दम्पती नै प्रमुख र उपप्रमुखका उम्मेदवार- प्रदेश १ - कान्तिपुर समाचार

दम्पती नै प्रमुख र उपप्रमुखका उम्मेदवार

दीपेन्द्र शाक्य

संखुवासभा — खाँदबारी नगरपालिकामा प्रमुख र उपप्रमुख पदमा दम्पतीले उम्मेदवारी दिएका छन् । स्थानीय तह निर्वाचनको लागि खाँदबारी नगरपालिकाको प्रमुख/उपप्रमुख बन्न श्रीमान्–श्रीमतीकै उम्मेदवारी परेको हो । जनता समाजवादी पार्टीले खाँदबारी नगरपालिकाको प्रमुखमा सिताराम तिम्सिना र उपप्रमुखमा मैयाँदेवी चिमरियाको उम्मेदवारी दर्ता गराएका हुन् ।

प्रमुख पदका उम्मेदवार बनेका तिम्सिना जनता समाजवादी पार्टीको संघीय परिषद्को केन्द्रीय सदस्य हुन् । पार्टीले जिम्मा दिएपछि श्रीमान्–श्रीमतीले नै एउटै पार्टीबाट एउटै पालिकामा उम्मेदवारी दिएको तिम्सिनाले बताए ।

दशकौं लामो राजनीतिमा लागेपछि पनि निर्वाचनमा टिकट नपाएपछि कसैले बागीको बाटो समेत रोजेका छन् । जनता समाजवादीले खाँदबारी नगरपालिकाका लागि गठबन्धन गरेको छ ।

खाँदबारी नगरपालिका प्रमुखका लागि ३ स्वतन्त्रसहित ९ जनाले उम्मेदवारी दर्ता गराएका छन् । खाँदबारी नगरपालिका नगर प्रमुखमा पाँच दलीय गठबन्धनबाट प्रमुख पदमा नेपाली कांग्रेसका महेश थपलिया, उपप्रमुखमा नेकपा माओवादी केन्द्रका दिव्यराज बरालको उम्मेदवारी परेको छ ।

प्रमुख पदका लागि नेकपा एमालेबाट जीतबहादुर घिमिरे, राष्ट्रिय जनमुक्ति पार्टीका भरत राई, राष्ट्रिय जनमोर्चाका हेमकुमार गुरुङ, राष्ट्रिय प्रजातन्त्र पार्टीका सोमनाथ खनाल र स्वतन्त्रबाट प्रविन कार्की, सुदिप गुरुङ र खड्गबहादुर दमाईले प्रमुख पदका लागि उम्मेदवारी दर्ता गराएको मुख्य निर्वाचन अधिकृतको कार्यालयले जनाएको छ ।

उपप्रमुखमा एमालेबाट महेश्वरा बज्राचार्य, राष्ट्रिय प्रजातन्त्र पार्टीबाट हिरादेवी श्रेष्ठको उम्मेदवारी परेको छ । ११ वटा स्थानीय तह रहेको खाँदबारीमा ५७ पदका लागि १ सय ४१ जनाको उम्मेदवारी परेको हो ।

प्रकाशित : वैशाख १५, २०७९ १३:४६
प्रतिक्रिया
पठाउनुहोस्

संखुवासभाका ७ पालिकामा गठबन्धन, ३ मा मित्रवत प्रतिस्पर्धा गर्ने 

दीपेन्द्र शाक्य

संखुवासभा — आगामी वैशाख ३० मा हुने स्थानीय तह निर्वाचनका लागि संखुवासभाका १० स्थानीय तहमध्ये ७ तहमा ५ दलीय गठबन्धनले संयुक्त उम्मेदवारी दर्ता गर्ने भएको छ ।

शनिबार खाँदबारीमा सम्पन्न बैठकले १० मध्ये ७ पालिकामा गठबन्धन गर्ने र ३ पालिकामा मित्रवत प्रतिस्पर्धा गर्ने निर्णय गरेको कांग्रेस सभापति दीपक खड्काले बताए । उनका अनुसार कांग्रेसले ४ वटा पालिकामा प्रमुख, नेकपा माओवादी केन्द्र र नेकपा एकीकृत समाजवादीको भागमा एउटा-एउटा प्रमुख परेको छ ।

त्यस्तै कांग्रेसले ३ उपप्रमुख, माओवादी केन्द्रले २ र नेकपा समाजवादीले २ वटा उपप्रमुख पाएका छन् । कांग्रेसले सभापोखरी गाउापालिका, खाँदबारी,पाँचखपन, र चैनपुर नगरपालिकाको प्रमुख पाएको छ । उसले भोटखोला गाउँपालिका, मादी र धर्मदेवी नगरपालिकामा उपप्रमुखमा चित्त बुझाएको छ । नेकपा एकीकृत समाजवादीले भोटखोला गाउँपालिका प्रमुख, सभापोखरी गाउँपालिका, पाँचखपन नगरपालिकामा उपप्रमुख पाएको छ । माओवादी केन्द्रले मादी नगरपालिकामा प्रमुख र खाँदबारी र चैनपुर नगरपालिकामा उपप्रमुख पाएको छ ।

चिचिला गाउँपालिका, मकालु गाउँपालिका र सिलिचो गाउँपालिकामा मित्रवत प्रतिस्पर्धा गरिने गठबन्धनले जनाएको छ । यी ३ पालिकामा गठबन्धनबाहेकका दलसँग मिलेर चुनाव नलड्ने पनि सहमति भएको छ । संखुवासभामा ७६ वटा वडा छन् । तीमध्ये गठबन्धनमा ६० वटा वडा परेका छन् । ४६ वटा कांग्रेसलाई, ६ वटा मा माओवादी केन्द्र, ५ वटा एकीकृत समाजवादी र ३ वटा जनता समाजवादीको भागमा परेको छ ।

दसवटै पालिकामा हरेक दलबाट २ जना निर्वाचन परिचालन समिति र सवै वडामा गठबन्धनको दलबाट २ जना सदस्य राखेर वडा परिचालन तथा प्रचारप्रसार समिति गठन गर्ने निर्णय पनि गरिएको छ । विज्ञप्तिमा कुन दललाई कुन–कुन वडा भन्ने उल्लेख गरिएको छैन ।

प्रकाशित : वैशाख १०, २०७९ १८:२५
पूरा पढ्नुहोस्
प्रतिक्रिया
पठाउनुहोस्
x
×