फरार कैदीबन्दीबारे छानबिन गर्न समिति गठन- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

फरार कैदीबन्दीबारे छानबिन गर्न समिति गठन

कान्तिपुर संवाददाता

विराटनगर — अस्पतालबाट फरार विराटनगर-८ स्थित मोरङ कारागारका दुई कैदीबन्दीको विषयमा अनुसन्धान गर्न प्रदेश १ प्रहरी कार्यालयले छानबिन समिति गठन गरेको छ । 

प्रहरीका अनुसार उक्त कारागारमा लागूऔषध मुद्दामा हाल कैद भुक्तान गरिररहेका २८ वर्षीय मञ्जिल गुरुङ र बलात्कार मुद्दामा कारागारमा रहेका २८ वर्षीय राजकुमार हेमरम शनिबार बिहान ९ बजे विराटनगर-७ स्थित क्षयरोग अस्पतालबाट उपचारको क्रममा भागेका थिए । १३ असारदेखि हेमरम र १७ भदौदेखि गुरुङ उक्त अस्पतालमा उपचाररत रहेको प्रहरीले जनाएको छ ।

साँझसम्म उनीहरू कतै फेला नपरेपछि प्रदेश प्रहरीका एसएसपी जयराज सापकोटाको संयोजकत्वमा पाँच सदस्यीय छानबिन समिति गठन गरिएको छ । यो समितिमा सुनसरीस्थित नेपाल प्रहरी प्रदेश कार्यालयका टोलीसमेत सामेल गरिएको छ ।

प्रदेश प्रहरी कार्यालयका अनुसार उक्त समितिलाई १० दिनभित्र स्थलगत रुपमा घटनाको वास्तविकता एवं सत्यतथ्य बुझेर रायसहितको प्रतिवेदन पेस गर्न निर्देशन दिइएको छ ।

प्रदेश प्रहरी प्रवक्ता एसपी नवीनराज राईका अनुसार झापा कारागारमा रहेका उनीहरूलाई उपचारका लागि मोरङ कारागारमा स्थानान्तरण गरिएको थियो । झापा गाउँपालिका-५ का हेमरमलाई जिल्ला अदालतबाट २०७५ मा १६ वर्ष कैद सजायको फैसला भएको थियो । १० हजार रुपैयाँ धरौटी बुझाउन नसकेपछि जिल्ला अदालत झापाले गुरुङलाई २०७८ को ५ कात्तिकमा पूर्पक्षका लागि कारागार पठाएको थियो । उनी झापा गाउँपालिका–३ का बासिन्दा हुन् ।

प्रकाशित : आश्विन १५, २०७९ १९:२८
प्रतिक्रिया
पठाउनुहोस्

सिट बाँडफाँट प्रस्तावले गठबन्धनमा खटपट : नेकपा एस र जसपा रुष्ट, माओवादी केन्द्र खुसी

कार्यदल बैठक बस्न सकेन, जसपाले खोल्यो अन्य पार्टीसँग पनि तालमेलको ढोका
कान्तिपुर संवाददाता

काठमाडौँ — सत्तारुढ गठबन्धनको सीट बाँडफाँटमा गम्भीर नभएको भन्दै नेपाली कांग्रेससँग अन्य साझेदार दलहरू असन्तुष्ट बनेका छन् । बिहीबार भएको बैठकमा सिट बाँडफाँटसम्बन्धी कार्यदलका संयोजक कृष्णप्रसाद सिटौलाको पछिल्लो प्रस्तावपछि गठबन्धनभित्र असन्तुष्टि झनै बढेको हो । सिटौलाले कांग्रेसलाई फाइदा हुने गरी नयाँ प्रस्ताव ल्याएको भन्दै जनता समाजवादी पार्टी (जसपा) र नेकपा एकीकृत समाजवादी असन्तुष्ट बनेका छन् ।

कांग्रेसबाहेकका गठबन्धनका अन्य दलले आइतबार प्रतिनिधिसभा तथा प्रदेशसभाको सिट बाँडफाँटका लागि टुङ्गो लगाउनुपर्ने भन्दै दबाब दिँदै आएका छन् । तर‚ कांग्रेस भने आन्तरिक विवादलाई देखाउँदै बाँडफाँटलाई अन्तिम समयसम्म लैजाने र गठबन्धनका अन्य दललाई थोरै सिट दिँदा हुने परिस्थिति निर्माण गर्न चाहेको अन्य दलहरूको आरोप छ ।

कांग्रेसभित्रै शेखर कोइराला‚ गगन थापा समूह गठबन्धनका अन्य दलहरूका साथै इतर रहेको आफ्नो समूहलाई कम स्थानमात्रै दिन खोजेको भनेर असन्तुष्टि जनाउँदै आएका छन् । सिटौलाको प्रस्तावपछि जसपा सबैभन्दा बढी असन्तुष्ट देखिएको छ ।

'सिटौलाजीले पहिले ल्याउनुभएको प्रस्तावमाथि मोटामोटी सहमति जुटिसकेको अवस्थामा बिहीबारको बैठकमा नयाँ प्रस्ताव ल्याउनुभयो‚ जसका कारण सबैले विरोध गर्नुभयो‚ जुन प्रस्ताव कांग्रेसमय छ । उहाँहरूले आफूलाई फाइदा हुने गरी ल्याउनु भएको छ । यसमा असन्तुष्ट छौं‚' जसपातर्फका कार्यदलका सदस्य रहेका मनीष सुमनले भने, 'असोज १६ गतेसम्म सक्ने काम भइरहेको थियो । त्यो समय घर्किएपछि मनोनयनको समयसम्म टुङ्गिएला ।' बिहीबारको बैठकमा सिटौलाको प्रस्तावपछि कार्यदलको बैठक बस्न सकेको छैन । बिहीबार आन्तरिक रुपमा छलफल गरेर शुक्रबार कार्यदल बैठक बस्ने भनिएको थियो ।

यसैबीच जसपाले गठबन्धनभित्र सन्तोषजनक अवस्था नदेखिएको भन्दै अन्य दलहरूसँग पनि तालमेल गर्न सकिने निर्णय गरेको छ । सत्तारुढ गठबन्धनमा सिट विषय निष्कर्षमा पुग्न नसकेको अवस्थामा जसपाको यस्तो चेतावनी आएको हो । गठबन्धनमा जसपाले प्रतिनिधिसभामा २० स्थानभन्दा बढी सिट दाबी गर्दै आएको छ । गठबन्धन भागबन्डा १२ देखि १३ स्थानमा मात्रै दिन सकिने सिटौलाको प्रस्तावमा रहेको छ । जसपाले एक्लै चुनाव लड्दा पनि कम्तीमा ९ स्थान जित्न सकिने भन्दै आफ्नो शक्तिलाई कम आँकेमा गठबन्धनबाट बाहिरिने चेतावनी दिँदै आएको छ । अर्कोतर्फ एकीकृत समाजवादी पनि सिटौलाको पछिल्लो प्रस्तावमा असन्तुष्ट रहँदै आएको छ ।

नेकपा एकीकृत समाजवादी अध्यक्ष माधवकुमार नेपालले भदौदेखि हरेक बैठक निर्णायक भन्दै बस्ने गरे पनि परिणाम आउन नसकेको भन्दै असन्तुष्टि जनाएका हुन् । 'आज अन्तिम बैठक भन्दै हामी भदौदेखि बस्दै आएका छौं तर कुनै निष्कर्षमा पुगिसकेका छैनौं‚' नेपालले भने, 'कहिले टुङ्गिन्छ भन्न सकिँदैन ।' गठबन्धनमा एकीकृत समाजवादीलाई १७ देखि १८ सिट दिने विषयमा छलफल भएको छ । सो दलको दाबी भने ३० स्थानमा रहेको छ ।

कांग्रेसभित्र भने गठबन्धन हुँदा कम स्थानमात्रै हात पर्ने भन्दै एक्लै चुनावमा जान देउवा इतर पक्षले दबाब दिँदै आएको छ । कांग्रेसले गठबन्धनमा भागबन्डा हुँदा प्रतिनिधिसभामा प्रत्यक्षतर्फ निर्वाचित हुने १ सय ६५ सिटमध्ये ८० देखि ८५ सम्म स्थान गर्ने सम्भावना छ । गठबन्धनभित्र मधेसमा सिट बाँडफाँटको विषय गाँठो परेको छ । मधेसका कतिपय स्थानमा गठबन्धनको ४ दल कांग्रेस, माओवादी केन्द्र, एकीकृत समाजवादी र जपसाको दाबी रहेको छ ।

गठबन्धनको अर्को दल माओवादी केन्द्रमा भने सिटौलाको प्रस्तावमा सकारात्मक देखिएको छ‚ जसमा माओवादीलाई अहिले भैरहेको छलफलभन्दा केही फाइदा हुने देखिएको छ । सिटौलाको प्रस्तावमा माओवादी केन्द्रले ४५ देखि ५० स्थान प्राप्त गर्ने छ ।

पाँचदलीय सत्तारुढ गठबन्धनले मंसिर ४ गते हुने प्रतिनिधिसभा तथा प्रदेशसभाको चुनावमा तालमेल गर्ने निर्णय गरेको थियो । त्यसका लागि साउन २० देखि कार्यदल सक्रिय रहेको छ । सुरुमा साउन मसान्तसम्म बाँडफाँटको प्रस्ताव ल्याउन कार्यदललाई निर्देशन दिइएको थियो । ११ सदस्यीय कार्यदलले पार्टीका शीर्ष नेताहरूसँग परामर्श गरेर टुङ्गो लगाउन खोजे पनि सफलता हात पार्न सकेको छैन ।

प्रकाशित : आश्विन १५, २०७९ १९:१८
पूरा पढ्नुहोस्
प्रतिक्रिया
पठाउनुहोस्
×