कोरोना संक्रमण बढेपछि पूर्वी नाकामा यस्तो छ निगरानी

मन्त्रालयको पत्र आएलगत्तै झापाको पूर्वी नाकामा पनि कोरोना संक्रमण भित्रिन नदिन थप निगरानी बढाइएको छ । दैनिक रूपमा एन्टिजेन परीक्षण भइरहेको छ । खोप नलगाएकालाई खोप लगाउने काम पनि भइरहेको छ ।

नाकामा खटिएकी स्वास्थ्यकर्मी शान्ता भण्डारीले दैनिक औसतमा दुई सयभन्दा बढी शंकास्पद यात्रुहरूको एन्टिजेन परीक्षण भइरहेको छ । जसमध्ये औसतमा दैनिक ५ जना बढीमा कोरोना पोजिटिभ देखिएको छ । उनका अनुसार ७ दिनमा ५४ जनामा पोजिटिभ देखिएको छ ।

खासगरी भारतको असम, दिल्ली, चेन्नईलगायतका ठाउँबाट भित्रिने यात्रुलाई ‘शंकास्पद’ मान्दै विशेष निगरानी गरिएको सशस्त्र प्रहरीको बोर्डर आउट पोस्टका इन्स्पेक्टर प्रेमकुमार राईले जानकारी दिए । ‘पोजिटिभ देखिएका भारतीय यात्रुलाई भारततिरै फर्काइँदैछ’, उनले भने,‘नेपालीहरूलाई भने होम क्वारेन्टाइनमा बस्ने सर्तमा पठाइन्छ ।’