सोलुखुम्बु — सोलुखुम्बुका मगर समुदायले लोपोन्मुख हुर्रा नाच नाच्न थालेका छन् । लोप भएको भाषा र संस्कृति जोगाउन स्थानीयले पहल थालेपछि समुदायमा सञ्चालन हुने कार्यक्रममा हुर्रा नाच देखिन थालेको हो । बिर्सिएको संस्कृति जोगाउन ४ वर्षअघि प्रशिक्षक ल्याएर हुर्रा नाच सिकाइएको थियो ।
‘नयाँ पुस्ताले चासो राखेर समुदायमा हुर्रा नाच्न थालेका छन्,’ सोलुदूधकुण्ड नगरपालिका १० का वडाध्यक्ष होमबहादुर मगरले कान्तिपुरसँग भने । मौलक नाचले आन्तरिक तथा बाह्य पर्यटकलाई पनि आकर्षित गर्ने गरेको छ ।
जिल्लाको टाप्टिङ, फतान्जे, केरूङ, तामाखानी, खरिखोला, वक्साखानीलगायतका गाउँमा मगर समुदायको बसोबास रहेको छ । यहाँका मगर समुदायले लोप भइसकेको मगर भाषा जोगाउन समेत पहल थालनी गरेका छन् ।
पछिल्लो समय मगर भाषा बोल्नेको संख्यामा समेत वृद्धि हुन थालेको स्थानीयले बताएका छन् ।
तस्बिरहरू : भानुभक्त निरौला
प्रकाशित : कार्तिक ६, २०७९ १४:३२
