एउटै योजनामा दोहोरो भुक्तानी
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/mastercreativegif900x100-0952024115624.gif)
खोटाङ — दिक्तेल रुपाकोट मझुवागढी नगरपालिका–७ दोर्पाचिउरीडाडाँस्थित खानेपानी योजनामा प्रदेश सरकार र नगरपालिकाबाट बेग्लाबेग्लै रकम भुक्तानी बुझेर अनियमितता भएको खुलेको छ ।
![](https://assets-cdn.ekantipur.com/uploads/source/ads/reward-900x100-pxl-2462024072414.gif)
![एउटै योजनामा दोहोरो भुक्तानी](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2022/miscellaneous/khotang-intake-2372022070650-1000x0.jpg&w=1001&h=0)
![](https://assets-cdn.ekantipur.com/uploads/source/ads/sathi-deposit-900-100-1262024124333.gif)
सर्वेधारा खानेपानी योजनामा प्रदेश १ अन्तर्गत खानेपानी तथा सरसफाइ डिभिजन कार्यालय र उक्त नगरपालिकाको बजेट परेको हो । प्रदेश सरकारको ३ लाख ४४ हजार रुपैयाँको लागतमा इन्टेक निर्माण र ७ सय मिटर पाइप लाइन बिस्तार गरिएको डिभिजन कार्यालयका सूचना अधिकारी इन्जिनियर मोहन महासेठले बताए ।
यसैलाई देखाएर नगरपालिकाबाट पनि ५ लाख ७ हजार भूक्तानी गरिएको उजूरी आए पछि छानबिन सुरु गरिएको उपप्रमुख विशन राईले बताए । ‘एउटै योजनामा दुई तिरबाट बजेट भुक्तानी भएको भन्ने उजुरी आएको छ,’ उनले भने, ‘संलग्नलाई कारबाही गर्छौं ।’
महासेठका अनुसार आव २०७७/७८ मा डीपीआर तयार गरिएको र आव २०७८/७९ को बजेटबाट योजना सम्पन्न गरिएको हो । उपभोक्ता समितिका अध्यक्ष जीवन ढकाल र डिभिजन प्रमुख इन्जिनियर धर्मेन्द्रकुमार केशरीबीच २०७८ पुस २८ मा सम्झौता भई काम थालिएको थियो । काम सकिएपछि २०७८ चैत २३ मा भुक्तानी भएको महासेठको भनाइ छ ।
आव २०७८/७९ को बजेटअन्तर्गत नगरपालिकाबाट विनियोजित ६ लाख रुपैयाँको लागतमा पाँच धारा, एउटा रिजर्भ ट्यांकी सक्ने गरी २०७८ चैत २३ मा सम्झौता गरिएको स्थानीय शिक्षक तथा उपभोक्ता समितिका सदस्य चिरञ्जीवी ढकालले बताए । पूरै काम नसकिएकाले ५ लाख ७ हजार रुपैयाँ मात्र भुक्तानी भएको उनको भनाइ छ । बाँकी काम यसै साता सक्ने ढकालले बताए ।
प्रदेश र नगरको बजेटमा योजना डुब्लिकेसन भएको भन्ने बारे प्रश्न गर्दा आफूहरूलाई थाहा नभएको उनले बताए । वडाअध्यक्ष हरिप्रसाद चौलागाईँले भने काम गरेको देखिएकाले रकम निकासाका लागि सिफारिस गरिदिएको बताए । उनले भने, ‘तर यस्तो हुन्छ भनेर सोचेको थिइन ।’
![](https://assets-cdn.ekantipur.com/uploads/source/ads/900-x-100-0172024023126.gif)