नकाब लगाएर बलात्कार प्रयास !- प्रदेश १ - कान्तिपुर समाचार

नकाब लगाएर बलात्कार प्रयास !

पर्वत पोर्तेल

काँकडभिट्टा — झापाको शिवसताक्षी नगरपालिकास्थित एक महिलाले काम गरेर घर फर्कने क्रममा अनुहारमा नकाब लगाएको एक अज्ञात पुरुषले बलात्कार प्रयास गरेको बताएकी छन् ।

झापाको शिवसताक्षी नगरपालिका-९ दुधेकी ती महिला घर बनाउने मजदुरी गर्छिन्। काम सकेर घर फर्कँदै गर्दा शुक्रबार साँझ करिब ६ बजे उनीमाथि बलात्कार प्रयास भएको थियो ।

‘साइटमा काम गरेर फर्किँदै थिएँ । कालो कपडाले अनुहार छोपेको मान्छेले मुख छोपेर बलात्कार गर्ने प्रयास गर्‍यो,’ ती महिलाले बताइन् । उनका अनुसार पुरुषको कान्छी औंला टोकेर उनी त्यहाँबाट उम्किएकी थिइन् । ‘मलाई लडाएर दुर्व्यवहार गर्न खोज्दै थियो । औंला टोकेपछि मेरो मुखको हात छुट्यो, गुहार माग्न थालेपछि भाग्यो,’ उनले भनिन् ।

साइकल चढेर आएका ती व्यक्ति महिला चिच्याउन थालेपछि चप्पल र साइकल छाडेर भागेको महिलाले बताएकी छन् ।

घटनापछि आरोपीलाई खोजबिन गरी कारबाहीको माग गर्दै पीडित परिवार इलाका प्रहरी कार्यालय झिलझिलेमा उजुरी दिन गएको थियो । तर, प्रहरीले उजुरी नै गर्न नदिएको पीडितका बाबुले गुनासो गरेका छन् । ‘उजुरवाजुर केही चाहिँदैन हामी मान्छे खोज्छौं भनेर प्रहरीले पठाउनुभयो । हामी त चौकीमै साइकल बुझाएर फर्कियौं ।’

दुई वर्षअघि बिहे गरेकी ती महिलाको एक सन्तान पनि छ । उनी हाल माइती घरमै बस्दैआएकी र घर बनाउने श्रमिकको रुपमा कार्यरत रहेकी छन्।

प्रकाशित : पुस २४, २०७८ १७:३८
प्रतिक्रिया
पठाउनुहोस्

अमूल्य सम्पदा कौडीको भाउमा बेचिनबाट रोकेँ : पर्यटनमन्त्री आले

माधव ढुंगाना

भैरहवा — पर्यटन, संस्कृति तथा नागरिक उड्ययनमन्त्री प्रेमबहादुर आलेले नारायणहिटी संग्रहालयमा रहेका अमूल्य सम्पदा र सम्पत्ति कौडीको भाउमा बेचिन लागेकोले बतास समूहलाई हटाइएको बताएका छन् ।

होटल व्यवसायी महासंघ नेपालको नवौं वार्षिक साधारणसभाको शनिबार भैरहवामा उद्घाटन गर्दै मन्त्री आलेले राजतन्त्रको अन्त्य हुँदैमा नारायणहिटी संग्रहालयको सम्पत्ति कतैबाट पनि नासिन नहुने बताए । ‘राजतन्त्रको सम्पत्ति लुट्नका लागि नै गणतन्त्र ल्याउन खोजिएको हो ?’ आलेको प्रश्न थियो ।

पशुपती क्षेत्र विकास कोषअर्न्तगत भारतीय सहयोगमा निर्मित तिर्थालुलाई निर्माण गरिएको धर्मशाला (होटल) पनि कौडीको भाउमा अरुलाई लिजमा दिने काम भएकाले आफूले छानबिन थालेको उनले बताए । सात दिनभित्र प्रतिवेदन बुझाउने गरी समिति गठन गरेको भनाइ उनको थियो । ४० करोड रुपैयाँ लगानीमा निर्मित उक्त धर्मशाला भारतीय तीर्थालुलक्षित रहेको मन्त्री आलेले बताए । ‘१९ रोपनी जमिनमा ३ सय ९७ बेडको ८८ वटा कोठा रहेको ३ तले धर्मशाला पनि कौडीको भाउमा दिने काम भयो’, आलेले भने, ‘जम्मा मासिक साढे ८ लाख भाडा पाउने गरी दिन थालिएकोले छानबिन अघि बढाएको हुँ’, उनले भने ।

उनले लुम्बिनी क्षेत्रमा पनि लुम्बिनी विकास कोषको अधिनमा रहेको जमिनमा निर्मित होटल यसरी नै सस्तो मूल्यमा लिजमा दिइएको बताए । कोरोनाका कारण लामो समयसम्म थलिएको होटल तथा पर्यटन व्यवसाय प्रवर्द्धनका लागि व्यवसायीसँग नै सहकार्य र छलफल गरेर अगाडि बढ्न आफू तयार रहेको उनको भनाइ थियो ।

पर्यटन बोर्डमा साना तथा मझौला होटल पनि दर्ता हुन पाउनु पर्ने व्यवसायीको मागप्रति आफ्नो ध्यानाकृष्ट भएको र ५० बेडभन्दा माथिका होटल निर्माणका लागिमात्र वातावरणीय प्रभाव मूल्याकंन (इआइए) गर्नु पर्ने नियमका लागि पहल गर्ने उनले बताए ।

निर्माणाधीन गौतम बुद्ध अन्तर्राष्ट्रिय विमानस्थल परीक्षण उडानका लागि तयारी अवस्थामा रहेको र मौसममा सुधार हुनासाथ उडान थालिने उनले बताए । परीक्षण उडान गरिएको दुई महिनाभित्र विमानस्थल संचालनमा ल्याइने दाबी उनको छ ।

फोहर भएको ठाउँलाई सफा गर्नु पर्छ भन्ने मान्यताअनुरुप आफू अघि बढेको बताउँदै उनले आफ्नो कर्तव्य र दायित्वबाट कहिल्यै पनि बिमुख नहुने प्रतिबद्धता व्यक्त गरे । ‘जति दिन म पदमा रहेर काम गर्छु, जनताको हितमा हुने गरी गर्छु । कसैको दबाबमा परेर गर्दिन्नँ’, मन्त्री आलेले भने, ‘यदि जनताको हित विपरीतको काम गर्नका लागि दबाब आयो, थेग्न नसक्ने अवस्था आएमा मन्त्रीको झन्डा फुकालेर जनतामाझ जाने छु ।’

होटल व्यवसायीले भने कोरोनाले मारमा परेका होटल तथा पर्यटन व्यवसाय प्रवर्द्धनका लागि सरकारले विशेष कार्यक्रम ल्याउनु पर्ने माग राखेका थिए । पर्यटन व्यवसायलाई पनि उद्योगसरह मान्यता दिएपनि सेवा सुविधाबाट भने बञ्चित गरेको आरोप व्यवसायीको थियो ।

प्रकाशित : पुस २४, २०७८ १७:२८
पूरा पढ्नुहोस्
प्रतिक्रिया
पठाउनुहोस्
×