२०७८ साललाई फर्केर हेर्दा [तस्बिरहरू]

राजनीतिक रुपमा पूर्वप्रधानमन्त्री केपी शर्मा ओलीले दोस्रो पटक गरेको प्रतिनिधिसभा विघटन र अमेरिकी अनुदान मिलेनियम च्यालेन्ज कर्पोरेसनको विरोध र समर्थनको वरिपरि विभिन्न परिघटनाहरू देखा परे । यो वर्ष दोस्रो पटक प्रतिनिधिसभा विघटन र बदर मात्रै भएन, कांग्रेसबाहेकका सबै राजनीतिक दलमा विभाजन आयो, प्रमुख राजनीतिक दलले आफ्नो महाधिवेशन पनि यही वर्ष सम्पन्न गरे ।

त्यस्तै स्वास्थ्य क्षेत्रमा कोभिड-१९ ले जनजीवनलाई पुनः प्रभावित बनायो । ७५ दिनयता कोरोनाका सक्रिय संक्रमितको संख्या १६३ गुणाले कम भएका छन् भने २२ महिनापछि शून्य मृत्यु, ६६.१ प्रतिशत नागरिकलाई पूर्ण खोप प्राप्त भएको छ । यो वर्ष पारासिटामोल, एस्टेरोइड, रगत पातलो बनाउने औषधि, श्वासप्रश्वासका बिरामीले सेवन गर्ने औषधि, शल्यक्रिया सामग्री, अक्सिजन मास्कलगायतको चरम अभावसमेत हुन पुग्यो । एन्टिबायोटिकहरू एजिथ्रोमाइसिन, डक्सिसाइक्लिन, भिटामिन सी, भिटामिन बी कम्प्लेक्स, जिंकलगायत करिब ३० प्रकारका औषधिको सहज उपलब्ध थिएन ।

आर्थिक क्षेत्रमा पनि यो वर्ष धेरै उतारचढाव देखा परे । यो वर्ष विशेषगरी अर्थतन्त्रमा सुधार भएको देखिएको छैन । शोधनान्तर घाटा बढ्नु, अमेरिकी डलरमा विदेशी मुद्रा सञ्चिति घट्नु, व्यापार घाटा र मूल्यवृद्धि तीव्र दरले उकालो लाग्नु, रेमिट्यान्स आप्रवाह वृद्धिदर ऋणात्मक हुनुलगायत सूचकले अर्थतन्त्रमा सुधार नभएको पुष्टि गर्छन्त्यस्तै मूल्य वृद्धिदर ७.१४ प्रतिशत पुगेको छ भने आयात ३८.६ र निर्यात ८२.९ प्रतिशतले वृद्धि भएको छ । रेमिट्यान्स अमेरिकी डलरमा ३ प्रतिशत घटेको छ भने २ खर्ब ५८ अर्ब ६४ करोड शोधनान्तर घाटा भएको छ । यसैगरी कुल विदेशी विनिमय अमेरिकी डलरमा साढे १८ प्रतिशतले कम भएको छ भने निक्षेप वृद्धिदर १४ प्रतिशत पुगेको छ ।

२०७८ मा जनतालाई सेवा प्रवाह गर्ने सवालमा सर्वोच्च अदालत नराम्ररी चुकेको देखिएको छ । कोभिडका कारण सेवा संकुचन, न्यायाधीशहरूको इजलास बहिष्कारलगायत कारण यो वर्ष १२ प्रतिशत मुद्दा मात्रै फर्स्योट भएका छन् ।यसैगरी यो वर्ष मेलम्चीमा आएको बाढीले त्यहाँका बस्तीहरू डुबानमा परे । उक्त डुबानबाट थुप्रै जनधनको क्षती भयो । तस्बिरमा २०७८ सालमा घटेका यी र यस्तै विभिन्न घटनाहरू: