शताब्दी पुरुषलाई राष्ट्रिय सम्मानका साथ शोक सलामी [तस्बिरहरू]
काठमाडौँ — शताब्दी पुरुष संस्कृतिविद् सत्यमोहन जोशीको पार्थिव शरीरमा फूलमाला चढाउँदै नेपाल प्रहरीको टुकडीले राष्ट्रिय सम्मानका साथ शोक सलामी अर्पण गरेको छ । जोशीको पार्थिव शरीरलाई ललितपुर महानगरपालिकाको प्रांगणमा राखी प्रधानमन्त्री शेरबहादुर देउवाले राष्ट्रिय झन्डा ओढाएर श्रद्धाञ्जली दिएका थिए ।
जोशीको पार्थिव शरीरलाई श्रद्धाञ्जली अर्पण गर्न प्रधानमन्त्री देउवा, पूर्वप्रधानमन्त्री पुष्पकमल दाहालसहित उच्चपदस्थ व्यक्तित्वहरू आइतबार दिउँसो महानगरपालिकाको प्रांगणमा पुगेका थिए । त्यसपछि जोशीको पार्थिव शरीर किस्ट मेडिकल कलेजलाई बुझाइएको छ । उपचारका क्रममा आइतबार निधन भएका जोशी जीवित रहँदा इच्छाएअनुसार उनको पार्थिक शरीर अध्ययनका लागि मेडिकल कलेजलाई बुझाइएको हो । केही महिनायता अस्वस्थ रहेका जोशीको १०३ वर्षको उमेरमा ललितपुरको किस्ट मेडिकल कलेजमा आइतबार बिहान निधन भएको हो ।
