कान्तिपुर वेबसाईट
AdvertisementAdvertisement

पोखरामा यस्तो देखियो मतदानस्थल [तस्बिरहरु]

लालप्रसाद शर्मा

पोखरा — स्थानीय तह निर्वाचन गर्न निर्वाचन अधिकृतसहित सबै कर्मचारी र सुरक्षाकर्मी मतदान सामग्रीसहित सम्बन्धित मतदानस्थल पुगिसकेका छन् । निर्वाचन तालिकाअनुसार बुधबार र बिहीबार मतदाता परिचयपत्र वितरण, मतदाता शिक्षा दिने र मतदान केन्द्र बनाउने समय हो ।

पहिलो दिन बुधबार नयाँ मतदाताको परिचयपत्र वितरण गर्ने योजना रहे पनि खासै मतदाताहरु लिन आएनन् । फाट्टफुट्टमात्रै परिचयपत्र लिन आएका थिए । नागरिकतालगायत परिचयपत्रका आधारमा पनि मतदान गर्न पाउने निर्वाचन आयोगले जनाएकाले पनि मतदाता परिचय पत्र लिन नआएको अनुमान गरिएको छ । अधिकांश बिहीबार पनि आउने अनुमान छ ।

यसैगरी आयोगले दुवै दिन मतदाता शिक्षा दिने भने पनि पोखराका केही मतदानस्थलमा त्यस्तो देखिएन । नयाँ मतदातालाई परिचयपत्र वितरणसँगै नमुना मतपत्रमा मत हाल्न सिकाउने भनिएकोमा त्यस्तो नभएको हो । ‘पहिलो दिन भएर पनि होला मतदाता परिचयपत्र लिन खासै आएनन्,’ पोखरा–७ वडा कार्यालय मतदानस्थलका मतदान अधिकृत दिनेश काफ्लेले भने, ‘बिहीबार आउनुहोला ।’ फाट्टफुट्ट परिचयपत्र लिन आउनेले पनि मतदाता शिक्षासम्बन्धी कुनै कुरा नगरेको र कसैले सोधेमा भोट हाल्न पनि सिकाएको उनले बताए ।

प्रकाशित : वैशाख २८, २०७९ १९:३३
प्रतिक्रिया
पठाउनुहोस्

हस्तान्तरण भयो पोखरा विमानस्थल

लालप्रसाद शर्मा

पोखरा — जग्गा अधिग्रहण गरेको ४६ वर्षपछि पोखरामा बल्ल क्षेत्रीय अन्तर्राष्ट्रिय विमानस्थल निर्माण भएको छ । चीन सरकारले प्रायः सबै मुख्य संरचना निर्माण सम्पन्न भएको विमानस्थल शनिबार नेपाललाई हस्तान्तरण गरेको हो ।

चीनका विदेशमन्त्री वाङ यीले काठमाडौंमा समकक्षी नारायण खड्कालाई विमानस्थलको चाबी हस्तान्तरण गरे । पोखरामा संस्कृति, पर्यटन तथा नागरिक उड्डयनमन्त्री प्रेम आलेले विमानस्थल निर्माण गरेको चिनियाँ कम्पनी सीएएमसीई र परामर्शदातालाई कदरपत्र प्रदान गरे ।

विमानस्थलको मुख्य संरचना निर्माणको काम सकिएको विमानस्थल आयोजना प्रमुख विनेश मुनकर्मीले जानकारी दिए । यसैगरी सम्पूर्ण उपकरण र औजारको जडानको काम पनि पूरा भएको छ । एयरसाइडतर्फ २५ सय मिटर रनवे, डोमेस्टिक र इन्टरनेसनल एप्रोन, ह्यांगर, आइसोलेटेड पार्किङ, ट्याक्सी वे, एयरफिल्ड ग्राउन्ड लाइटिङलगायत मुख्य काम सकिइसकेका छन् । बिल्डिङतर्फ टर्मिनल, एटीसी टावर, ह्यांगरलगायत १४ वटा भवन बनेका छन् । सबै संरचना बनेर अहिले फिनिसिङका क्रममा छन् । ‘समग्रमा ९३ प्रतिशत काम सकिएको छ,’ उनले भने, ‘निर्माणको काम सकिएकाले सञ्चालन प्रक्रियामा अघि बढेको छ ।’ राष्ट्रिय गौरबको विमानस्थल चीन सरकारको सहुलियतपूर्ण झन्डै २२ अर्ब ऋणमा निर्माण गरिएको हो । आयोजनाको वित्तीय प्रगति भने ७४ प्रतिशत छ । ऋण रकममध्ये ७५ प्रतिशत एक्जिम बैंकको २ प्रतिशत ब्याज र २५ प्रतिशत चीन सरकारको निर्ब्याजी ऋण हो ।

सन् २०२१ जुलाई १० भित्र सक्ने गरी २०७३ वैशाख १ मा विमानस्थलको शिलान्यास गरिएको थियो । तर कोरोनाका कारण आवश्यक उपकरणलगायत सामान आयात र कामदारको समेत अभाव भएपछि एक वर्ष म्याद थपिएको हो । आगामी जुलाई १० भित्र बाँकी काम पनि सकिने मुनकर्मीले बताए ।

विमानस्थलमा बाढीको व्यवस्थापन, रिट्ठेपानी डाँडा काट्ने र पोखरा महानगरको ल्यान्डफिल साइट सार्ने चुनौती छन् । रिट्ठेपानी डाँडा छिट्टै कटान सुरु हुने नागरिक उड्डयन प्राधिकरणका महानिर्देशक प्रदीप अधिकारीको भनाइ छ । चार महिनाभित्र ल्यान्डफिल्ड साइट नसारिए विमानस्थल सञ्चालनमा नआउने उनले स्पष्ट पारे । ‘डाँडा काटेपछि परीक्षण उडान हुनेछ,’ उनले भने, ‘तर ल्यान्डफिल्ड साइड नसारिए उडान अनिश्चित हुन्छ ।’ ल्यान्डफिल साइट हटाउन पोखरा महानगरले स्थान हेरिरहेको भए पनि अझै यकिन हुन सकेको छैन ।

सन् २०१४ को मे ३१ मा नागरिक उड्डयन प्राधिकरण र ठेकेदार कम्पनी चाइना सीएएमसी इन्जिनियरिङ कम्पनी लिमिटेडबीच विमानस्थल निर्माणको ठेक्का सम्झौता भएको थियो । २०१६ मार्च २१ मा नेपाल र चीनको एक्जिम बैंकबीच ऋण सम्झौता भयो । नेपाल सरकार र प्राधिकरणबीच २०१६ जुन ५ मा अनुदान ऋण सम्झौता भयो । एक्जिम बैंकले २०१७ मे ३१ बाट ऋण प्रवाह गर्‍यो । २०१७ जुलाई ११ बाट काम सुरु भयो ।

विमानस्थल सञ्चालनमा आएपछि पोखरामा पर्यटकीय गतिविधि थप बढ्ने भएकाले सोहीअनुसार तारे होटलदेखि अन्य पूर्वाधार निर्माण गर्न संस्कृति, पर्यटन तथा नागरिक उड्डयनमन्त्री आलेले निजी क्षेत्रसँग अनुरोध गरे । पोखरामा हुने उडानका लागि कञ्चनपुरबाट बाहिरिने भए पनि भित्रिने रुट अहिलेसम्म यकिन नभएकाले दुईतर्फी रुटका लागि भारतसँग अनुरोध गरिएको उनले बताए । निर्माण कम्पनी सीएएमसीईका अध्यक्ष ली हाई सिनले विमानस्थल निर्माणले ४० वर्षभन्दा बढी समयदेखिको सपना पूरा गर्ने धारणा राखे । यसबाट नेपाल मात्र नभएर दक्षिण एसियाको हवाई यातायातमा महत्त्वपूर्ण योगदान पुग्ने उनको भनाइ छ ।

प्रकाशित : चैत्र १३, २०७८ ०७:३०
पूरा पढ्नुहोस्
प्रतिक्रिया
पठाउनुहोस्
×