाका नेता पनि आएनन्, केरीको जिम्मा हामीलाई नै लगाएका छन् ।’
विशेषगरी एमाले र गठबन्धनका कार्यकर्ता भएकाले प्रतिस्पर्धात्मक मत झर्ने आकलन स्थानीय नेताको छ । ‘अस्वस्थ प्रतिस्पर्धा गर्दैनौं,’ छेतेनले भने, ‘नेताका योजनाहरू सुनाइदिन्छौं, उहाँहरू (मतदाता) ले आफ्नो निर्णय गर्नु हुन्छ ।’ भौगोलिक दृष्टिकोणले डोल्पा र हुम्लापछिको तेस्रो ठूलो जिल्ला भएकाले उम्मेदवारलाई हरेक बस्ती पुग्न कठिन भएको दलका नेताको तर्क छ । प्रतिनिधिसभामा एक र प्रदेशमा २ निर्वाचन क्षेत्र रहेको जिल्लामा प्रदेशतर्फका उम्मेदवार पनि यी बस्तीमा पुग्ने गरेका छैनन् ।
प्रकाशित : कार्तिक २१, २०७९ ११:४१
