अवैध उत्खनन गरिरहेका ९ वटा टिपर, जेसीभी र ट्याक्टर नियन्त्रणमा- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

अवैध उत्खनन गरिरहेका ९ वटा टिपर, जेसीभी र ट्याक्टर नियन्त्रणमा

विनोद भण्डारी

विराटनगर — मोरङका विभिन्न खोलामा आइतबार राति अवैध रुपमा उत्खनन गर्दै गरेको अवस्थामा प्रहरीले ९ वटा टिपर, ट्याक्टर र जेसीभीसहित चालकलाई नियन्त्रणमा लिएको छ । 

खदम, मुगु र लोहन्द्रा खोलामा अवैध रुपमा उत्खनन गर्दै गरेको अवस्थामा प्रहरीले नियन्त्रणमा लिएका टिपर, जेसीभी र ट्याक्टर । तस्बिर : जिल्ला प्रहरी कार्यालय‚ मोरङ

केराबारी गाउँपालिकामा पर्ने खदम र मुगु खोला, सुन्दरहरैचा नगरपालिकामा पर्ने बुढी खोला र बेलवारी नगरपालिकामा पर्ने लोहन्द्र खोलामा अवैध रुपमा नदीजन्य पदार्थ उत्खनन गर्दै गरेको अवस्थामा ती साधन नियन्त्रणमा लिइएको मोरङ प्रहरी प्रवक्ता डीएसपी दीपक श्रेष्ठले बताए ।

स्थानीय प्रशासनले असार १ गतेदेखि सबै खोलामा उत्खनन गर्न रोक लगाएको थियो । को १ ख ५८६२ नम्बरको टिपर र चालक अशोक कटुवाल, को १ ख १४९१ नम्बरको जेसीभी र चालक राज लिम्बु, को १ ख ७२५१ नम्बरको टिपर र चालक जयराम उराँव, ना ८ ख ४२६७ नम्बरको टिपर र चालक अनील चौधरी, प्रदेश १-०२-००१ ख ९३८७ नम्बरको टिपर र चालक दिनेश उराँव, को १ त ६८६४ नम्बरको ट्याक्टर र चालक काशिनाथ ऋषिदेव, को २ त ५५६४ नम्बरको ट्याक्टर र चालक उज्जवल पौडेल, अन टेस्ट ट्याक्टर चालक शम्भु मग्राती र प्रदेश १–०२–००३ त १४०१ नम्बरको ट्याक्टरलाई प्रहरीले नियन्त्रणमा लिएको हो ।

उक्त टिपर, जेसीभी र ट्याक्टर क्रसर व्यवसायी देवराज तामाङ र चन्द्र लिम्बुको भएको बताइएको भए पनि कोही पनि दाबी गर्न नआएको इलाका प्रहरी कार्यालय बेलबारीका प्रहरी निरीक्षक खगेन्द्र धमलाले बताए ।

नियन्त्रणमा लिइएका ती टिपर, जेसीभी र ट्याक्टरलाई सम्बन्धित स्थानीय निकायलाई प्रहरीले बुझाएको छ । सुन्दरहरैँचा, बेलबारी, लेटाङ, पथरी शनिश्चरे, उर्लाबारी नगरपालिकासहित केराबारी, कानेपोखरी, मिक्लाजुङ, बुढीगंगा र ग्रामथान गाउँपालिका मोरङका विभिन्न खोलाका गिटी र बालुवा उत्खननका लागि खोला ठेक्कामा लगाउँदै आएका छन् ।

प्रहरी स्रोतका अनुसार स्थानीय निकायका जनप्रतिनिधि र क्रसर व्यवसायीको मिलोमतोमा खोलाको अवैध उत्खनन हुँदै आएको छ । कारबाहीका लागि प्रहरीले अवैध उत्खनन गर्दै गरेको अवस्थामा नियन्त्रणमा लिएका उपकरण सम्बन्धित पालिकालाई बुझाए पनि मिलोमतोमा नाम मात्रको कारबाही गरेर सहजै छुट्ने गरेको प्रहरी स्रोतको भनाइ छ ।

प्रकाशित : असार २०, २०७९ १५:५७
प्रतिक्रिया
पठाउनुहोस्

बैंकमा पैसा राख्नेमा लुम्बिनी प्रदेशका कुन जिल्ला अघि ? 

रासस

काठमाडौँ — बैंक तथा वित्तीय संस्थामा सबैभन्दा कम निक्षेप राख्ने लुम्बिनी प्रदेशका जिल्लाका रुपमा रुकुमपूर्व देखिएको छ । आर्थिक विकासमा पछाडि परेको कान्छो जिल्लाका रुपमा रहेको सो जिल्लाको कूल निक्षेप ०.२३ प्रतिशत मात्रै रहेको छ । नेपाल राष्ट्र बैंकले हालै सार्वजनिक गरेको चालु आर्थिक वर्षको लुम्बिनी प्रदेशको आर्थिक विवरणअनुसार सो जिल्लाका नागरिकले ९३ करोड ७३ लाख बराबरको रकम मात्रै बैंक तथा वित्तीय संस्थामा निक्षेपका रुपमा राखेको पाइएको छ ।

केन्द्रीय बैंकले सातवटै प्रदेशको आर्थिक अवस्थाका बारेमा नियमित विवरण सार्वजनिक गर्दै आएको छ । सोही क्रममा पछिल्लो पटक लुम्बिनी प्रदेशको विवरणसमेत प्रकाशित गरेको छ । बैंकका अनुसार बैंक तथा वित्तीय संस्थाले सङ्कलन गरेको कूल निक्षेप गत वर्षको तुलनामा न्यूनरुपमा मात्रै वृद्धि भएको छ । कुल चार खर्ब दुई अर्ब ८३ करोड ७६ लाख बराबरको निक्षेप सो प्रदेशभित्र रहेको पाइएको छ । विसं २०७८ असारको तुलनामा ९ प्रतिशतले निक्षेप बढेको छ ।

रुपन्देहीको हिस्सा सबैभन्दा बढी रहेको पाइएको छ । केन्द्रीय बैंकको विवरणअनुसार कुल ४४.४८ प्रतिशत बराबरको हिस्सा सो जिल्लाको छ । बुटवल, भैरहवालगायतका क्षेत्रमा औद्योगिक विकास भएको, गौतमबुद्ध विमानस्थलसमेत सञ्चालनमा आएको, उद्योग व्यवसाय विस्तार भएकाले सो जिल्लाका नागरिकको कमाई पनि बढ्दो छ । सोही कारणले गर्दा त्यस जिल्लाका नागरिकले बैंक तथा वित्तीय संस्थामा बढीमात्रामा निक्षेप जम्मा गरेका छन् ।

विवरणअनुसार सो जिल्लाका नागरिकले एक खर्ब ७९ अर्ब १८ करोड सात लाख ८० हजार बराबरको निक्षेप बैंक तथा वित्तीय संस्थामा राखेका छन् । बाँके जिल्लाको १२.२७ प्रतिशत बराबरको हिस्सा रहेको छ । त्यो भनेको कूल ४९ अर्ब ४१ करोड ४५ लाख २० हजार बराबर हो । दाङ जिल्ला आर्थिकरुपमा विकासको गतिमा अगाडि बढेको भए पनि त्यहाँका नागरिकले बैंक तथा वित्तीय संस्थामा राखेको निक्षेप भने कमै देखिएको छ । केन्द्रीय बैंकको विवरणअनुसार सो जिल्लाको हिस्सा मात्रै १०.८१ प्रतिशत बराबर छ । त्यो भनेको कूल ४३ अर्ब ५३ करोड ११ लाख ८० हजार बराबर रहेको छ ।


केन्द्रीय बैंकको विवरणअनुसार कपिलवस्तुको हिस्सा ६.३२ प्रतिशत रहेको छ । सो जिल्लाका नागरिकले २५ अर्ब ४४ करोड ३० लाख ४० हजार बराबरको निक्षेप बैंक तथा वित्तीय संस्थामा राखेका छन् । लुम्बिनी प्रदेशको पाल्पाको हिस्सा ५.७३ प्रतिशत छ । त्यो भनेको कूल २३ अर्ब आठ करोड ९१ लाख ५० हजार बराबरको निक्षेप पाल्पाबासीले बैंक तथा वित्तीय संस्थामा राखेका छन् ।

नवलपरासी पश्चिमको हिस्सा ५.५० प्रतिशत अर्थात् २२ अर्ब १३ करोड ८० लाख ४० हजार बराबरको रकम निक्षेपका रुपमा बैंक तथा वित्तीय संस्थामा राखेका छन् । यसैगरी गुल्मीको हिस्सा ५.२९ प्रतिशत रहेको छ । त्यस जिल्लाका नागरिकले बैंक तथा वित्तीय संस्थामा २१ अर्ब ३० करोड ७९ लाख १० हजार बराबरको रकम निक्षेपका रुपमा राखेका छन् ।

कम निक्षेप राख्ने जिल्लामा क्रमशः अर्घाखाँची, बर्दिया, प्यूठान र रोल्पा रहेको केन्द्रीय बैंकको अध्ययनले देखाएको छ । अर्घाखाँचीको १२ अर्ब ५४ करोड ८६ लाख ३० हजार, बर्दियाको १२ अर्ब ८७ करोड ७४ लाख ७९ हजार निक्षेप बैंक तथा वित्तीय संस्थामा जम्मा छ । प्यूठानको सात अर्ब ७६ करोड ६६ लाख ३० हजार, रोल्पाको चार अर्ब ६० करोड ५६ लाख ७० हजार निक्षेप बैंक तथा वित्तीय संस्थामा छ ।

ऋण लिनेमा पनि रुपन्देहीका नागरिक नै अग्रस्थानमा छन् । सो जिल्लामा मात्रै ५०.१० प्रतिशत बराबरको ऋण लगानी भएको छ । सो जिल्लामा दुई खर्ब ६९ अर्ब १४ करोड १२ लाख १० हजार बराबरको ऋण लगानी भएको छ । दाङमा ६४ अर्ब २१ करोड ७९ लाख ७० हजार, बाँकेमा ८९ अर्ब ८२ करोड तीन लाख ७० हजार, बर्दियामा १६ अर्ब ४६ करोड ४३ लाख ३० हजार बराबरको ऋण लगानी भएको छ ।

निक्षेपसमेत कम रहेको रुकुमपूर्वमा बैैंक तथा वित्तीय संस्थाको लगानी ६८ करोड ९० लाख सात हजार बराबर छ । प्रदेशभर नै चार खर्ब दुई अर्ब ८३ करोड ७६ लाख बराबरको निक्षेप उठाएका बैंक तथा वित्तीय संस्थाले पाँच खर्ब ३७ अर्ब १९ करोड १४ लाख ९० हजार बराबरको ऋण लगानी गरेका छन् ।

प्रकाशित : असार २०, २०७९ १५:५२
पूरा पढ्नुहोस्
प्रतिक्रिया
पठाउनुहोस्
×