१९.१२°C काठमाडौं
मोटरसाइकल दुर्घटनामा एक जनाको मृत्यु
पाँचथर — पाँचथरको तुम्वेवा गाउँपालिकामा आइतबार मोटरसाइकल दुर्घटना हुँदा एक जनाको मृत्यु भएको छ । मृत्यु हुनेमा तुम्वेवा १ आङनाका ३० वर्षीय भक्त सम्बाहाम्फे छन् ।
उनले चलाएको मे ७ प ५४९९ नम्बरको मोटरसाइकल तुम्वेवा ३ बिजुली भञ्ज्याङ भन्ने स्थानमा दुर्घटनामा परेको थियो ।
प्रहरीका अनुसार मोटरसाइकल ओरालो बाटोमा अनियन्त्रित भएर दुर्घटनामा परेको थियो । मोटरसाइकलमा सवार तुम्वेवा १ कै ७ वर्षीया एरिया माङलाक सामान्य घाइते छिन् ।
चालक सम्बाहाम्फेको घटनास्थलमै मृत्यु भएको इलाका प्रहरी चौकी मौवाले जनाएको छ । मोटरसाइकल सडकदेखि करिब १५ मिटर तल खसेको प्रहरीले जनाएको छ ।
सम्बाहाम्फेको शव घटनास्थलको मुचुल्कापछि जिल्ला अस्पतालमा पोष्टमार्टम भइरहेको स्थानीय गणेश कार्कीले बताए ।
प्रतिक्रिया
