गुम्बामा एलिजाबेथको श्रद्धाञ्जली सभा
काठमाडौँ — बेलायती महारानी एलिजाबेथ द्वितीयाको सोमबार राजकीय सम्मानका साथ अन्त्येष्टि गरिँदैछ । उनको निधन भएको ११औं दिनमा बेलायत मात्रै नभएर विभिन्न देशमा उच्च सम्मानसाथ महारानी एलिजाबेथको श्रद्धाञ्जली सभा गरिँदैछ । यसै क्रममा काठमाडौंको बौद्धस्थित सेतो गुम्बामा महारानी एलिजाबेथ द्वितीयाको तस्बिर राखेर बौद्ध संस्कार तथा परम्परा अनुसार श्रद्धाञ्जली सभा गरिएको छ ।
गुम्बाभित्र भिक्षुहरूसहित नेपालस्थित बेलायती राजदूतावासका उच्चपदस्थ कर्मचारीहरू उपस्थित भएर महारानी एलिजाबेथप्रति श्रद्धाञ्जली अर्पण गरेका थिए । सोमबार नै लन्डनस्थित वेस्टमिन्स्टर हलमा सार्वजनिक श्रद्धाञ्जलीको कार्यक्रम गरिएको छ । बेलायतमा सात दशकभन्दा लामो समय शासन गरेकी महारानी एलिजाबेथ द्वितीयाको सेप्टेम्बर ९ (भदौ २३) मा ९६ वर्षको उमेरमा निधन भएको हो । स्कटल्यान्डस्थित बालमोरल दरबारमा उनको निधन भएको थियो। महारानी एलिजाबेथको निधनप्रति दु:ख व्यक्त गर्दै नेपालमा पनि तीन दिन शोक मनाइएको थियो ।
