धरान-धनकुटा सडक खण्डमा गुडिरहेको बसमा आगलागी, यात्रु सकुशल

सुनसरीको धरान उपनगरपालिका ४ देवीस्थानमा घटना भएको इलाका प्रहरी कार्यालय भेडेटारका प्रहरी नायव निरीक्षक रामप्रसाद शर्माले जानकारी दिए । बसमा अकस्मात आगलागी सुरु भएपछि यात्रुहरु भागाभाग भएको जनाइएको छ ।

नेपाल प्रहरी, सशस्त्र प्रहरी र स्थानीयले धरानबाट आएको दमकलको सहायतामा आगो निभाएका थिए । बसमा विद्युत् सर्ट हुँदा आगलागी भएको प्रहरीको भनाइ छ ।

बस पूर्णरुपमा क्षति पुगेको छ । मानवीय क्षति भने भएको छैन । आगलागी सुरु भएपछि यात्रुहरु उत्रिएर बच्न सफल भएका छन् । केही यात्रुको झोला तथा सामान क्षति भएको जनाइएको छ । घटनास्थल भेडेटारबाट १ किलोमिटर दूरीमा पर्दछ । बसमा ३५ यात्रु सवार थिए ।