प्रधानाध्यापकमाथि आक्रमण, भाग्ने क्रममा खुट्टा भाँचियो

विद्यालयका अर्का शिक्षकले बालिकामाथि यौन दुर्व्यवहार गरेको विषयमा छलफल भइरहेका बेला उनीमाथि कार्यकक्षमै आक्रमण भएको बताइएको छ । आइतबार राति ९ बजे प्रअ बस्नेतमाथि आक्रमण भएको र भाग्ने क्रममा उनको दाहिने खुट्टा भाँचिएको छ ।

प्रहरीले भने उक्त घटनाबारे मौखिक रुपमा मात्र जानकारी आएको तर उजुरी नपरेको जनाएको छ । विद्यालयका शिक्षक चन्द्रकुमार राईले छात्राहरूमाथि यौन दुर्व्यवहार गरेको विषयमा पीडित तथा विद्यालयका प्रअ, अभिभावक संघ, व्यवस्थापन समितिका पदाधिकारी लगायत छलफलमा थिए ।

आरोपित राईलाई समेत विद्यालयमा पीडित बालिका र अभिभावकले घेराउ गरेर राति साढे ८ बजे प्रहरीलाई जिम्मा लगाएका थिए । त्यसपछि आफूमाथि पनि कुटपिट भएको बस्नेतको भनाइ छ ।

घाइते बस्नेतको जिल्ला अस्पतालमा प्राथमिक उपचारपछि इटहरीस्थित बेदान्त अस्पतालमा थप उपचार गरिएको छ । घाइते प्रअ बस्नेत अपांगता भएका व्यक्ति हुन् ।

राष्ट्रिय अपांग महासंघका पूर्वकेन्द्रीय सदस्यसमेत हुन् । बस्नेतको खुट्टा भाँचिएपछि अपांगताका कारण बैसाखीसमेत टेक्न समस्या भएकोले जटिल अवस्था उत्पन्न भएको उनकी पत्नी भगवती बस्नेतले बताइन् । उपचारपछि फर्केर आफूमाथि आक्रमण गर्नेविरुद्ध किटानी जाहेरी दिने उनले बताए ।