धरान-धनकुटा सडक खण्डमा गुडिरहेको बसमा आगलागी, यात्रु सकुशल
धनकुटा — कोसी राजमार्गको धरान–धनकुटा सडक खण्डको भेडेटार नजिक शुक्रबार अपराह्न बसमा आगलागी भएको छ । काठमाडौंबाट धनकुटातर्फ जाँदै गरेको ना.६ ख ७६९० नम्बरको मितेरी बसमा गुडिरहेको बखत अपराह्न साढे ३ बजे आगलागी भएको प्रहरीले जनाएको छ ।
सुनसरीको धरान उपनगरपालिका ४ देवीस्थानमा घटना भएको इलाका प्रहरी कार्यालय भेडेटारका प्रहरी नायव निरीक्षक रामप्रसाद शर्माले जानकारी दिए । बसमा अकस्मात आगलागी सुरु भएपछि यात्रुहरु भागाभाग भएको जनाइएको छ ।
नेपाल प्रहरी, सशस्त्र प्रहरी र स्थानीयले धरानबाट आएको दमकलको सहायतामा आगो निभाएका थिए । बसमा विद्युत् सर्ट हुँदा आगलागी भएको प्रहरीको भनाइ छ ।
बस पूर्णरुपमा क्षति पुगेको छ । मानवीय क्षति भने भएको छैन । आगलागी सुरु भएपछि यात्रुहरु उत्रिएर बच्न सफल भएका छन् । केही यात्रुको झोला तथा सामान क्षति भएको जनाइएको छ । घटनास्थल भेडेटारबाट १ किलोमिटर दूरीमा पर्दछ । बसमा ३५ यात्रु सवार थिए ।
प्रकाशित : आश्विन २१, २०७९ १८:२४