कान्तिपुर वेबसाईट
AdvertisementAdvertisement

पन्ध्र असारको हिलोमा रमाउँदै पर्यटक

दीपक परियार

पोखरा — झण्डै १० रोपनी खेत खनजोत गरेर धान रोप्न ठिक्क पारिएको छ । खेतको वरपर आँठोमाथि भीड छ । कोही पञ्चेबाजामा नाचिरहेका छन् । केही रोपाहारहरू असारे गीत गाइरहेका छन् । अर्को गरामा विदेशी पर्यटक एकअर्कालाई हिलो छ्यापाछ्याप गरेर रमाइलो मानिरहेका छन् । मध्य असारको हिलोमा बेपर्वाह रमाइरहेका छन् उनीहरू।

राष्ट्रिय धान दिवसको अवसरमा पोखरा पर्यटन परिषद्ले हरेक वर्ष आयोजना गर्ने रोपाइँ महोत्सव यस वर्ष पोखरा–२५ हेमजाको माइस्थान फाँटमा गर्‍यो । ‘पोखरा सबै मौसमका लागि’ भन्ने नाराका साथ १७ औं असारे रोपाइँ महोत्सव तथा दोस्रो राष्ट्रिय हेमजा हिले महोत्सव बुधबार भएको हो । महोत्सवमा विदेशी पर्यटकको उत्साहजनक उपस्थिति थियो ।

महोत्सवमा हिलो खेलेर स्वदेशी र विदेशी पर्यटकहरू रमाए । हल गोरु दौडाउने प्रतियोगिता, साउने असारे गीत गाउँदै धान रोप्ने प्रतियोगिता, हिलोमा माछा समात्ने प्रतियोगिता, पर्यटक दौड, रस्सी तान्ने प्रतियोगिता महोत्सवको आकर्षण बने । हिलो दौड प्रतियोगितामा विदेशी पुरुष एवं महिलाहरू पनि सहभागी भएका थिए । परिषद्‍का अध्यक्ष गोपीबहादुर भट्टराईले कृषि पर्यटनमार्फत् पोखराको प्रवर्द्धन गर्नु महोत्सवको मुख्य उद्देश्य भएको बताए । महोत्सवले खेतीयोग्य जमिनको संरक्षण, कृषिलाई व्यवसायीकरण गर्दै कृषकलाई आफ्नो पेसाप्रति अभिप्रेरित गर्न सहयोग पुर्‍याउने उनले जनाए ।

यस अवसरमा हेमजाका उत्कृष्ट कृषकलाई परिषद्‍ले सम्मानसमेत गरेको छ । स्थानीय रामबहादुर कुंवर, तुलसी पौडेल, अग्निधर पौडेल, डिल्लिराम नेपाली, कृष्णबहादुर कुंवर, मैना केसी र प्रकाश पौडेलको १० रोपनी खेतमा महोत्सव गरिएको थियो ।


प्रकाशित : असार १५, २०७९ १७:३१
प्रतिक्रिया
पठाउनुहोस्

काठमाडौं उपत्यकामा हालसम्म १४ जनामा हैजा : स्वास्थ्य मन्त्रालय

'लक्षण देखिएमा स्वास्थ्य संस्थामा जाऔँ'
कान्तिपुर संवाददाता

काठमाडौँ — स्वास्थ्य तथा जनसंख्या मन्त्रालयले असार २ देखि आजसम्ममा १४ जनामा हैजाको संक्रमण पुष्टि भइसकेको जानकारी दिएको छ । हैजा पुष्टि भएका पहिलो बिरामीको घर तथा कार्यस्थलबाट भण्डारण गरिएको जारको पानी, जमिनको पानी, धाराको पानीको नमुना परीक्षण गर्दा ‘कोलिफर्म’ भन्ने जीवाणु भेटिएको थियो । 

स्वास्थ्य तथा जनसंख्या मन्त्रालय । फाइल तस्बिरः कान्तिपुर

यस्तै, ईपिडिमियोलोजी तथा रोग नियन्त्रण महाशाखाले ललितपुरबाट संकलन गरेको १८ वटा पानीको नमुना परीक्षण गर्दा १२ नमुनामा ‘इकोलाई’ जीवाणु भेटिएको पाइएको मन्त्रालयले जनाएको छ।

हैजाको कुनैपनि लक्षण देखिएमा नजिकैको स्वास्थ्य संस्थामा जान स्वास्थ्य तथा जनसंख्या मन्त्रालयले अनुरोध गरेको छ । बुधबार मन्त्रालयले प्रसारण गरेको मिडिया प्रेस ब्रिफिङमा बोल्दै मन्त्रालयकी प्रवक्ता डा. संगीता मिश्राले वर्षायाम सुरु भएसँगै पानीजन्य संक्रमणबाट सतर्क रहन आग्रह गरिन् ।

‘पानीजन्य रोगबाट बच्न पानी उमालेर वा क्लोरिन झोल हालेर शुद्धिकरण गरेको पानी मात्र पिउने गरौँ । खानेकुरालाई राम्ररी पकाएर मात्र खाने, सडेगलेको बासी र झिंगा भन्किएको खाना नखाने, खानेपानी र खाना पकाउने पानी राम्ररी छोपेर मात्र राख्ने गर्नुपर्छ,’ प्रवक्ता डा. मिश्राले भनिन् ।

उनका अनुसार हैजा रोकथामकालागि मन्त्रालयले विभिन्न ठाउँमा पानीको नमुना परीक्षण गर्ने,पानीको बुथ स्थापना गर्ने, निरन्तर निगरानी बढाउने, पानी शुद्धिकरण गर्ने, सरसफाइ कार्यक्रम अघि बढाउनुका साथै हैजा तथा झाडापखालाबाट बच्न विद्यालय तथा समुदायमा जनचेतनामुलक कार्यक्रम सञ्चालन गरिएको छ ।


स्तनपान नगराइ बोतलको दुध खुवाइएका बच्चाहरु, कुपोषित बालबालिकाहरु, दुषित खाना र पानी खाएमा , व्यक्तित सरसफाइमा ध्यान नदिएमा , खोप नपाएका बच्चाहरु हैजाको बढी जोखिममा हुन सक्छन् ।

खान पिउन नसक्ने गरी बिरामी भएमा ,दिसामा रगत देखा परेमा, बारम्बार बान्ता भइरहेमा, ज्यादै तिर्खाएमा, ज्वरो आएमा, धेरै पटक पाताले दिसा गरेमा तुरुन्त स्वास्थ्य संस्थामा लैजानुपर्छ । झाडापखाला हुनासाथ एक लिटर सफा पानीमा एक पुरिया जीवनजल राखी राम्ररी घोल्ने र पटकपटक खुवाउने, प्रशस्त मात्रामा सफा तथा झोल कुराहरु पटक पटक खान दिने, नरम तथा सजिलै पच्न खानेकुरा थोर थोरै गरी पटकपटक खुवाइरहने, व्यक्तिगत सरसफाइमा ध्यान दिने र स्वच्छ पानी खाएमा यसको जटिलताबाट बच्न सकिन्छ ।


प्रकाशित : असार १५, २०७९ १७:२१
पूरा पढ्नुहोस्
प्रतिक्रिया
पठाउनुहोस्
×