गठबन्धन दलबाट छुट्टिएर आउनेलाई निर्वाचनमा सहभागी गराइन्छ : नेता ढकाल- प्रदेश १ - कान्तिपुर समाचार

गठबन्धन दलबाट छुट्टिएर आउनेलाई निर्वाचनमा सहभागी गराइन्छ : नेता ढकाल

रमेशचन्द्र अधिकारी

धनकुटा — नेकपा (एमाले)का स्थायी कमिटी सदस्य भानुभक्त ढकालले आगामी मंसिरमा हुने प्रतिनिधिसभा तथा प्रदेश निर्वाचनमा गठबन्धनमा आबद्ध दल तथा नेताहरू आफ्नो पार्टीमा आएमा स्वागत गर्ने बताएका छन् । 

हिजो गरेका धोका र गलत कामलाई आश्वस्त गरेर मात्र होइन, जनताको विश्वास जितेर जानेलाई मात्र स्वीकार गर्न सकिने उनको भनाइ थियो ।

प्रेस चौतारी नेपालले धनकुटामा बुधबार आयोजना गरेको पत्रकार भेलामा नेता ढकालले अग्रगमनको पक्षमा रहेका पार्टी, व्यक्ति, सामाजिक अभियन्तासँग सहकार्य गरेर निर्वाचनमा जान सकिने बताए ।

यसैगरी फरक प्रसंगमा नेता ढकालले नागरिकता विधेयकमा एमालेको फरक मत रहँदारहँदै सरकारी पक्षले पास गरेको दाबी गरे । नागरिकता विधेयकमा परेको ४३ वटा संशोधनको प्रस्तावमध्ये ३८ वटा प्रस्ताव एमालेका सांसदले हालेको उनको भनाइ छ । सरकारले प्रधानन्यायधीशविरुद्धको महाभियोग पास गर्न नभई उनलाई काम गर्न नदिन र अन्य न्यायधीशलाई तर्साउन ल्याएको बताए ।

कार्यक्रममा प्रदेश १ का पूर्वमुख्यमन्त्री शेरधन राईले आफ्नो कार्यकालमा सबै पार्टी तयार नभएकाले प्रदेशको नामकरण गर्न नसकेको बताए । अहिले नामकरण गर्ने ढोका वर्तमान मुख्यमन्त्रीले बन्द गरेको उनको आरोप छ । नामकरणको विषयमा अन्यौल रहे पनि एमालेले प्रयास जारी राखेको उनको कथन थियो । एमाले धनकुटाले बुधबार निर्वाचन केन्द्रित जिल्लास्तरीय प्रशिक्षण कार्यक्रमको आयोजना गरेको छ । सोही कार्यक्रममा केन्द्रीय नेता तथा प्रशिक्षकहरू सहभागी छन् ।

प्रकाशित : श्रावण २५, २०७९ १२:४८
प्रतिक्रिया
पठाउनुहोस्

धनकुटामा पहिरोमा परी दुई जना घाइते

रमेशचन्द्र अधिकारी

धनकुटा — पहिरोले महालक्ष्मी नगरपालिका–२ लाफ्टाङमा शुक्रबार चार घरमा क्षति पुुगेको छ भने दुई जना घाइते भएका छन् ।

बिहान साढे ४ बजे पहिरो जाँदा स्थानीय तिलकबहादुर कटुवाल र कोषमाया बुढाथोकीको घर पुरेको थियो । त्यससँगै रहेका अन्य दुई घर समेत बिहान ११ बजेदेखि चर्किएर मानिस बस्न नहुने अवस्थामा पुगेको नगरपालिकाका प्रमुख ध्रुव रायाले जानकारी दिए । स्थानीय चित्रबहादुर बुढाथोकी र गोपाल बुढाथोकीको घर चर्किएको हो ।


विस्थापित चार परिवारलाई घटनास्थलबाट केही परका घरमा राखिने तयारी गरिएको उनले बताए । पहिरोबाट विस्थापित चार परिवारका लागि आवश्यक त्रिपाल, खाद्यन्न, लत्ताकपडा नगरपालिकाबाट वितरण गरिएको उपप्रमुख मञ्जु कार्की अधिकारीले बताइन् । तिलक र कोषमायाको घर भने पहिरोसँगै करिब तीन सय मीटर तल झरेको महालक्ष्मी–२ का वडाध्यक्ष पदम रखालले जानकारी दिए ।

घटनामा ८४ वर्षीय तिलक र उनकी छोरी मित्रमाया कटुवाल घाइते भएका छन् । दुवै जनाको दुवै हात भाँच्चिएको छ भने शरीरका विभिन्न भागमा चोटपटक लागेको जिल्ला प्रहरी प्रवक्ता डिएसपी चिरञ्जीवी दाहालले जानकारी दिए ।

घाइतेलाई उपचारका लागि धरानस्थित बीपी कोइराला स्वास्थ्य विज्ञान प्रतिष्ठानमा लगिएको छ । पहिरोबाट घरमा रहेका अन्नपात, गहना, नगद गरी अन्दाजी ७० लाख बराबरको क्षति भएको जनाइएको छ ।

प्रकाशित : श्रावण २०, २०७९ ११:४३
पूरा पढ्नुहोस्
प्रतिक्रिया
पठाउनुहोस्
×