वर्षाको पानी हिउँदमा पिउँदै- प्रदेश १ - कान्तिपुर समाचार

वर्षाको पानी हिउँदमा पिउँदै

बोतलमा जम्मा गरेको पानी फारू गर्दा पनि हिउँदमा जेनतेन ३ महिना, अरु समय सास्ती
कान्तिपुर संवाददाता

धनकुटा — बोतल आँगनभरि देख्दा सजावटका लागि राखिएको झैं लाग्छ । तर त्यसो भने होइन । खानेपानीको चरम समस्या भोग्दै आएका धनकुटाको साँगुरीगढी–५ र मोरङको केराबारी-१ सीमावर्ती थामडाँडाका स्थानीयले हिउँदका लागि जोहो गर्न वर्षाको पानी भर्न त्यसरी राखेका हुन् ।

डेढ घण्टा टाढा टुनीबोट मुहानबाट बोकेर पानी ल्याउनु पर्ने बाध्यता यहाँका स्थानीयमा छ । टाढाको जरुवाबाट पानी ल्याउनु भन्दा वर्षाको पानीलाई बोतलमा भण्डारण गरी हिउँदभरि उपभोग गर्न सहज भएपछि स्थानीय त्यसतर्फ आकर्षित भएका हुन् ।

‘बोतलको पानी घाममा राख्दा शुद्धीकरण हुन्छ भन्ने सुनेर यसो गरेको हुँ,’ स्थानीय मोहन राईले भने, ‘केही वर्षदेखि यसरी नै पानीको जोहो गर्दै आएका छौं ।’ पानी राख्ने खाली बोतल केराबारी र डाँडाबजारबाट किनेर ल्याउने गरेको उनले बताए । त्यसमा भरेर राखिएको पानी सरसफाइ र सिँचाइको लागि पनि प्रयोग गर्दै आएका छन् । राईले बोतलमा पानी जम्मा गरेर प्रयोग गर्न थालेपछि अरुले पनि सिको गरेका हुन् । वर्षौंदेखि आफूहरूले भोग्दै आएको समस्या जनप्रतिनिधीलाई सुनाउँदै आए पनि खानेपानीको लागि सुनुवाइ नभएको स्थानीय सृजन राईले बताए ।

त्यस क्षेत्रका २ सय ४० परिवारले खानेपानीको चरम समस्या भोगेका छन् । पछिल्लो समय टुनीबोट मुहानबाट पानी ल्याएर जम्मा गर्ने ट्यांकी निर्माण गर्ने भनिए पनि ढिलाई भएको स्थानीयको भनाइ छ ।

स्थानीय ओखरघेरो र टुनीबोट मुहानको पानी जम्मा गरेर व्यवस्थित गर्न सकिए पानीको समस्या समाधान हुन सक्ने दावी स्थानीयको छ । बिहान सबेरैदेखि पानीको बन्दोबस्त गर्न आफुहरूलाई चिन्ता लाग्ने विमला मगर बताउँछिन् । ‘बोतलमा जम्मा गरेको पानी फारु गर्दा पनि हिउँदमा जेनतेन ३ महिना काम चलाउँछौं’, मगरले भनिन्, ‘अरु समय सास्ती खेप्नुपर्छ ।’

प्रकाशित : माघ २, २०७८ १०:५०
प्रतिक्रिया
पठाउनुहोस्

स्थानीय तहमा अनियमितता

डम्बरसिं राई

खोटाङ — दिक्तेल रूपाकोट मझुवागढी–८ बुवालुङमा सञ्चालित कतिपय योजनामा आर्थिक अनियमितता भएको स्थानीयले गुनासो गरेका छन् । नगरपालिकामा पटक–पटक गुनासो गर्दासमेत बेवास्ता गरिएको उनीहरूको भनाइ छ । बुवालुङस्थित मध्यपहाडी लोकमार्गदेखि वडा कार्यालयसम्मको सडक निर्माण गुणस्तरहीन भएको स्थानीयको आरोप छ ।

८३ लाख रुपैयाँको लागतमा निर्माणाधीन सडकमा सोलिङ र डन्डीबिनै ढलान गरिएको स्थानीय कृष्ण बुढाथोकीले बताए । ‘सडक ढलान गर्दा सोलिङ र रड अनिवार्य रूपमा हुनुपर्ने हो,’ उनले भने, ‘न सोलिङ छ, न रड । माटोमाथि ढलान गरिएको छ, यसमा सम्बन्धित निकायको ध्यान जानुपर्छ ।’ स्थानीय हरिकुमार खत्रीको अध्यक्षतामा बनेको उपभोक्ता समितिले २०७८ असोज १८ मा नगरपालिकासँग सम्झौता गरे पनि लोकमार्ग निर्माणमा रमण गोल्डेन जुड जेबी सम्बद्ध साङ्गे शेर्पाले काम गरिरहेको वडाध्यक्ष लीला चौहानले बताए ।

उक्त सडकको बजेट नै कम भएकाले रड र सोलिङबिनाको इस्टिमेटकै आधारमा काम भइरहेको वडाध्यक्ष चौहानले बताए । स्थानीयको विरोधपछि रातारात इस्टिमेट परिवर्तन गरिएको स्थानीय कृष्ण बुढाथोकीले बताए ।

दिक्तेल रुपाकोट मझुवागढी नगरपालिका–८ बुवालुङस्थित निर्माणाधीन सडक । उक्त सडकको ढलान माटोमाथि गरिएको भन्दै स्थानीयले विरोध गरेका छन् । तस्बिर : डम्बरसिं राई

बुवालुङस्थित अन्नपूर्ण माविको सिँढी तथा पर्खाल निर्माणमा पनि आर्थिक अनियमितता भएको पाइएको छ । यसमा पनि उपभोक्ता समितिबाट श्रमदान गराएर रमण गोल्डेन जुड जेबीले मध्यपहाडी लोकमार्गकै निर्माण सामग्री उपलब्ध गराएर नगरपालिकाबाट भुक्तानी लिएको छ । स्थानीय तथा विद्यालय व्यवस्थापन समितिका पूर्वअध्यक्ष जेपी राईले भने, ‘निर्माण सामग्री साङ्गेले दिनुभएको हो,’ राईले भने, ‘तर यसै कामका लागि नगरपालिकाबाट पनि बजेट निकासा गरिएको रहेछ ।’

विद्यालयको सिँढी र पर्खालका लागि २० लाख १६ हजार रुपैयाँ निकासा भएको नगरपालिकाका सूचना अधिकारी मोहनकुमार भट्टराईले बताए । उक्त कामका लागि विष्णुमाया थापा अध्यक्ष रहेको सिँढी तथा पर्खाल निर्माण उपभोक्ता समितिले नगरपालिकासँग सम्झौता गरी भुक्तानी गरिएको भट्टराईले सुनाए ।

एकीकृत बस्ती अलपत्र
दिक्तेल रूपाकोट मझुवागढ–८ बुवालुङको खावाडाँडास्थित एकीकृत बस्ती पनि अलपत्र परेको छ । सुरक्षित नागरिक आवास र पूर्वाधार विकासबाट रकम निकासा गरिए पनि एकीकृत बस्ती निर्माण योजना अलपत्र परेको हो ।

उक्त ठाउँमा सुरक्षित नागरिक आवासअन्तर्गत लाभग्राहीका लागि २० घर बनाइएको हो । पहिलो किस्ताको ५० हजार र दोस्रो कित्ताको १ लाख ५० गरी प्रतिघर दुई लाख रुपैयाँ बुझे पनि घर निर्माण भने अपूरै छ । यसबाहेक पूर्वाधार विकासका लागि प्रतिघर तीन लाख रुपैयाँको दरले लिए पनि काम भने अपूरै छ ।

घडेरी खार्ने, खानेपानी, टेवापर्खाललगायतका लागि तीन लाखको दरले ६० लाख निकासा भएर पनि फरफारक भइसकेको वडाध्यक्ष चौहानले सुनाए । यद्यपि टेवा पर्खालको काम भने अपूरै रहेको बुढाथोकीले बताए ।

उक्त वडाकै ऊवाबारीमा पनि एकीकृत बस्तीको नाममा सुरक्षित नागरिक आवासको घर पनि अलपत्र परेको छ । उक्त ठाउँमा घर निर्माणको सुरुवाती चरणमै अलपत्र परेको छ । यद्यपि पहिलो र दोस्रो चरणको गरी दुई लाख रुपैयाँका दरले निकासा लिइसकेको लाभग्राही मनिराम हिङ्माङले बताए ।

उक्त ठाउँमा वडाध्यक्ष चौहानलगायत २५ लाभग्राहीको घर निर्माणाधीन अवस्थामै अलपत्र परेको छ । कतिपयको सुरक्षित नागरिक आवासको घर सिस्ने हर्कटे सामुदायिक वनको जग्गामा निर्माण गरिएको वडा सदस्य चाम्लिङले बताए । उक्त ठाउँ अनकन्टार भएकाले बस्न समस्या देखिएको हिङ्माङको भनाइ छ ।

उक्त वडाको विभिन्न विकासे योजनाहरूको अनियमिततामा वडाध्यक्ष चौहानको नाम जोडिएको छ । वडाध्यक्ष चौहानले भने विकास निर्माणलगायतका अन्य विषयमा आफ्नो नाम जोडेर विभिन्न आरोप मात्र लगाएको बताए ।

प्रकाशित : माघ २, २०७८ १०:४७
पूरा पढ्नुहोस्
प्रतिक्रिया
पठाउनुहोस्
×